Ձեր վստահելի աղբյուրը

Առաջիկա ընտրությունների ամենաբացասական կողմն այն է, որ չկա սկզբունք, կա պարզապես չոր նպատակ հայտնվելու խորհրդարանում,- այսօր լրագրողների հետ հանդիպմանը նման կարծիք հայտնեց ԱԺ պատգամավոր, ՀԱԿ խմբակցության քարտուղար Արամ Մանուկյանը:

«Ինձ մոտ մի տպավորություն կա, որ քաղաքական գործիչներն ու կուսակցությունները ցանկանում են մտնել քաղաքական դաշտ ցանկացած գնով: Գնացքը գնում է, ու կարևոր չէ, թե ինչպես և ում հետ դաշինքներ են կազմում, որ մտնեն այդ գնացք: Ուզում են հայտնվել մի խորհրդարանում, որտեղ վաթսուն տոկոսը ոչինչ չի անում. այդ ոչինչ չանելու մրցույթն ավելի է ուժեցացել հիմա, այսինքն՝ ծախսել միլիոններ ոչինչ չանելու համար: Կարծում եմ՝ սա շատ տխուր պատկեր է, որը բացասական արդյունքների կբերի»,- ասաց նա:

Մանուկյանի կարծիքով՝ Հայաստանի նախընտրական այս փուլում բացարձակ գաղափարական հայտեր չեղան:

«Ոչ ոք չի ասում, որ լիբերալիզմ է կամ օրինակ՝ սոցիալիզմ է քարոզելու: Բոլոր քաղաքական ուժերը ասում են, թե ինչ են ուզում, մրցույթ է գնում, թե ով ինչքան լավ բան է ուզում, և ոչ ոք չի ասում, թե ինչպես է ուզում հասնել դրան: Բոլորի մոտ խնդիրները ,«պետք է»-ով են սկսվում, նման պարզունակ քաղաքական այբուբեն կա: Ցավոք սրտի, այս ընտրական փուլը չարձանագրեց, թե ինչպես են քաղաքական ուժերը պատկերացնում Հայաստանի զարգացման իրենց մոտեցումները»,-հավելեց ՀԱԿ խմբակցության քարտուղարը: