Ձեր վստահելի աղբյուրը

Ապրիլյան պատերազմի ընթացքում Ադրբեջանի հանցագործությունների վերաբերյալ Արցախի մարդու իրավունքների պաշտպանի կողմից իրականացված փաստահավաք աշխատանքի և դրա հիման վրա կազմված զեկույցներին  հղում են արել տարբեր միջազգային կազմակերպություններ, ինչը, շատերի կողմից  համարվում է աննախադեպ,-լրագրողների հետ հանդիպման ժամանակ ասաց Արցախի Մարդու իրավունքների պաշտպան Ռուբեն Մելիքյանը:

«Շատերը դա համարում են աննախադեպ, որովհետև չճանաչված պետության կողմից հրապարակված փաստաթղթերին հղում տալուն նախադեպեր, գուցե կան, բայց ես տեղյակ չեմ»,- հավելեց նա:

Արցախի ՄԻՊ-ի խոսքով, փաստահավաք գործընթացը սկիզբ ունի, ավարտ չունի, մշտապես պետք է աշխատել. «Պետք է հասկանալ Մարդու իրավունքների պաշտպանի հնարավորությունները:  Մենք դատարան դիմող չենք, փաստագրող և բարձրաձայնող ենք»:

Ասուլիսին ներկա Հայաստանի Մարդու իրավունքների պաշտպան Արման Թաթոյանը մտահոգություն հայտնեց, որ միջազգային կառույցների հրապարակային գնահատականներում  բացակայում է հստակ քննադատությունը, հասցեական չեն:

«Խոսքը վերաբերում է կոնկրետ մարդու իրավունքների ոլորտի միջազգային կառույցներին: Մարդու իրավունքների պաշտպանն երբևէ չի կարող առնչություն ունենալ քաղաքականության հետ:  Մենք այստեղ խնդիրը բացառապես դիտարկում ենք մարդու իրավունքների տեսանկյունից: Հստակ է մեկ բան, որը նաև միջազգային կառույցներն են ընդունում,  չի կարող տարածքի քաղաքական կարգավիճակը  որևէ նշանակություն ունենալ իրավունքների պաշտպանության վիճակի վրա»,- ասաց Ա. Թաթոյանը:

Հարցին, թե ինչո՞ւ է  բացակայում հասցեականությունը՝ արդյոք սա հակառակորդ կողմի լոբբիստական գործունեության արդյունք է, թե հայկական կողմի թույլ աշխատանքի, նա պատասխանեց. «Իհարկե, հակառակ կողմը զգալի միջոցեր է ներդնում լոբբիստական աշխատանքի համար, ցանկացած առիթ օգտագործում է  ցույց տալու համար, որ խախտումները, ատելությունը հայկական կողմից է: Այդ առումով մենք պետք է հնարավորինս ակտիվացնենք աշխատանքները,  չպետք է սահմանփակվենք որևէ ձեռքբերումով կամ քայլով»:

«Ընդդեմ իրավական կամայականության» ՀԿ գործադիր տնօրեն Լարիսա Ալավերդյանն ասաց, որ արված աշխատանքն առայժմ հատվածական բնույթ է կրում, բավարար չէ, որպեսզի Ադրբեջանին զսպեն:

«Ցավոք սրտի, առայժմ աշխարհում մարդու իրավունքները դիտարվում են աշխարհաքաղաքական կամ ազգային շահերին ածանցյալ»,- ասաց նա՝ հավելելով. « Հայաստանն ու Արցախը պետք է ունենան ավելի հմուտ մասնագետներ, քանի որ դիմացը կանգնած է քաղաքակրթությունից դեպի բարբարոսություն հետընթաց ապրող հարևան»: