Ռուս փորձագետ, Մոսկվայի Պետական Համալսարանի պրոֆեսոր Ալեքսանդր Դուգինը կոչ է արել Ադրբեջանին դուրս գալ ՎՈւԱՄ(Վրաստան, Մոլդովա, Ադրբեջան, Ուկրաինա) հակառուսական կազմակերպությունից:Այս մասին հաղորդում են ադրբեջանական լրատվամիջոցները:

Դուգինի մեկնաբանությունները հիմնված են Ուկրաինայի նախագահական ընտրություններում նախնական տվյալներով առաջատար Վիկտոր Յանուկովիչի այն համոզման վրա, որ ՎՈւԱՄ-ի գործունեությունը այլևս ակտուալ չէ:

«Ադրբեջանը պետք է ուշադիր հետևի Ուկրաինայում տեղի ունեցող դեպքերին: Ուկրաինային հաջորդելու է Վրաստանը, որտեղ արդեն մոտ ապագայում տեղի կունենա իշխանափոխություն: Բնականաբար, այնտեղ էլ նոր իշխանությունները կշտապեն դուրս գալ ՎՈւԱՄ-ից: Եվ ահա կստացվի, որ հակառուսական կազմակերպությունում կմնան Ադրբեջանն ու Մոլդովան: Մի՞թե Ադրբեջանին անհրաժեշտ է մերժված երկրի կարգավիճակ: Դժվա՞ր է նկատել, որ հակառուսական քաղաքականությունը ԱՊՀ տարածքում ոչ միայն ձախողվել, այլ ամբողջովին տապալվել է»:

Դուգինի կարծիքով, ՎՈւԱՄ-ից դուրս գալով, Ադրբեջանը ռուսական օժանդակություն կստանա:
«Իսկ դա քիչ բան չի նշանակում, հաշվի առնելով այն գործընթացները, որոնք զարգանում են տարածաշրջանում և որոնցից Ադրբեջանը ցավալիորեն հետ է մնում», - եզրափակել է փորձագետը: