Ամերիկյան «Կոնտուր Գլոբալ» ընկերությունն ուզում է ՀՀ-ում այլ ներդրումներ էլ կատարել. Փոխնախարար
«Իրականացվող բարեփոխումները, ներդրումային ծրագրերն արդեն այն տիպի արձագանք են ստացել, որ ամերիկյան ընկերություններ են եկել Հայաստան, ուզում են առավել մոտիկից ծանոթանալ ու ներդրումներ կատարել վերականգնվող էներգետիկայի ոլորտում»,- վերականգնվող էներգիայի հեռանկարներին նվիրված համաժողովում լրագրողների հետ զրույցում ասաց ՀՀ էներգետիկ ենթակառուցվածքների և բնական պաշարների փոխնախարար Հայկ Հարությունյանը:
Նա նշեց, որ իրենք ներկայացնելու հստակ ծրագրեր ունեն: Փոխնախարարարն ասաց, որ արդեն մեկնարկել է 55 մեգավատ արևային կայանի մրցույթը, նախաորակավորման փուլն է:
«Կարելի է ասել այն փաթեթներից, որոնք գնել են մասնակցելու համար, բավականին ակտիվ մրցույթ ենք ունենալու, բավականաչափ մեծ քանակությամբ մասնակից ենք ունենալու աշխարհի տարբեր ծայրերից, ներառյալ ԱՄՆ-ից»,- տեղեկացրեց Հ. Հարությունյանը:
Նրա խոսքով, 55 մեգավատ կայան կառուցելու համար միջինը մոտ 50 միլիոն դոլարի ներդրում է պետք:
Հարցին, թե որքանո՞վ է գրավիչ Հայաստանն ամերիկյան ներդրողների համար, ի՞նչ քայլեր են արվել, որ էներգետիկ ոլորտում ներդրումներ կատարելու համար դաշտն ազատ լինի, Հ. Հարությունյանն ասաց, որ դաշտը բավականին գրավիչ է, քանի որ կա կանխատեսելի կագավորման դաշտ, ֆինանսապես արդեն ստաբիլ էներգետիկ համակարգ, հստակ մշակված ներդրումային ծրագրեր, օրենքով նախատեսված երաշխիքներ շուկայի համար. «Եթե շուկան երաշխավորված է առնվազն 15-20 տարի, ռեսուրսը լավն է, կարգավորման դաշտը լավն է, օրենսդրական մեխանիզմները ներդրումային պաշտպանության տեղ ունեն, կարելի է ասել իդեալական պայմաններ են»:
Խոսելով «Որոտանի կասկադ» ՀԷԿ-ներդրումային ծրագրի մասին, որը վաճառվել է ամերիկյան «Կոնտուր Գլոբալ» ընկերությանը, փոխնախարարան ասաց, որ ներդրումային ծրագիրը մոտ 70 միլիոն դոլար է, հիմնականում ուղղված է լինելու հիդրոտեխնիկական սարքավորումների ամբողջական փոխարինմանը. «Ունենք սարքավորումներ, որոնք 30 տարուց ավելի աշխատում են, ժամանակն է փոխարինելու: Այս ներդրումային ծրագիրն իրականացնելուց հետո կունենանք ամբողջովին նոր Որոտանի հիդրոէլեկտրոկայանների համակարգ: Այս տարի արդեն պետք է սկսվեն աշխատանքները: Առավելագույնը 2-3 տարվա ծրագիր է»:
Հ. Հարությունյանն ասաց, որ «Կոնտուր Գլոբալ» ընկերությունն ուզում է այլ ոլորտներում էլ ներդրումներ կատարել, քննարկում են հողմային, արևային էներգետիկայի ոլորտները:
«Իմ կարծիքով՝ սա էլ մեկ այլ հաջողության գրավական է, որ մեկ այլ ծրագրով մտել են, հիմա ուզում են շարունակել»,- ասաց էներգետիկ ենթակառուցվածքների և բնական պաշարների փոխնախարարը:
Նշենք, որ համաժողովը կազմակերպել են ՀՀ էներգետիկ ենթակառուցվածքների և բնական պաշարների նախարարության ու Կոնտուր Գլոբալ ընկերության հետ համատեղ: Համագործակցության հնարավոր ուղիները քննության առնելու համար մեկ հարկի տակ հավաքվել էին վերականգնվող էներգիայի մի քանի առաջատար ամերիկյան ընկերությունների ներկայացուցիչներ և շուրջ 70 հայկական ընկերություններ: Համաժողովին իրենց փորձը ներկայացնելու և Հայաստանում առկա գործարար հնարավորություններին ծանոթանալու համար ներկայացուցիչներ էին գործուղել յոթ ամերիկյան ընկերություններ՝ Հանիվել Բիլդինգ Սոլյուշենս, Հանիվել Սմարթ Էներջի, ՄաքԼին Փաուեր Սիսթեմզ, Ֆերսթ Սոլար Փաուեր Սոլյուշենս, Կատերպիլար, Ջեներալ Էլեկտրիկ և Կոնտուր Գլոբալ:
Հարակից հրապարակումներ`
- Ռ. Միլլս. ՀՀ-ում կան էներգաարտադրման կարողություններ
- Կառավարությունը հավանություն տվեց Որոտանի գործարքի նոր պայմանագրին
- Հեֆֆերն. «Որոտան» ՀԷԿ-ի գործարքը մինչ օրս ԱՄՆ ամենախոշոր ներդրումը կլինի Հայաստանում
- ԱՄՆ դեսպան. Մենք լիովին սատարում ենք «Որոտանի» գործարքի բարեհաջող ավարտին
Լրահոս
Տեսանյութեր
Փաշինյան, «5-րդ շարասյուն», ներսի ցեցեր. Ըստ քաղաքացիների՝ ՀՀ-ի անվտանգության հիմնական սպառնալիքները