Դենիս Վորոնենկովի սպանությունը ռուս-ուկրաինական հերթական խաղաքար
Երգչուհի Մարիա Մակսակովան, Կիևի կենտրոնում օրերս սպանված Դենիս Վորոնենկովի կինը, առաջին անգամ մեկնաբանել է դեպքը։ Այս մասին գրում է «112 Ուկրաինա»-ն՝ ԶԼՄ-ներին հղումով։ Հիշեցնենք՝ Վորոնենկովը ՌԴ Դումայի նախկին պատգամավոր էր։
Կնոջ մեկնաբանությունը խիստ անձնական ու զգայական է եղել. «Ես նույնիսկ չեմ մտածի, թե ով է դա արել, ով է պատվիրել, ով է կատարել։ Ոչինչ նրան չի վերադարձնի։ Ես կմտածեմ այն մասին, որ ունեմ տղա, ով 11 ամսեկան է»։
Կինն ասել է նաև, թե չգիտե, թե ինչ պիտի անի հետո. «Ինձ համար նրանից կարևոր ոչինչ չկար։ Ես այն սահմանին եմ, թե կարո՞ղ եմ ընդհանրապես դիմանալ»։
Երգչուհին հայտնել է նաև, որ իրեն ուժեղացված հսկում են, զրահապատ մեքենայով են տեղափոխում։
Եթե նրան այսպես պահպանեին, ամեն ինչ կարգին կլիներ,-հայտարարել է այրին։
Որոշ լուրերով՝ Մարիան հղիության չորրորդ ամսում է։ Ու թեև կասկածներ չկան նրա խոսքի անկեղծության մեջ, բայց կարելի է ենթադրել, որ նման մեկնաբանությամբ կինը փորձում է վտանգը հեռացնել իրենից ու երեխայից։
Դենիս Վորոնենկովը սպանվել էր մարտի 23-ին, Կիևի կենտրոնում, «Պրեմիեր Պալաս» հյուրանոցի դռների մոտ։ Մարդասպանը նախ կրակել է հեռվից, ապա մոտեցել է ընկածին և վերահսկիչ կրակոցներ արձակել, ինչից հետո փորձել է փախչել։ Փախչելու ժամանակ Վորոնենկովի վիրավոր թիկնապահը մի քանի կրակոց է արձակել նրա հետևից և վիրավորել։
Ընթանում է քննություն։
Դենիս Վորոնենկովը ընտանիքով 2016 թվականի հոկտեմբերին տեղափոխվել էր Ուկրաինա, 2017 թվականի փետրվարին ընդունել այդ երկրի քաղաքացիությունը՝ հրաժարվելով ՌԴ քաղաքացիությունից, քննադատել ՌԴ-ին և հայտարարել, որ չի քվերակել Ղրիմի՝ Ռուսաստանին միանալու պայմանագրի վավերացման օգտին։ Նա նաև ցուցմունք էր տվել Ուկրաինայի նախկին նախագահ Վիկտոր Յանուկովիչի դեմ՝ մեղադրելով նրան պետական դավաճանության մեջ։
Քաղաքացիություն ընդունելուց մի քանի օր հետո Ռուսաստանը միջազգային հետախուզում էր հայտարարել, Վորոնենկովին մեղադրելով կեղծարարության և փողերի յուրացման մեջ։
Թե որքանով օբյեկտիվ կընթանա սպանության գործը՝ հայտնի չէ։ Ռուսաստանն արդեն հայտարարել է, թե Դենիս Վորոնենկովի սպանությունը Ուկրաինայի հատուկ ծառայություններին ձեռնտու էր, քանի որ կարող էին մեղքը բարդել Ռուսաստանի վրա, իսկ քննչական մարմինը արդեն հայտարարել է «ռուսական հետքի» մասին։