Ձեր վստահելի աղբյուրը

«Մենք մեր համերգներին անընդհատ կատարում ենք հայ ժամանակակից կոմպոզիտորների ստեղծագործություններ, բայց միշտ հարց է հնչում՝ ինչո՞ւ այսօր չի կատարվում ժամանակակից կոմպոզիտորների ստեղծագործություններ: Ոչ ոք չի գալիս լսելու»,- լրագրողների հետ հանդիպմանն ասաց Հայաստանի ազգային ֆիլհարմոնիկ նվագախմբի  գեղարվեստական ղեկավար և գլխավոր դիրիժոր Էդուարդ Թոփչյանը՝  պատասխանելով հարցին, թե ի՞նչ է արվում այսօր ժամանակակից հայ  կոմպոզիտորների աշխատանքները հնչեցնելու համար: 

Դիրիժորի խոսքով, ստեղծագործությունների մի մասը հետաքրքրի են ու լավը, մի մասը՝ միջակ, մի մասն էլ շատ վատը՝ «լինում են այնպիսի գործեր, որ շունն ուտի, կսատկի». «Հետաքրքիր ստեղծագործություններն էլ չեն գալիս լսելու, դրանք ընկնում են «հետաքրքիր չի»-ի տակ»:

«Նույնիսկ կոմպոզիտորները չեն գալիս  այդ համերգներին, այդ ստեղծագործությունները լսելու: Իրենց հետ խոսել եմ այդ մասին: Միությունը իսկական միություն պետք է լինի: Խորհրդային տարիներին կոմպոզիտորները լսում են իրար ստեղծագործությունները, կարծիքներ հայտնում, զարգացնում: Աշխարհում էլ է այդպես. հավաքվում է կոմպոզիտորների խումբը, լսում, քննարկում, լավ, նույնիսկ վիրավորական խոսքեր ասում: Այդպես է զարգանում երաժշտությունը: Հիմա կատարում ենք մի համերգին 4 կոմպոզիտորի գործ, առաջինն իր գործի կատարումից հետո գնում է բուֆետ կոֆե խմելու: Չի կարող այսպիսի բան լինի ու ժամանակակից երաժշտությունը զարգանա:
Մենք նվագում ենք, բայց մեր կոմպոզիտորների ներկայությունն անհրաժեշտ է: Նախ իրենք պետք է իրենց հարգեն, մտածեն՝ ինչպես անել, որ հայկական ժամանակակից կոմպոզիտորների արվեստն ավելի բարձրանա: Իրենք իրենց քննարկումներով պետք է դա բարձրացնեն, ընտրված գործն էլ տան, որ կոլեկտիվը կատարի»,- ասաց Է. Թոփչյանը:

Ասուլիսին ներկա Բավարիայի պետական օպերային թատրոնի հյուր դիրիժոր Կարեն Դուրգարյանը խոսեց աշխարհի տարբեր բեմերում հնչող հայկական երաժշտության մասին:

«Այն հայ արտիստները, ովքեր ժամանակ առ ժամանակ ելույթ են ունենում եվրոպական, ամերիկյան բեմերում, անպայման փորձում են հայ կոմպոզիտորի գործ ներառել իրենց ծրագրում: Դրանք փորձեր են: Հավատացեք՝ աշխարհում որևէ մեկը չի ճանաչում Սպենդիարյանին, Ղազարոս Սարյանին,  Խաչատրյանին քչերը գիտեն: Բայց նրանք մեր երաժշտության հիմքն են: Սովետական ժամանակաշրջանից հետո դռները նոր են բացվել հայ արտիստների համար, որպեսզի ներխուժեն դեպի եվրոպական բեմահարթակ: Սովետի ժամանկ փակ էին այդ դռները: Երկարատև պրոցես է, 25 տարին պրոպագանդելու համար շատ քիչ է»,- ասաց նա: