Ձեր վստահելի աղբյուրը

 «Մեր ուշադրության կենտրոնում են գտնվում ուսանողները և յուրաքանչյուր գնահատում կատարելիս, միշտ նայել ենք, թե այս կամ այն կառավարչական որոշումը բուհում ինչ է տալիս ուսանողին»,-այսօր ուսանողների խնդիրներին նվիրված քննարկման ժամանակ լրագրողների հետ զրույցում ասաց Մասնագիտական կրթության որակի ապահովման ազգային կենտրոնի տնօրեն Ռուբեն Թոփչյանը։

Նրա խոսքով՝ կրթական ծրագրերը գնահատելիս պետք է ստուգել, թե ստեղծված կրթական ծրագրերը ավարտողները գործ ունեն, թե չունեն և արդյոք դրանցով դասավանդող դասախոսները կարողանում են ուսանողին տալ արդի կարողություններ։

«Մյուս կարևոր չափանիշն ուսանողների գնահատումն է՝ արդյոք ուսումնական հաստատությունում տեղի ունեցող գնահատումը սովորեցնող է, արդյոք դասախոսն ուզում է սովորեցնել, թե ընդամենը հայտնաբերել չսովորողին։ Սրանք բոլորովին տարբեր բաներ են։ Իմ կարծիքով՝ դասախոսները պետք է նվիրված սովորեցնեն, ամեն միջոց կիրառեն դրա համար, իսկ քննությունը լինի ընդամենը մի ավարտական շեմ, որտեղ չափվեն ո՞վ է շատ սովորել, ո՞վ ավելի պակաս, բայց պետք է բոլորը սովորած դուրս գան։ Եթե ուսանողը ստանում է անբավարար գնահատական, «ինչու՞» հարցը պետք է տալ ոչ այնքան ուսանողին, որքան՝ դասախոսին»,-ասաց Թոփչյանը։

ՈԱԱԿ-ի տնօրենի կարծիքով՝ այսօր ստացվել է այնպես, որ բուհն ընդամենն ապահովում է դասերի անցկացումը, բայց պատասխանատվություն չի վերցնում, թե ինչ է տեղի ունենում այդ լսարանում. «Ստացվել է, որ բուհն ապահովում է լսարան- դասախոս- խոսակցություն՝նյութի շուրջ քննարկում, բայց պատասխանատվություն՝ թե ինչ է լինելու վերջում, ուսանողը գործ կգտնի, ստացածը պիտանի կլինի, թե ոչ, այդ պատասխանատվությունը միշտ չէ, որ բուհը կարողանում է վերցնել իր վրա։ Այստեղ հակասություն կա, բուհն ասում է, որ գործատուի դերն է կարևոր, բայց մյուս կողմից էլ գործատուն պրակտիկ գիտելիքներով շրջանավարտ է ուզում, իսկ բուհն այսօրվա դրությամբ ավելի շատ տեսական մասն է ապահովում»։

Թոփչյանը կարևորեց նաև երիտասարդ դասախոսների առկայություն, ովքեր ավելի շատ են ժամանակակից ընթացքի մեջ. «Երիտասարդ դասախոսները ուսանողների հետ նույն կոնտեքստում ավելի շատ են գտնվում, իրենք էլ են հասկանում ու լուծումներ գտնում, թե ինչ անեն, որ ուսանողներն ավելի ակտիվ լինեն։ Ցավոք, այսօր երիտասարդ դասախոսների թիվն այդքան էլ մեծ չէ»։

Նշենք, որ ՈԱԱԿ-ի նախաձեռնությամբ այսօրվանից մեկնարկել է կրթության որակի շաբաթը, որտեղ քննարկվելու են աշխատաշուկայի պահանջներն ու բուհական կրթության համապատասխանությունը, մագիստրոսական կրթության բացերը՝ ուսանողների, դասախոսների և գործատուների մասնակցությամբ։

Panorama.am-ի հետ զրույցում Հայաստանի պետական մանկավարժական համալսրանի մագիստրատուրայի առաջին կուրսի ուսանողուհի Հռիփսիմե Վարդանյանը նշեց, որ այս հինգ վեց տարիների ընթացքում բավականին առաջխաղացում է նկատել. «Այսօր շատ ու շատ է ավելացել ուսանողի ուշադրությունն իր խնդիրների նկատմամբ։ Հինգ տարի առաջ իմ կարծիքով լիարժեք անտարբերություն էր»։

ԵՊՀ չորրորդ կուրսի ուսանող Միշա Դավևոսյանն էլ շեշտեց, որ բոլոր համալսարաններում ռեսուրսների հասանելիության, այդ թվում նաև գրքերի, հայալեզու մասնագիտական գրականություն դժվարամատչելիության հետ կապված խնդիրներ կան։

«Գրականության հետ կապված խնդիրներ գրեթե չկան Հայաստանում ֆրանսիական համալսարանում, սակայն մեզ մոտ էլ շենքային պայմանների խնդիր կա, քննարկումներ են գնում դրանք մեծացնելու»,- ասաց ֆրանսիական համալսարանի չորրորդ կուրսի ուսանող Դավիթ Պետրոսյանը՝ հավելելով, որ շատ խնդիրների լուծումներ էլ կախված են ուսանողի ցանկությունից։