Րաֆֆի Հովհաննիսյանը մեղադրում է Ժոզեֆ Դոլին Հայաստանի ներքին գործերին միջամտելու համար
Հայաստանի արտաքին գործերի առաջին նախարար և «Ժառանգություն» կուսակցության առաջնորդ Րաֆֆի Կ. Հովհաննիսյանը նամակ է հղել Եվրոպական ժողովրդական կուսակցության (ԵԺԿ) նախագահ Ժոզեֆ Դոլին: «Ժառանգություն» կուսակցության մամուլի ծառայության կողմից տարածած նամակում մասնավորապես ասված է.
«Իշխող Հանրապետական կուսակցությունը հանրային հեռուստատեսությամբ և այլուր լայնորեն տարածել է հայերեն հնչյունավորված տեսաերիզ՝ Ձեր դիմապատկերով, որտեղ ենթադրաբար հաղորդվում են Ձեր աջակցությունն ու հաջողության մաղթանքը ՀՀԿ-ին և իրենց բոլոր թեկնածուներին՝ առաջիկա ընտրություններում:
Եթե դա չի համապատասխանում իրականությանը, ես ներողություն եմ խնդրում պատճառած անհարմարության համար և Ձեր ասածը ճշգրտելու նպատակով կոչ եմ անում Ձեզ անհապաղ տեսագրել երկրորդ տեսաուղերձը՝ այս անգամ հասցեագրված «Ժառանգություն» կուսակցությանը և դաշինքին, որին մաս է կազմում «Ժառանգությունը»:
Եթե, այնուամենայնիվ, Ձեզ վերագրված խոսքերի թարգմանությունը ճիշտ է, ես պետք է հարցնեմ՝ արդյոք դրանք արտահայտում են ԵԺԿ-ի պաշտոնակա՞ն դիրքորոշումը, թե՞ Ձեր անձնական կարծիքը: Ես պարտավոր եմ նաև հավելել, որ Ձեր բացահայտ համերաշխությունը մեկ քույր կուսակցությանը՝ ի հաշիվ մյուս երկուսի, էթիկայի ընդունված կանոնների կոպիտ խախտում է և ապօրինի միջամտություն Հայաստանի ներքին գործերին: Միջամտությունն ինքնին, ինչպես նաև Ձեր հաղորդագրության բովանդակությունը, ամոթալի են Եվրոպայի ու ԵԺԿ-ի համար, բոլոր նրանց համար, ովքեր եվրոպական քաղաքակրթության հնագույն ակունքներից մեկը հանդիսացող Հայաստանում ցանկանում են քարոզել եվրոպական արժեքներ և կերտել եվրոպական տիպօրինակի պետություն ու հասարակություն մեր երկրում»:
ՕՐՕ դաշինքի ներկայացուցիչը հույս է հայտնել, « վերը շարադրվածը պատշաճ կերպով կնշվի տեղական և միջազգային դիտորդական առաքելությունների, այդ թվում Ձեր սեփական զեկույցներում»:
«Դուք «Ժառանգությանը» չէ, որ արհամարհում եք: Դուք արհամարհում եք հայաստանյան ընտրողին, քաղաքացիական հասարակությանը, ԵԺԿ-ին և իր իսկ արժեքային համակարգը, այն ամենի բնորոշումն ու իմաստը, ինչը հայտնի է եղել մեզ՝ որպես Եվրոպա»,-նշել է Հովհաննիսյանը:
Հիշեցնենք, որ ՀՀԿ-ն երեկ տարածել էր ԵԺԿ նախագահի խոսքը, որտեղ նա հաջողություն էր ցանկացել ՀՀԿ բոլոր թեկնածուներին, «որպեսզի Հայաստանի Հանրապետական կուսակցությունը կարողանա շարունակել առաջնորդել ձեր երկիրը ճիշտ ճանապարհով»: