Ոստիկանական համակարգի բարեփոխումները մեկնարկել են

17:16 13/03/2010 » Քաղաքական

Ազգային անվտանգության խորհրդի քարտուղար Արթուր Բաղդասարյանն այսօր լրագրողների հետ հանդիպմանն ասաց, որ քիչ առաջ կայացած ԱԱԽ նիստում տրվեց ՀՀ Ոստիկանության համակարգում բարփոխումների ծրագրի մեկնարկը, որը նախատեսում է լայնածավալ բարեփոխումներ ոստիկանական համակարգում:

«Ներառված բարեփոխումների փաթեթը բավականին ծանրակշիռ է, ոստիկանության ոլորտի բարեփոխումները նախ կկրեն կառուցվածքային բնույթ, կմոտեցվեն բնակչությանը, պաշտպանվածության մակարդակն էլ ավելի կբարձրացվի»,- ասաց Բաղդասարյանը:

Նա նշեց, որ ավելորդ թղթարարության վերացումն է լինելու հաջորդ բարեփոխումը, կոռուպցիոն ռիսկների նվազում կլինի: Որպես օրինակ, ԱԱԽ քարտուղարը բերեց կենսաչափական անձնագրերի և նույնացման քարտերի համակարգի ներդրումը, որով, ըստ նրա, կլինի առավելագույն տեղեկատվություն, զանազան տեղեկանքներ պահանջելու անհրաժեշտությունն էլ կվերանա:

«Հիմա ներդրվող այս համակարգի արդյունքում հնարավորություն կտրվի էապես բարելավել ոստիկանության աշխատանքը: Մենք ուզում ենք, որ մեր քաղաքացիները դեսպանատների առջև օրերով հերթ չկանգնեն, դրա համար պետք է ներդնենք կենսաչափական անձնագրերի համակարգը, երկրի ներսում էլ դա շատ կարևոր է»,- նկատեց Արթուր Բաղդասարյանը:

Նրա խոսքերով, կուժեղացվի պայքարը թրաֆիքինգի և թմրամիջոցների դեմ, կիբեռ հանցագործությունների դեմ պայքարը լայն ծավալ կստանա, Ճ/Ո բնագավառի բարեփոխումները կշարունակվեն, դիտակետեր կտեղադրվեն, կխուսափենք տեսուչ-քաղաքացի շփումից:

«Կադրերի պատրաստման և վերապատրաստման հետ կապված` փոփոխություններ կլինեն: Ոստիկանի համապատասխան կոչում կստանան, վերապատրաստման լուրջ ծրագրեր կիրականացվեն»,- հավելեց Բաղդասարյանը:

Ապա նաև ևս մեկ բարեփոխում կլինի` կապված քաղաքացիների դիմում-բողոքների հետ: Այսպես, օն-լայն ռեժիմ է լինելու քաղաքացիների բողոքներին պատասխանելու համար, նվազագույնի է հասցվելու թղթարարությունը:

Նշենք, որ ոստիկանական համակարգում բարեփոխումները նախատեսված են 2010-11 թթ.-ի համար:

Աղբյուր` Panorama.am