Հուպ տվեք, լավ եղեք, մենք ձեր կարիքը զգում ենք. Կարեն Կարապետյանը՝ ուսանողներին
«Հարգելի գործընկերներ, պայծառ, սիրուն, խելոք երիտասարդություն: Այս միջավայրում ինձ չափազանց լավ եմ զգում ու ուզում եմ սրտանց բոլորիդ շնորհավորել»,- այս մասին այսօր Հայաստանի ազգային ագրարային պետական համալսարանում կրթաթոշակների հանձնման ժամանակ ասաց ՀՀ վարչապետ Կարեն Կարապետյանը:
Իր ելույթում վարչապետը նշեց, որ ՀՀ կառավարությունը՝ այսօրվա թիմը, ախտորոշել է բոլոր ոլորտների խնդիրները, նեղ տեղերը, ձևակերպել տեսլական, թե ուր պետք է շարժվեն, ինչպես պետք է գնան, ինչ միջոցառումներ պետք է իրականացնեն:
«Բավականին ռեալ, պրագմատիկ նյութ ենք ներկայացրել, հորիզոնը, որը մեզ համար ձևակերպել ենք՝ շատ ամբիցիոզ է: Վստահ ենք, որ որոշ ժամանակ անց ունենալու ենք մի երկիր, որով բոլորս հպարտանալու ենք»,- ասաց Կարեն Կարապետյանը:
Վարչապետի խոսքերով՝ մեր տարածաշրջանը, այն մարտահրավերները, որոնք կան, տրանսպորտային լոգիստիկան, որն ունենք, դրդում են, պահանջում, դարձնում հրամայական՝ լինելու խելացի և կիրթ:
«Մենք ինչ անենք, պետք է անենք խելացի, գյուղատնտեսությունը խելացի, ՏՏ-ն խելացի, սպորտը խելացի, պաշտպանությունը խելացի, որևէ ոլորտ չկա, որտեղ կարող ենք թերանալ, մեզ թույլ տալ այստեղ կամ այնտեղ չլինել խելացի, ժամանակակից ու կիրթ»,- ընդգծեց վարչապետը:
ՀՀ վարչապետ Կարեն Կարապետյանը շահագրգռված է, որպեսզի երիտասարդները ցուցաբերենք քաղաքացիական ակտիվություն, մեկը մյուսի նկատմամբ լինեն հանդուժողական, սակայն լինեն անհանդուժող անարդարության նկատմամբ: Այդ մասին ՀՀ վարչապետը նշեց Հայաստանի ազգային ագրարային պետական համալսարանում կրթաթոշակների հանձնման ժամանկ ունեցած իր ելույթում:
Կարեն Կարապետյանը խոսքերով՝ չափազանց շահագրգռված է, որ այն ուղին, որն ընտրել են ուսանողները՝ գիտելիք ստանալ, կրթվել, պետք է շարունակեն:
«Դա չափազանց կարևոր է, մենք կատարել ենք հետազոտություններ, թե ինչ պետք է անել, որպեսզի մեր տնտեսությունը զարգանա: Մեր հիմնական թիրախն է՝ բոլոր ոլորտներում բարձրացնել արդյունավետությունը: Արդյունավետությունը շատ խիստ կախված է գրագիտության հետ, և կա վիճակագրություն, թե յուրաքանչյուր մեկ տարով ավելի սովորելն ինչ տոկոսով է ազդում արդյունավետության վրա: Նաև ունենք թվեր, որ կրթված զանգվածը մեր հասարակության մեջ բավականին բարձր է, բայց այն արդյունավետությունը, որ այսօր ունենք՝ չի բավարարում»,- նշեց Կարեն Կարապետյանը՝ հավելելով, որ խնդիր ու հրամայական կա բուհական համակարգը դարձնել ժամանակակից, որը կարձագանքի շուկայի պատվերներին:
«Այդ իսկ պատճառով, չափազանց շահագրգռված եմ, որ դուք շարունակեք նույն տեմպերով, չափազանց շահագրգռված եմ, որ դուք կարողանաք ձեր վերաբերմունքը գիտելիքի, ուսման նկատմամբ վարակի նման տարածել, չափազանց շահագրգռված եմ, որ դուք լինեք հայրենասեր և սիրեք ձեր երկիրը, չափազանց շահագրգռված եմ, որ դուք քաղաքացիական առումով լինեք ակտիվ, հանդուժողական մեկդ մյուսի նկատմամբ, բայց անհանդուժող՝ անարդարության նկատմամբ, չափազանց շահագրգռված եմ, որ դուք ունենաք առողջ ապրելաոճ: Մենք իրականում Հայաստանում ունենք ունիկալ շանս: Լինելով ավանդապաշտ, հարգելով մեր պատմությունը, կրթվելով, լինելով խելացի՝ լինենք բաց, տոլերանդ, և ժամանակակից: Հուպ տվեք, լավ եղեք, մենք ձեր կարիքը զգում ենք»,- ընդգծեց կառավարության ղեկավարը:
Լրահոս
Տեսանյութեր
Անահիտ աստվածուհու արձանը կցուցադրվի Հայաստանի պատմության թանգարանում պահվող բացառիկ նմուշների հետ