Ձեր վստահելի աղբյուրը

«Մենք գտնում ենք, որ այսպիսի ցուցակով ՀՀԿ-ն մեծ հնարավորություն ունի ազատ մրցակցության պայմաններում գրանցել լուրջ հաջողություն ընտրության ժամանակ»,- այս մասին այսօր ՀՀԿ ԳՄ նիստից հետո լրագրողների հետ զրույցում ասաց ՀՀԿ խոսնակ, ԱԺ փոխնախագահ Էդուարդ Շարմազանովը:

Ավելի վաղ հայտնել ենք, որ ՀՀԿ համամասնական ցուցակը գլխավորելու է Պաշտպանության նախարար Վիգեն Սարգսյանը: Ցուցակի երկրորդ համարը կլինի Երևանի քաղաքապետ Տարոն Մարգարյանը, երրորդը` ՀՀ արդարադատության նախարար  Արփինե Հովհաննիսյանը, չորրորդը` ԱԺ պատգամավոր Արա Բաբլոյանը, 5-րդը` ՀՀ մշակույթի նախարար Արմեն Ամիրյանը,  6-րդը՝ Արմեն Աշոտյանը, 7-րդը` Էդուարդ Շարմազանովը, 8-րդը՝ Մարգարիտ Եսայանը, 9-րդը` Սամվել Ֆարմանյանը, 10-րդը` Կարեն Ավագյանը:

Հարցին, թե այն փաստը, որ Վիգեն Սարգսյանն է գլխավորում ՀՀԿ ցուցակը, արդյոք հավաստում է մամուլի տեղեկությունները, թե նա մտադրություն ունի լինել վարչապետ ընտրություններից հետո, Էդուարդ Շարմազանովը պատասխանեց, որ եթե մամուլին հղում արվեր, ապա նախագահ Սերժ Սարգսյանը պիտի լիներ ՀՀԿ-ի ցուցակում, որպեսզի հետո էլ դառնար ԱԺ նախագահ, սակայն ցուցակում նա չկա:

«Ի՞նչ կլինի 2018 թվականից հետո, ես չեմ կարող ասել, որպեսզի 2018-ին ՀՀԿ-ի ներկայացուցիչը դառնա վարչապետ, նախ անհրաժեշտ է, որ 2017 թ-ին մենք գրանցենք հաջողություն»,- ընդգծեց նա:

Հարցին, թե որքանով է նպատակահարմար, որ սահմանային լարվածությանը զուգահեռ Պաշտպանության նախարարը զբաղվի ոչ թե այդ հարցերով, այլ՝ քարոզչությամբ, ՀՀԿ խոսնակը պատասխանեց. «Պաշտպանության նախարարը քաղաքական պաշտոն է, բացի այդ Վիգեն Սարգսյանը օրենքով սահմանված կարգով ու ժամկետներում է զբաղվելու քարոզչությամբ, ինչպես նաև ՀՀԿ ցուցակում ընդգրկված յուրաքանչյուր պաշտոնյա: Մենք ամեն ինչ անելու ենք օրենքի տառին համապատասխան, անհոգ եղեք, առաջինը մենք ենք հետամուտ լինելու, որ հարգենք օրենքը ու մեր պաշտոնական պարտականությունները չխաչվեն քարոզարշավի հետ»:

ՀՀԿ խոսնակը նշեց նաև, որ այս ցուցակը նշանակում է՝ ՀՀԿ-ն վճռական է գնալ բարեփոխումների հանրային կյանքի ոլորտներում:

Նա նաև ասաց, որ ո՛չ Մհեր Սեդրակյանը, ո՛չ էլ Սուրիկ Խաչատրյանը ՀՀԿ-ի ցուցակում չկան: Հարցին, թե Գագիկ Բեգլարյանը կա՞ ցուցակում, ՀՀԿ խոսնակ Շարմազանովը պատասխանեց, որ չի հիշում: