Ձեր վստահելի աղբյուրը

Նախորդ տարի Կենտրոնական ընտրական հանձնաժողովը 58  միլիոն 949 հազար դրամ ծախսել է դասընթացների կամակերպման համար: Ազգային ժողովում «ՀՀ 2016թ. պետական բյուջեի կատարման մասին» տարեկան հաշվետվության քննարկմանն ասաց ԿԸՀ նախագահ Տիգրան Մուկուչյանը:

Նա նշեց, որ 2016-ին ընդունվել էր նոր Ընտրական օրենսգիրք, ինչը նշանակում էր նոր դասընթացների կազմակերպում. «Մասնագիտացված դասընթացներին մասնակցելը, ստուգարք հանձնելը, վկայական ունենալը պարտադիր պայման էր հետագայում տեղամասային ընտրական հանձնաժողովների կազմերում նշանակումներ կատարելու համար: 2017 համապետական ընտրություններ էին նախատեսված, ինչը նշանակում էր, որ 2016-ին դասընթաների կազմակերպումը անհրաժեշտ էր»:

ԿԸՀ նախագահի խոսքով, 2016-ին անցկացվել են ՏԻՄ ընտրություններ, ծախսվել է 1 միլիարդ 253 միլիոն 739 հազար դրամ:

Տ. Մուկուչյանն ասաց, որ պահուսային ֆոնդից ծախերը կազմել են 89 միլիոն դրամ, որի մի մասը նախատեսված է եղել նոր Ընտրական օրենսգրքի պահանջների պահպահմանը:

«Մասնավորապես, 2017-ին անցկացվելու էին համապետական ընտրությունները, իսկ Ընտրական օրենսգրքով նախատեսված էին մի շարք իրավակարգավորումներ: Գումարը ծախսվել է նոր տեխնիկա ձեռք բերելու և տարածքային ընտրական հանձնաժողովներին տրամադրելու համար: Խոսքը վերաբերում է  համակարգչային տեխնիկայի, ծրագրային ապահովման միջոցների ձեռքբերմանը»,- նշեց նա:

ԿԸՀ նախագահը նաև ասաց, որ 2016-ին ութ համայնքում, որից երեքը խոշորացված, անցկացվել են ՏԻՄ արտահերթ ընտրություններ, պահուստային ֆոնդից 30 միլիոնը ծախսվել է հենց այդ ընտրությունների կազմակերպման վրա: 

Պատասխանելով ԱԺ «Ելք» խմբակցության պատգամավոր Մանե Թանդիլյանի հարցին, թե խոշորացված համայնքներում ընտրությունների անցկացումը լրացուցիչ ի՞նչ ծախսեր են առաջացրել, Տ. Մուկուչյանն ասաց, որ պահուսային ֆոնդից հատկացված 30 միլիոն գումարը ծախսվել է հենց այդ ութ համայնքում արտահերթ ընտրությունների վրա, որից երեքը, ինչպես նշվեց, խոշորացված համայնքներն էին:

«Այսօրվա գործող կանոնակարգումների համաձայն, ինչպես որ բնակավայրերում ունեցել ենք տեղամասեր, խոշորացման ժամանակ բնակավայրերում նույն ձևով կազմակերպվում են այդ տեղամասերը»,- նշեց ԿԸՀ նախագահը: 

«Իմ հասկանալով, փաստորեն, լրացուցիչ, ավելի կամ պակաս ծախս չի նախատեսվում, երբ որ խոշորացվում է»,- հարցրեց Մանե Թանդիլյանը:

Տ. Մուկուչյանն ասաց, որ այսօրվա կանոնակարգումների համաձայն, իհարկե, ոչ: