Ձեր վստահելի աղբյուրը

- Իսկ ինչ կլինի Հայաստանին, եթե Ռուսաստանը փակի ձեր երկրի համար իր շուկան,- Deutsche Welle գործակալության լրագրողը ՀՀ ԱԳ նախարար Նալբանդյանին ուղղեց հարցազրույցի իր վերջին հարցը։ Այս հարցը միանգաից հաջորդեց Ղարաբաղի խնդրի ու ինքնորոշման մասին հարցերին:

Է. Նալբանդյան.- Փակի իր շուկա՞ն։

Լրագրող.- Այո՛, փակի իր շուկան ձեր արտահանման համար։

Է. Նալբանդյան.- Տարօրինակ հարց է։ Իսկ ինչ կլինի Գերմանիային, եթե իր բոլոր հարևանները նրա համար փակեն իրենց շուկաները։ Ինչպե՞ս։ Դուք պատկերացնու՞մ եք դա։ Ոչ, չեք պատկերացնում։

Լրագրող.- Ոչ, դա չեմ պատկերացնում, հիմա, այն ժամանակ, լավ.... Պարոն նախարար, եկեք ես իմ հարցը հիմնավորեմ։ Ռուսաստանն արդեն դա կիրառել է մի քանի երկրների նկատմամբ առանձին ապրանքների համար՝ Վրաստան, Մոլդովա։

Շարունակական հարցադրման արդունքում Նալբանդյանը խոսեց այն մասին, որ ՀՀ առևտրային հարաբերությունները բավականին տարբեր են, այլ ոչ թե միակողմանի, օրինակ՝ Հայաստանի առևտրային հարաբերությունների 1/3-ը Եվրամիության հետ է:

Այնպես չէ, որ առևտրի 99 տոկոսը միայն Ռուսաստանի հետ է,- ասաց նախարարը:

Էդվարդ Նալբանդյանի խոսքերով՝ Հայաստանը փորձում է դիվերսիֆիկացնել իր առևտրային հարաբերությունները:

Զարգացնելով առևտրային կապերը Եվրամիության հետ, մենք ոլորտային համագործակցության բանակցություններ են վարում, մասնակցում ենք ԵՄ բազմաթիվ ծրագրերի: Բայց ոչ միայն ԵՄ-ի հետ, մենք լավ հարաբերություններ ունենք ասիական, լատինամերիկյան աշխարհամասերի հետ: Զարգանում են հիանալի դինամիկ հարաբերություններ Չինաստանի, Հնդկաստանի, Ճապոնիայի, Հարավային Կորեայի հետ,- ասաց Էդվարդ Նալբանդյանը:

Լրագրողը փորձեց ճշտել. – Այսինքն՝ Ռուսաստանով աշխարհը չի՞ վերջանում։

Է. Նալբանդյան.- Չգիտես ինչու Դուք սևեռվել եք Ռուսաստանի վրա՝ աշխարհը վերջանում է, չի վերջանում։ Եվ ընդհանրապես՝ ինչ է Ռուսաստանը վատ անում...

Լրագրող.- Ես դա երբեք չեմ ասել։

Է. Նալբանդյան.- Մենք ունենք ավելի լավատեսական հայացք Ռուսաստանի, այլ երկրների հետ մեր հարաբերություններին։ Ես կարծում եմ, որ շատ ավելի լավ կլիներ, եթե բոլորը լավատեսական հայացքով նայեին ուրիշ երկրների հետ հարաբերություններին։

Շնորհակալ եմ, պարոն նախարար,-այստեղ արդեն ավարտեց հարցազրույցը Deutsche Welle գործակալության լրագրողը։