Գյուլը հրավիրել է ֆրանսիացի մասնագետների` քննարկելու նախորդ դարասկզբի դեպքերը

13:05 07/10/2009 » Քաղաքական

Թուրքիայի նախագահ Աբդուլլահ Գյուլը Ֆրանսիա կատարելիք այցի նախօրեին հարցազրույց է տվել ֆրանսիական «AFP» լրատվական գործակալությանը: Թուրքիայի եվրաինտեգրման առնչությամբ Գյուլը նշել է, որ իրենք նպատակադրված են Եվրամիության երկրների ձեռքբերումներն իրականություն դարձնել նաև Թուրքիայում ու ոչ միայն:

«Թուրքիան չի բավարարվի միայն Եվրամիության չափանիշներն ընդունելով, այլ նաև կստանձնի այդ արժեքները տարածաշրջանում և հարևան երկրներում տարածելու դերը»,- ասել է Թուրքիայի նախագահը:

Գյուլն անդրադարձ է կատարել նաև Հայաստան-Թուրքիա մերձեցմանը` ասելով. «Եթե անցյալի խնդիրներին հնարավորություն տանք այսօր ևս գոյություն ունենալ, ապա թունավորած կլինենք ապագան»:

Թուրքիայի նախագահը նաև նշել է, որ առաջին աշխարհամարտի տարիներին հայրերն էլ, թուրքերն էլ մեծ զրկանքներ են կրել և որ վերջիններս հարկադրված են եղել միլիոններով Բալկաններից, Մերձավոր արևելքից ու Կովկասից գաղթել Անատոլիա:
Գյուլի համոզմամբ` մեկ դար առաջ տեղի ունեցած իրադարձությունները տարբեր կերպ են մեկնաբանվում, և խնդրի էությանն անտեղյակները չեն կարող որոշում կայացնել նման հարցերում:

«Մենք ցանկանում ենք, որ այդ հարցով զբաղվեն պատմաբաններն ու մասնագետները: Մենք պատրաստ ենք ընդունել այն արդյունքները, որոնց կհասնի պատմական համատեղ հանձնաժողովը: Մեր անկեղծությունը ցույց տալու համար էլ հայտարարել ենք, որ խնդրով հետաքրքրվող ամեն երկրից էլ մասնագետներ կարող են ներգրավվել այդ հանձնաժողովում: Եթե ֆրանսիացիներն էլ կամենան, կարող են մասնակցել»,- ասել է Թուրքիայի նախագաը:

Նշենք, որ հայկական կողմը պաշտոնապես բազմիցս հայտնել է, որ պատմական հիշյալ ենթահանձնաժողովը չի քննարկելու Հայոց ցեղասպանության իրողությունը: Քննարկման նյութ կարող են լինել միայն ցեղասպանության հետևանքներն ու դրանց հաղթահարման ուղիները:

Աղբյուր` Panorama.am