Ձեր վստահելի աղբյուրը

«Գործարարությամբ զբաղվելը 2017-Հավասար հնարավորություն բոլորի համար» զեկույցի համաձայն` Հայաստանը 190 երկրների շարքում նախորդ տարվա արդյունքների (43-րդ տեղ) համեմատությամբ բարելավել է իր դիրքը 5 կետով` բարձրանալով 38-րդ տեղը: Առաջընթաց է արձանագրվել «Վարկերի ստացում» (22 կետով), «Պայմանագրերի կիրարկում» (7 կետով) և «Էլեկտրականության միացում» (9 կետով) ցուցիչների մասով:

Ինչպես այսօր լրագրողների հետ հանդիպման ժամանակ ասաց ՀՀ տնտեսական զարգացման և ներդրումների նախարարի տեղակալ Տիգրան Խաչատրյանը,  Հայաստանում ձեռնարկատիրությամբ զբաղվելու համար բարենպաստ պայմաններ ապահովելու նպատակով 2008 թվականից,  յուրաքանչյուր տարի ՀՀ կառավարության կողմից հաստատվում են գործարար միջավայրի բարելավման միջոցառումների  տարեկան ծրագրեր:

Նրա խոսքերով,  նախարարության խնդիրն է` ապահովել բարեփոխումների անընդհատությունը` հաշվի առնելով միջազգային լավագույն փորձը, և ապահովել ՀՀ դիրքի հետագա առաջխաղացումը Համաշխարհային բանկի «Գործարարությամբ զբաղվելը» զեկույցում:

Նշենք, որ զեկույցը գնահատում է այն կարգավորումները, որոնք ուղղակիորեն ազդում են գործարար միջավայրի վրա` հնարավորություն տալով իրականացնել միջերկրային համեմատություններ հետազոտված 190 երկրների միջև հետևյալ 10 ոլորտներում` ընկերությունների հիմնում, շինարարական թույլտվությունների ստացում, սեփականության գրանցում, վարկերի ստացում, էլեկտրականության միացում, ներդրողների պաշտպանություն, հարկերի վճարում, արտաքին առևտուր, պայմանագրերի կիրարկում, սնանկության ճանաչում:

Տիգրան Խաչատրյանի խոսքերով՝ իրականացված միջոցառումների արդյունքում վերջին տարիներին էական առաջընթաց է գրանցվել մի շարք ուղղություններով, որոնք իրենց արտացոլումն են գտել նաև Համաշխարհային բանկի և Միջազգային ֆինանսական կորպորացիայի գնահատումներում:

«Իհարկե 38-րդ հորիզոնականը մեզ չի բավարարում, մենք գիտենք, թե որտեղ պետք է մեր դիրքերը բարելավենք: Հայաստանի գործարար միջավայրի բարելավման 2017 թվականի միջոցառումների ծրագրում ներառված են այնպիսի քայլեր, որոնք կնպաստեն թույլ դիրքերում գտնվող ցուցանիշների բարելավմանը»,- ասաց Տիգրան Խաչատրյանը:

Փոխնախարարի խոսքերով՝ Հայաստանը բարենպաստ դիրքերում է պետական գույքի նկատմամբ իրավունքների պետական գրանցման ընթացակարգերի, կազմակերպությունների գրանցման, վարկերի ստացման և  պայմանագրերի կիրառման առումով: 

«Թույլ ենք միջազգային հաշվետվությունների, սնանկացման վարույթների,  այսինքն՝ առողջացման համար նախատեսված ընթացակարգերի առումով, ինչպես նաև քաղաքաշինական թույլտվությունների ստացման ու էլեկտրականության միացման առումով, այսինքն՝ այն ծառայություններով, որոնք նոր ստեղծվող բիզնեսի համար ապահովում են շինարարական թույլտվության ստացման  և հանրային ծառայություններին միանալու ընթացակարգերը: Այս վերջին չորսը մեզ համեմատաբար մտահոգվելու տեղիք են տալիս, և այս առումով անելիքներ ունենք»,- ասաց նա:

Տիգրան Խաչատրյանը միաժամանակ նշեց, որ ծրագրով սահմանված միջոցառումների իրականացման արդյունքում ակնկալվում է առաջին հերթին թեթևացնել այլ երկրների համեմատությամբ կատարելագործման մեծ պոտենցիալ ունեցող ոլորտներում առկա վարչարարական և ֆինանսական բեռը` միաժամանակ ապահովելով վերջին տարիներին հաջողություններ գրանցած ոլորտների զարգացումը:

Բացի այդ, նախագծով սահմանվող միջոցառումների իրականացման արդյունքում կնվազի պետական և համայնքային մարմինների հետ շփման վարչարարական բեռը, կկրճատվեն կոռուպցիոն ռիսկերը, կբարձրացվի գործարարներին ծառայություններ մատուցող մարմինների գործունեության թափանցիկությունը: Արդյունքում` ակնկալվում է նաև Համաշխարհային բանկի «Գործարարությամբ զբաղվելը» զեկույցում ՀՀ դիրքը 190 երկրների շարքում 38-րդ տեղից, այլ հավասար պայմաններում, բարելավել 12 կետով՝ հասնելով 26-րդ հորիզոնականը: