Ձեր վստահելի աղբյուրը

«Դեպի այն երկրներ, որտեղ նախորդ տարիներին տեղի են ունեցել ահաբեկչական ակտեր, կարող ենք փաստել, որ այս տարի զբոսաշրջիկների հոսքի նվազում չի եղել»,- այսօր լրագրողների հետ հանդիպմանն այս մասին ասաց Տուրիզմի փորձագետ Մարինե Ավետիսյանը:

Նրա խոսքով՝ նախորդ տարի Եգիպտոսում տեղի ունեցած ավիավթարը այս տարվա տուրիստական հոսքը դեպի այնտեղ չի նվազեցրել։ Ինչ վերաբերում է Բարսելոնայում տեղի ունեցած ահաբեկչությանը, նույնպես. «Դեպի այնտեղ ձգտող մեր զբոսաշրջիկների թիվը չի նվազել, նույնիսկ ավելացել են: Ավիատոմսերի արժեքներն էլ չեն նվազել»։

Մարինե Ավետիսյանը մտահոգություն հայտնեց, որ երբ ինչ-որ մի երկրում, որևէ միջադեպ է լինում, ապա հայաստանցի զբոսաշրջիկները խնդիրներ են ունենում՝ կապված տեղի հայկական դեսպանատների հետ կապ հաստատելու հետ:

«Տուրօպերատորները այդպիսի դեպքերում զբոսաշրջիկներին անմիջապես ուղղորդում են հայկական դեսպանատներ ու հյուպատոսություններ, որոնց թեժ գծերը, ցավոք, միշտ չէ, որ լավ են աշխատում, չկան հասանելի հեռախոսահամարներ, որով կարող է զբոսաշրջիկը զանգահարել և օգնություն խնդրել: Պետք է զբոսաշրջության պետական կոմիտեն կոնտակտային տվյալներ տրամադրի բոլոր պահանջված ուղղությունների հայկական դեսպանատներից, որպեսզի մենք էլ տրամադրենք զբոսաշրջիկներին»,- ասաց նա:

Մարինե Ավետիսյանը խորհուրդ տվեց նաև, որ զբոսաշրջիկները բժշկական ապահովագրությունը կնքեն Հայաստանում, ոչ թե այն երկրում, ուր մեկնում են՝  հետագայում կիրառման ժամանակ խնդիրների չհանդիպելու համար:

Հոգեբան Սամվել Խուդոյանն էլ անդրադառնալով խնդրի հոգեբանական կողմին՝ նշեց. «Ցանկացած բան, որը տվյալ երկրում մարդու առողջության համար վտանգավոր է, հետ է պահում այնտեղ մեկնելուց: Երկարաժամկետ ազդեցություն են ունենում պատերազմները, հիվանդությունները, վիրուսները, ոչ հիգիենիկ պայմանները, քան տեղի ունեցած ահաբեկչությունը: Օրինակ աֆրիկյան երկրներ խուսափում են գնալ զուտ հիգիենայի տեսանկյունից: Բավական երկար ժամանակ էլ զբոսաշրջիկները մեր երկիր էին խուսափում էին գալ, որպես պատերազմող երկիր: Ահա այստեղ է, որ մեծ նշանակություն ունի ճիշտ տեղեկատվության տրամադրումը զբոսաշրջային ընկերությունների կողմից»:

Հոգեբանի խոսքով՝ ահաբեկչական ակտերը ոչ սիստեմատիկ ազդեցություն են կրում տուրիզմի վրա:

Սամվել Խուդոյանը անդրադարձավ նաև վերջին շրջանում Թուրիքիայում տարածված վիրուսին. «Ամեն օր երեք-չորս ավտուբուս Հայաստանից մեկնում են Թուրքիա, բայց մերոնք այդպես էլ ակտիվ իրազեկում չտարածեցին, հատուկ զգուշացում չարեցին, տուրօպերատորները շարունակում են իրենց փաթեթներում ներառել Թուրքիան: Իսկ օրինակ՝ Ռուսաստանն այդ առումով ավելի ակտիվ քաղաքականություն է վարում»:

Բանախոսներն ընդգծեցին, որ տուրիստների համար այս ամենից զատ՝ Էժանությունը  համարվում է համար մեկ պայմանը: