Ձեր վստահելի աղբյուրը

2016-ին ջրծաղիկի հիվանդացության դեպքերը նախորդ տարվա համեմատ բավականին բարձր են:

«Եթե 2014 թվականի հոկտեմբերի 2-8-ն ընկած ժամանակահատվածում 100 հազար բնակչի հաշվով ցուցանիշը կազմել է 97, ապա  2016-ին եղել է  170»,-Panorama.am-ի հետ զրույցում ասաց Առողջապահության նախարարության վտանգավոր և օդակաթիլային վարակների համաճարակաբանության բաժնի պետ Լիանա Թորոսյանը:

Ազգային վիճակագրական ծառայության հաղորդմամբ, Հայաստանում այս տարվա առաջին երկու ամիսներին գրանցվել է է ջրծաղիկի հիվանդացության  2 695 դեպք, որից   864-ը՝ փետրվարին:  Համեմատության համար նշենք, որ 2016-ի հունվար-դեկտեմբերին գրանցվել է ջրծաղիկի հիվանդացության 14 181 դեպք, միայն դեկտեմբերին՝ 2 301 դեպք:

Առողջապահության նախարարության ներկայացուցիչն ասում է, որ ցուցանիշների նման աճը, ոչ  թե հիվանդության  բռնկման արդյունք է, այլ հաշվառման համակարգի բարելավման:

«Բոլոր դեպքերն այսօր անպայման ենթարկվում են հաշվառման:  Հիվանդացության բարձրացումը պետք է բազմակողմանիորեն քննարկել, միշտ էլ  հիվանդությունը եղել է, բայց հիմա համակարգն է կատարելագործվել, յուրաքանչյուր դեպքի մասին նախարարությունը տեղեկանում է»,-ասաց նա:

Թորոսյանի խոսքով, արդեն այս տարվա երեք ամիսներին արձանագրած ցուցանիշները նույնն են,  ինչ  եղել են 2016-ի, 2015-ի առաջին երեք ամիսներին, իսկ 2014-ի նույն ժամանակահատվածի համեմատ նվազել են 1.5 անգամ:

«Եթե համեմատելու լինեն 2016-ի նոյեմբեր-դեկտեմբեր ամիսների և ապրիլի անցած շաբաթների ընթացքում գրանցված հիվանդացության ցուցանիշները, ապա հիվանդացությունը երեք անգամ նվազել է»,-ասաց Թորոսյանը:

ԱՆ ներկայացուցիչը չի բացառում, որ կլինեն մարդիկ, ովքեր հիվանդացության դեպքում բժշկի չեն դիմի, դա կարող է կազմել 5 տոկոս:

«Նույնիսկ այդ 5 տոկոսը հաշվի առնելով իրավիճակն այդպիսին է, այո, մենք 2016-ին ունեցել ենք հիվանդության աճ, բայց հիմա գրանցում ենք նվազում: Օրինաչափ է, հարուցիչը միշտ շրջանառում է բնության մեջ»,-ասաց նա:

Առողջապահության մասնագետը հիշեցնում է, որ ջրծաղիկը գրեթե 100 տոկոս վարակելիությամբ հիվանդություն է, նրան բնորոշ է սեզոնայնությունը, դրա դեմ որևէ պատվաստանյութ չկա, այն ախտահանում էլ չի պահանջում: Նա խորհուրդ է տալիս հիվանդանալու դեպքում անպայման դիմել բժշկին:

«Այս հիվանդությունը կա և լինելու է, սեզոնային պարբերական բարձրացումներով: Անկառավարելի է, պատվաստման ենթակա հիվանդություն չէ: Ջրծաղիկը մանկական ինֆենկցիա է, հիմնականում հիվանդանում են երեխաները, մեծահասակների մոտ այս հիվանդությունն ընթանում է բավականին բարդություններով»,-ասաց նա:

Թորոսյանը, վկայակոչելով գիտական աշխատություններն ու միջազգային գրականությունը, նշում է, որ ջրծաղիկը տալիս է ցմահ իմունիտենտ, այսինքն մեկ անգամ հիվանդանալու դեպքում երկրորդ անգամ չեն հիվանդանում: 

«Պետք է հասկանալ, դա եղել է ջրծաղի՞կ, թե այլ վարակիչ հիվանդություն: Այսօր մենք ունենք լաբորատոր լուրջ կարողություն: Մենք կարողանում ենք 24 ժամվա մեջ տարբերել՝ սա ջրծաղիկ է, թե մեկ այլ վարակիչ հիվանդություն, քանի որ վարակիչ հիվանդություններն իրենց արտահայտման ձևերն էլ են փոխել»,-բացատրեց մասնագետը: