Ես չեմ տեսնում մի այնպիսի իրավիճակ, որը կարող է կողմերին դրդել ԼՂ հիմնախնդրի կարգավորման ուժային տարբերակին: Բնական է, որ այդ տարբերակը շահավետ չէ Հայաստանի համար, սակայն այն շահավետ չէ նաև Ադրբեջանի համար: Այս մասին Դեյ.ազ լրատվական կայքին տված հարցազրույցում ասել է քաղաքագետ Ռասիմ Աղաևը:

Քաղաքագետը նշել է, որ Հայաստանին ձեռնտու չէ խնդրի լուծման ուժային տարբերակը, քան որ նրա վերահսկողության տակ են գտնվում այդ տարածքները: Նրա կարծիքով, չնայած այն հանգամանքին, որ Բաքուն ժամանակ առ ժամանակ ռազմատենչ հայտարարություններ է անում, դրանից չի կարելի եզրակացնել, որ նա փորձում է խնդիրն այդ ճանապարհով կարգավորել:

Աղաևը համոզված է, որ Բաքվի ռազմատենչ հայտարարություններն ուղղված են գերտերություններին: Նա նշել է, որ Բաքվում կարծում են, թե իրենց ռազմատենչ հայտարարությունները գերտերություններին ակտիվ գործողությունների կդրդեն:

Անդրադառնալով գերտերությունների դիրքորոշմանը` Աղաևը ասել է, որ այս պահի դրությամբ Ռուսաստանին ձեռնտու չէ պատերազմ, քանի որ նա Վրաստանի հետ վերջին պատերազմի ժամանակ բավականին փչացրել է իր հեղինակությունը, դրանից բացի, առանց դրա էլ նրա հեղինակությունը տարածաշրջանում բավականին բարձր է:

Իսկ ինչ վերաբերվում է Եվրամիությանը, նրան ևս սկզբունքորեն պատերազմ հարկավոր չէ: ԵՄ ընդհանրապես կողմ չէ հիմնախնդիրների ուժային կարգավորմանը: