Ձեր վստահելի աղբյուրը

Վաղը տրվելու է «Երևանյան Հեռանկարներ»  միջազգային երաժշտական 18-րդ  փառատոնի մեկնարկը լեգենդար ջութակահար, կրկնակի Գրեմմի մրցանակակիր Պինկաս Ցուկերմանի ելույթով: Լագրողների հետ  հանդիպմանը «Հեռանկարներ» փառատոնի հիմնադիր նախագահ ու գեղարվեստական ղեկավար  կոմպոզիտոր Ստեփան Ռոստոմյանն ասաց, որ Հայաստանի պատմության մեջ իրենց փառատոնն ամենահինն է, և իրենք այս տարիների ընթացքում մշտապես նշաձողը պահել են նույն մակարդակի, բարձրության վրա:

«Աշխարհում շատ քիչ փառատոներ կան, որ կարող են իրենց նման շքեղություն թույլ տալ ու նման մեծագույն արտիստների հրավիրել: Սա ֆինանսական հզորությունից չի գալիս, ամբողջ աշխարհով փառատոնի անունն է, իմիջն է այս արտիստներին բերում Հայաստան: Հայաստանի մշակութային կյանքում մեծագույն նվաճում է»,- նշեց նա:

Խոսելով Պ. Ցուկերմանի մասին՝ նշեց, որ նա ուսանել է Ջուլիարդի դպրոցում՝ ավանի ուսուցիչ Իվան Գալամյանի մոտ:

«Մտածում ենք հետագայում իր հետ բացել աշխարհի ջութակի մեծագույն դասատուներից Գալամյանի դպրոցը»,- նշեց Ս. Ռոստոմյանը:

Ասուլիսին ներկա Պ. Ցուկերմանն ասաց, որ Գալամյանն անցած դարաշրջանի մեծագույն ուսուցիչներից է, ով ստեղծել է ջութակահարների փառահեղ մի սերունդ:  Հարցին, թե ի՞նչ եք սովորել Գալամյանից, ի՞նչ եք քաղել իր դասընթացներից, ջութակահարն ասաց. «Երեք տարուց ավելի սովորել եմ իր մոտ:   Հանճարեղ, պարզ ձևով ներկայացում էր մեզ ամենաբարդ բաները: Պարզունակ ձևով տալիս էր գիտելիքներ, ինչպես պետք է աղեղը շարժվի աջ ձեռքում: Պարզ է շատ, միաժամանակ բարդ, 2-4 տարի է տևում մինչև ուղեղն ընկալում է այդ շարժումը: Գալամյանը պարզ, մատչելի էր դարձնում այդ տեխնոլոգիան՝ մի օր արթնանում ես և դա ստացվում է:

Էմոցիաներն ամբողջությամբ մի կողմ էր դնում, չորս տարի չոր սովորեցնում էր ձեռքի ճիշտ աշխատանք: Իր մեծարժեք խորհուրդները փոխանցում ենք մեր սերունդներին, իր խորհուրդներից օգտվում են նաև շատ հայտնի թավջութակահարներ»:

Նշենք, որ Պ. Ցուկերման նվագել է հայազգի 15-ամյա ջութակահարուհի Դիանա Ադամյանի հետ իր իսկ կողմից ղեկավարվող Լոնդոնի թագավորական ֆիլհարմոնիկ նվագախմբի հետ Լոնդոնի Կադոգան համերգասրահում՝ Հայոց ցեղասպանության 100-րդ տարելիցը հիշատակող «Քեզ հետ, Հայաստան» համերգին: Պատասխանելով հարցին, թե այդ համերգաշարի շրջանակում ելույթ են ունեցել աշխարհում հայտնի մոտ երկու տասնյակ երաժիշտներ,  բոլորը դատապարտել են Հայոց ցեղասպանությունը, այդյո՞ք Ձեր մասնակցությունը նշանակում է, որ Դուք էլ մյուս երաժիշտների նման դատապարտում եք Հայոց ցեղասպանությունը, Պ. Ցուկերմանն ասաց. «Երաժշտությունը ցանկացած դեպքում սպեղանի է՝  լինի Ցեղասպանություն, որևէ հիվանդություն, պարզապես ցավ: Ցանկացած դեպքում, երբ ունենք մի վերք, որն ապաքինման կարիք ունի, անդրադառնում ենք կրոնին, երաժշտությանը:  Քաղաքական գործիչներն ու երաժիշտները  պետք է իրարից շատ հեռու մնան,  քաղաքական գոծիչները չթելադրեն իրենց կամքը մեզ, մենք էլ մեր կամքը՝ իրենց, չասնեք, թե ինչպես վարվեն:

Աշխարհում այսօր 20 միլիոնից ավելի փախստական կա, մեծագույն  ցավերից մեկն է: Երևի պետք է փորձենք արվեստի, մեծագույն մարդկանց խոսքերի միջոցով լուծում տանք այդ խնդրին»:

Վաղվա համերգին Պինկաս Ցուկերմանը հանդես կգա թավջութակահարուհի Ամանդա Ֆորսայտի և Հայաստանի ազգային ֆիլհարմոնիկ նվագախմբի հետ դիրիժոր Էդուարդ Թոփչյանի ղեկավարությամբ: Ծրագրում կհնչեն` Յոհաննես Բրամսի Կրկնակի կոնցերտը ջութակի և թավջութակի համար Լյա մինոր և նույն հեղինակի Թիվ 4 Սիմֆոնիան:

Ամանդա Ֆորսայտը  եղել է երաժշտի ուսանողը, այնուհետև՝ կինը: Ամանդա Ֆորսայտն ասաց, որ դժվար չէ լինել մեծագույն երաժշտի ուսանողը, ապա նաև կինը:

Պինկաս Ցուկերմանը ծնվել է 1948 թ. Թել-Ավիվում: Նրա լայնածավալ դիսկոգրաֆիան ընդգրկում է ավելի քան 100 անուն: 21 անգամ եղել է Գրեմմի մրցանակի թեկնածու, երկու անգամ՝ մրցանակակիր: