Արա Բաբլոյան. Կոչ եմ անում` վստահենք մեր նախագահին, մեր վարչապետին,մեր ապագային
«Առողջապահության կազմակերպիչների միավորում» հասարակական կազմակերպությունը 2017 թվականի ապրիլի 2-ին կայանալիք խորհրդարանական ընտրություններին իր վստահության քվեն տալու է Հայաստանի Հանրապետական կուսակցությանը: Այս մասին որոշումն ընդունվեց «Առողջապահության կազմակերպիչների միավորում» ՀԿ-ի խորհրդի նիստում:
«Հավատարիմ մնալով Հայաստանի առողջապահական համակարգի շարունակական զարգացման մեր որդեգրած նպատակներին՝ հանուն քաղաքացու առողջության պահպանման, առողջ ապրելակերպի արմատավորման և երկրի կայուն զարգացման, կարևորում և ընդունում ենք ՀՀԿ-ի նախընտրական ծրագրով առաջարկվող առողջապահական բարեփոխումները և հայտարարում, որ 2017 թ-ի ապրիլի 2-ին կայանալիք խորհրդարանական ընտրություններին մեր վստահության քվեն տալու ենք ՀՀԿ-ին և նրա թեկնածուներին»,- հայտարարեց ՀԿ-ի գործադիր տնօրեն Սմբատ Դաղբաշյանը:
ԱԺ պատգամավոր, ՀՀԿ-ի համամասնական ցուցակի չորրորդ համարը զբաղեցնող Արա Բաբլոյանը նշեց, որ այսօր Հայաստանը կանգնած է լուրջ վերափոխումների առջև: «Բոլորիս երազանքն է ստեղծել զարգացած, արդար և անվտանգ պետություն: Մենք՝ բժիշկներս լավ գիտենք, որ ազգաբնակչության առողջության պահպանումը հանդիսանում է հասարակության զարգացման և ազգային անվտանգության հիմնական երաշխիքներից մեկը: Մենք մեր կարևոր դերն ու տեղն ունենք մեր պետության կայացման, անվտանգության և առաջընթացի գործում, բայց մենք չենք կարող հասնել մեր նպատակներին, եթե չզարգացնենք ժողովրդավարությունը, մեր տնտեսությունը: Այդ առումով, ցանկանում եմ հատուկ նշել, որ ՀՀԿ-ն կարողացավ ամփոփել անցած տարիների ճանապարհը, ճիշտ գնահատել դրականը և վերլուծել բացթողումները: ՀՀԿ-ն կարողացավ կոտրել կարծրացած մոտեցումները, իրականացնել հստակ քայլեր ավելի զարգացնելու ժողվորդավարությունը, համալրել իր շարքերը նոր, բանիմաց մարդկանցով ու լայն ճակատով գնալ առաջ»,- ասաց Արա Բաբլոյանը:
Նրա խոսքերով՝ այսօր բոլորն էլ, հավանաբար, հետևում են ՀՀ նախագահի գործունեությանը, ստորագրված տարբեր համաձայնագրերին ու պայմանագրերին և, կարելի է ասել, որ Հայաստանը միակն է՝ լինելով ԵԱՏՄ անդամ երկիր, ակտիվ զարգացնում է հարաբերությունները ԵՄ-ի հետ: Նա նաև անդրադարձավ վարչապետ Կարեն Կարապետյանի` տնտեսության զարգացմանը, ներդրումների խթանմանն ու կաշառակերության վերացմանն ուղղված քայլերին :
«Ինչ վերաբերում է ՀՀԿ-ի նախընտրական ծրագրում առողջապահության զարգացման ծրագրին, ապա այն միակն է բոլոր կուսակցությունների շարքում, որը համալիր բնույթ է կրում, ընդգրկում է հանրային առողջության, առողջապահության առաջնային պահպանման, հիվանդանոցային ու մասնագիտական բժշկական օգնության, բժշկական կրթության, բժշկական ծառայությունների որակի բարելավման, ինչպես նաև առողջապահական ապահովագրության խնդիրներ: Ես կոչ եմ անում` վստահենք մեր նախագահին, վստահենք մեր վարչապետին, վստահենք մեր ապագային և ապրիլի 2-ին ձայն տանք Հանրապետական կուսակցությանն ու իր կողմից լիազորված առողջապահության բնագավառի ռեյտինգային թեկնածուներին», - ասաց Արա Բաբլոյանը:
Առողջապահության ազգային ինստիտուտում հավաքված առողջապահության ոլորտի ներկայացուցիչները փաստեցին, որ իրենց գլխավոր խնդիրը ազգաբնակչության առողջության պահպանումն ու ոլորտում առկա խնդիրների լուծումն է:
«Սուրբ Աստվածամայր» ԲԿ-ի տնօրեն Նիկոլայ Դալլաքյանը, ով առաջադրված է ՀՀԿ ցուցակով, նշեց, որ վիրաբուժությանը զուգահեռ կատարում է առողջապահության կազմակերպչի ֆունկցիաներ: Այսօր, ըստ նրա, առողջապահության ոլորտում կուտակվել են շատ խնդիրներ, որոնք միայն գործադիր մարմնի լուծելիքը չէ, օրենսդրական դաշտում ևս լուրջ բարեփոխումների կարիք կա:
«Լուրջ մտորումներից հետո, խիզախություն ունեցա մասնակցելու խորհրդարանական ընտրություններին, որպեսզի գիտելիքներս ու փորձս` հատկապես արտասահմանում ձեռք բերած, ներդնել ՀՀ առողջապահության ոլորտի զարգացման գործում, մասնավորապես` ինձ համար թանկ մանկաբուժության ոլորտում»,- ասաց Նիկոլայ Դալլաքյանը:
«Իզմիրլյան» բժշկական կենտրոնի տնօրեն Արմեն Չարչյանն էլ նշեց, որ իր մասնագիտությունը թույլ է տալիս վեր գտնվել ցանկացած կուսակցական հարցերից, սակայն դա բնավ չի նշանակում, որ չունի իր նախասիրությունները, չունի իր ընտրությունը, իր դիրքորոշումը: «Ուստի բոլորին կոչ եմ անում մասնակցել ընտրություններին, քանի որ պասիվ դիրքորոշումը պարտություն է ի սկզբանե: Գնալով ընտրություններին՝ քվեարկեք ձեր խղճի կամոք, այն ուժի օգտին, որն այսօր ամենակենսունակն է, կարող է կերտել մեր և մեր երեխաների ապագան»,- ասաց Արմեն Չարչյանը՝ հավելելով, որ իր կարծիքով՝ այդ ուժը ՀՀԿ-ն է: