Ձեր վստահելի աղբյուրը

«Ձմեռը պետք է ցուրտ լինի, կարևորը ձյունառատ էր»,- այսօր լրագրողների հետ հանդիպման ժամանակ ասաց ՀՀ գյուղատնտեսության նախարար Իգնատի Առաքելյանը՝ պատասխանելով հարցին, թե հաշվի առնելով ցուրտ ձմեռը՝ ինչպիսի աջակցություն է նախատեսվում գյուղացիական տնտեսություններին, ջերմատներին:

Նրա խոսքերով՝ դեռ վաղ է գնահատել, թե այգիները որքանով են տուժել:

«Կային օրեր, երբ աննախադեպ ցուրտ էր, և այն խաղողի այգիները, որոնք չեն թաղվել, հնարավոր է վնասվեն: Գարնանն ավելի պարզ կերևան ցրտահարության հետևանքները»,- ընդգծեց գյուղատնտեսության նախարարը:

Ինչ վերաբերում է ջերմոցային տնտեսություններին, Իգնատի Առաքելյանը նշեց, որ գազի սակագնի նվազումն արդեն մեծ օգնություն էր ջերմատներին, իհարկե, դա չի նշանակում, որ ջերմատների բոլոր հարցերը լուծվել են:

«Մենք շարունակում ենք իրենց հետ բանակցել, թե ինչ խնդիրներ կան, քանի որ արտահանման ծավալների աճի համար կարևոր նշանակություն ունեն ջերմոցները:  Հարցերը քննարկում ենք, փորձում ենք լուծում տալ»,-  նշեց Իգնատի Առաքելյանը:

Գյուղատնտեսության նախարարը ներկայացրեց նաև նախարարության կողմից իրականացվող մի շարք ծրագրերը: Նա տեղեկացրեց, որ տարեսկզբից մեկնարկել են սուբսիդավորման ծրագրերի համար նախատեսված մրցույթները:

Ըստ նրա՝ «Գյուղատնտեսական կենդանիների պատվաստում» ծրագրով բյուջեով նախատեսված էր 456 միլիոն դրամի պատվաստանյութեր գնել՝ տարբեր ախտորոշիչ և համաճարակային պատվաստման գործողությունների համար, սակայն մրցույթի արդյունքում հաղթող ընկերությունը ներկայացրել էր գին, որից հետո բանակցությունների արդյունքում այդ գները նվազել են. արդյունքում ծախսվելու է 411 միլիոն դրամ և կտնտեսվի 30 միլիոն դրամ:

Ինչ վերաբերում է պարարտանյութերի ձեռքբերմանը, Իգնատի Առաքելյանը նշեց, որ անցկացրել են շուկայի ուսումնասիրություն, որի շրջանակներում մրցույթին հրավիրվել են մասնակցելու բոլոր ներմուծողներին: Ըստ նախարարի՝ մասնակցել է 19 ընկերություն թե՛ Հայաստանից, թե՛ Գերմանիայից, Անգլիայից, Շվեյցարիայից և Ռուսաստանից:

«Մեր պահանջը եղավ այն, որ ընտրենք այն ընկերություններին, որոնք կտրամադրեն նվազագույն գին և չեն հավակնի ստանալ լրացուցիչ վարկ՝ պարարտանյութը բերելու համար: Անցյալ տարի պարարտանյութ բերելու համար մենք տրամադրել էինք 4 մլրդ դրամի չափով ցածր տոկոսադրույքով վարկ, իսկ մոտ 2 մլրդ 110 մլն դրամ տրամադրել էինք պարարտանյութի սուբսիդավորման համար: Այս տարի մենք այդ 4 միլիարդը չենք տրամադրում, իսկ սուբսիդավորմանը կուղղվի ընդամենը  900 միլիոն դրամ: Բյուջեով նախատեսված էր 2 միլիարդ 110 միլիոն դրամ, արդյունքում 1 միլիարդ 200 միլիոն դրամ կտնտեսենք»,- նշեց Իգնատի Առաքելյանը:

Նախարարի տեղեկացմամբ` պարարտանյութերի մատակարարման մրցույթում հաղթող են ճանաչվել նվազագույն գնային առաջարկ ներկայացրած Մասիսի «Բերրիություն», ռուսական «Տորգովիյ դոմ Դոնսկոյ Ագրոխիմցենտր» և իրանական պարարտանյութ ներմուծող «Բարան գրուպ» ընկերությունները: Սուբսիդավորման արդյունքում պարարտանյութը գյուղացիական տնտեսություններին կտրամադրվի նախորդ տարվա գներով:

Անդրադառնալով մթերման դիմաց պարտքերի վճարումներին` Իգնատի Առաքելյանը նշեց, որ այս պահի դրությամբ ընդհանուր պարտքը, ըստ մթերողների ներկայացրած տվյալների, կազմում է շուրջ 1 մլրդ 467 մլն դրամ: Ըստ նրա՝  գյուղնախարարությունը մշտական կապի մեջ է մթերող կազմակերպությունների հետ և հետևում է մարումների գործընթացին, կազմված է մարումների ժամանակացույց, համաձայն որի մինչև հունիս ամիս պարտքերի 90 տոկոսն արդեն մարված կլինի (փետրվարին` շուրջ 586 մլն, մարտին` 415 մլն, ապրիլին` 160 և այլն):

Իգնատի Առաքելյանը նաև հայտնեց, որ «Վինար» ընկերության պարտատերերը շուտով ամբողջությամբ կստանան իրենց հասանելիք գումարները:

Դատախազությունից, որը Գյուղնախարարության միջնորդությամբ քննում է «Վինարի» գործը, օրերս տեղեկացրել են, որ այս պահին գործարանի պահեստներում առկա է 12 հազար դեկալիտր սպիրտ, որը ՊԵԿ-ի քննչական վարչությունը կապարակնքել է, իսկ այդ քանակը բավարարում է, որպեսզի գյուղացիական տնտեսություններին ունեցած պարտքերն ամբողջությամբ մարվեն: Նախարարի խոսքերով` մի քանի օր ժամանակ է տրվել ընկերությանը իրացումը կազմակերպելու համար, և եթե «Վինարը» սպիրտը չիրացնի, ապա նախարարությունը դարձյալ կմիջամտի և կկազմակերպի վաճառքը:

Նախարարը նաև հայտնեց, որ հաջորդ շաբաթ գյուղտեխնիկայի տրամադրման ծրագիրն արդեն կներկայացվի քննարկման, նախատեսվում է ապահովել շատ ցածր տոկոսադրույքներ, որպեսզի բոլոր վարկունակ գյուղացիական տնտեսությունները, կոոպերատիվները, համայնքներն առանց սահմանափակումների կարողանան ձեռք բերել իրենց անհրաժեշտ տեխնիկան: