Շինարարները հավաստիացրել են, որ ներկայումս աշխատում են 07:00-ից մինչև 19:00-ն
ՀՀ տրանսպորտի, կապի և տեղեկատվական տեխնոլոգիաների նախարար Վահան Մարտիրոսյանն ապրիլի 26-ին այցելել է «Հյուսիս-հարավ ճանապարհային միջանցքի ներդրումային ծրագրի» Տրանշ 1-ի Երևան - Արտաշատ ճանապարհահատված, որտեղ ընթացքի մեջ է կամուրջների և ուղեանցերի շինարարությունը:
Ինչպես տեղեկացնում են Տրանսպորտի, կապի և տեղեկատվական տեխնոլոգիաների նախարարությունից, ներկայում կամուրջներին հարող հատվածներում երթևեկությունը միակողմանի փակ է կամ կազմակերպված է շրջանցող ուղիներով:
Նախարարը կանգ է առել յուրաքանչյուր կամրջի մոտ, ծանոթացել կատարվող աշխատանքին, ճշգրտել ժամկետները:
Այնթապ համայնքին հարող կամրջի շինարարներին ասել է, առաջիկայում պատրաստվում են բացել փակ երթևեկելի գոտին և աշխատանքները շարունակել` մյուս գոտին փակելով: Նրանք հավաստիացրել են, աշխատում են առավելագույն արագությամբ. Խոստացել են մայիսի 25-ին երթևեկությունը բացել, իսկ սեպտեմբերին ավարտել ամբողջ շինարարությունը:
Կապալառուները ժամկետներ խոստացել են, իսկ նախարարն էլ շեշտել է՝ հնարավորության դեպքում ժամկետից շուտ, բայց ոչ մի օր ուշ: «Երկկողմանի երթևեկությունը պետք է վերականգնել»,- շեշտել է նախարարը:
Բուրաստան համայնքին հարող կամրջի տակ երկկողմանի երթևեկն արդեն վերականգնված է, մյուս շինարարական աշխատանքները կշարունակվեն արդեն բաց երթևեկության պայմաններում: Աշխատանքի արագությունն ու որակն անշուշտ առաջնային են, բայց առավել կարևոր է երթևեկողների անվտանգությունը: Նախարարը հրահանգել է հետևել բավարար լուսավորության ու զգուշացնող նշանների առկայությանը:
Վահան Մարտիրոսյանն անդրադարձել է նաև կառավարության նիստում վարչապետի հնչեցրած նկատողությանը, որ շինհրապարակներում աշխատողներ չեն լինում: Շինարարները հավաստիացրել են, որ ներկայում աշխատում են 07:00-ից մինչև 19:00:
Նախարարը նաև աշխատանքային պայմաններով է հետաքրքրվել և առաջարկել է ներկայացնել առկա խոչընդոտները: Շինարարները նշել են, որ որևէ դժգոհություն չունեն և իրենք էլ շահագրգռված են օր առաջ ավարտելու շինարարությունը:
«Այսօրվա տեմպերից գոհ եմ, շինարարները խոստանում են, որ մինչև մայիսի վերջը 8 կամուրջներից 6-ի տակ երկկողմ երթևեկությունը կբացվի, ըստ տեմպերի ես էլ տեսնում եմ, որ կհասցնեն: Շինարարական բոլոր աշխատանքները պայմանագրով նախատեսված է ավարտել մինչև տարեվերջ, բայց շինարարների հետ համաձայնության ենք եկել, որ մինչև սեպտեմբերի վերջն ավարտեն»,- նշել է Վահան Մարտիրոսյանը:
Նախարարը թեև աշխատանքների ընթացքից գոհ է, բայց շարունակելու է հետևողական լինել: Նա զգուշացրել է բոլոր կապալառուներին` այցերը հաճախակի են լինելու, որակի վերահսկողությունը` մշտական: