Ձեր վստահելի աղբյուրը

ՀՀ պաշտպանության նախարարից այսօր լրագրողները հետաքրքվեցին, թե  ինչո՞ւ պաշտոնյաների երեխաներն այդպես էլ չեն հայտնվում առաջնագծում։

Նախարարն ասաց, որ կան օբյեկտիվ և սուբյեկտիվ մի շարք հանգամանքներ. «Օբյեկտիվն այն է, որ քաղաքաբնակ քաղաքացին, առավել հավանական է, որ հայտնվի բարձրագույն ուսումնական հաստատությունում և զորակոչվի այնտեղից, կամ չզորակոչվի՝ ուսումնական տարկետում ունենալով։ Ուսումնական հաստատություններից զորակոչվող նորակոչիկը, առավել հավանական է, որ կհայտնվի ուսումնական զորամասում»:

Հետևաբար, ըստ նախարարի, վիճակահանության ժամանակ հավանականությունը, որ նա կհայտնվի առաջին գծի որևէ ստորաբաժանումում, անհամեմատ ավելի փոքր է։

Վիգեն Սարգսյանը նշեց, որ խնդիր ունեն վերանայելու տարկետումների համակարգում առկա խնդիրները։

«Բժշկական ծառայության գծով դա ավելի բարդ է, բայց մենք որոշ քայլեր արել ենք և շարունակելու ենք մինչև ձմեռային զորակոչ՝ ունենալով մի շարք արդյունքներ: Գիտեք, որ նախորդ զորակոչի արդյունքներով հարուցված քրեական գործեր կան՝ բժշկական տարկետումների հետ կապված»,- ասաց Վիգեն Սարգսյանը:

Նախարարը հայտնեց, որ օրեր առաջ հասարակական կազմակերպություններից մեկից ստացել են հարցում՝ պաշտոնյաների որդիների անուն-ազգանուններով, որտեղ հետաքրքրվել են, թե նրանցից ով է ծառայել, ով՝ ոչ. «48 հոգու ցուցակ էր տրված, որոնց մեջ պատահական անուն, ազգանուն, հայրանուն չկար, այսինքն՝ եթե հիմա մեկի անունն ասեմ, որևէ մեկ մոտ կասկած չի լինի, թե ում մասին է խոսքը։ 48 հոգուց  26-ը ծառայել է բանակում, 2-ը՝ ՀՀ քաղաքացիություն չունեն, եթե ազգանունները տեսնեք՝ կհասկանաք, թե ինչու, պահեստազորի բժշկական ծառայության սպա կա, որը բազմաթիվ պահեստազորի բժշկական սպաների նման՝ ակտիվ ծառայություն չի անցել, 6 հոգի այս պահին ունի տարկետման իրավունք՝ մի մասը՝ ակադեմիական, մյուսը՝ առողջական, և 16 հոգին ազատված է ծառայությունից»:

Ըստ նախարարի՝  բնականաբար, այս արդյունքից գոհ չեն և, կարծում է, որ հանրային պաշտոն զբաղեցնող անձինք պետք է նաև գիտակցեն՝  հանրային ուշադրությունն իրենց ընտանիքի նկատմամբ միշտ ավելի բարձր է, և հետևաբար՝ երբեմն կայացնեն նաև դժվար որոշումներ՝ տարկետումների հետ կապված։

«Բոլոր դեպքերում, զորակոչի ժամանակ որևէ մեկի՝ պաշտոնյայի զավակ լինելու հանգամանքը հաշվի չենք առնում»,- նշեց Վիգեն Սարգսյանը:

Նրա խոսքերով՝ այս պահին կան շատ բարձր պաշտոնյաների երեխաներ, որոնք ծառայում են բանակում, նաև առաջնագծում, որոնցից առնվազն երկուսն ունեն զորացրման պարտադիր առողջական ցուցում, և որոնց զորացրումը չեն իրականացնում մի պարզ պատճառով՝ հենց զորացրումն իրականացնենք, ստացվելու է, որ պաշտոնյայի երեխա է, դրա համար է զորացրվում։