Wikileaks ինտերնետային աղբյուրը Աֆղանստանի պատերազմի վերաբերյալ արխիվային գաղտնի փաստաթղթեր է հրապարակել, որտեղ տեղեկատվություն կա այն մասին, թե «Ալ Քաիդա» միջազգային ահաբեկչական կազմակերպության կողմից 2001 թ-ի սեպտեմբերի 11-ին ԱՄՆ-ում իրականացրած ահաբեկչական գործողությունների սցենարով հարձակումներ է ծրագրված եղել նաև Աֆղանստանի մայրաքաղաք Քաբուլում:
Այս մասին այսօր գրում է բրիտանական Guardian պարբերականը:

Պարբերականի հավաստմամբ, ամերիկյան ռազմական հետախուզության տվյալները բացահայտել են, թե «Ալ Քաիդայի» երկրորդ անձը` Այման ալ-Զավահիրին, անձամբ հրահանգել էր 22 հոգուց բաղկացած ահաբեկչական խմբի զավթել Քաբուլի օդանավակայանից մի քանի ինքնաթիռներ ու թռիչքից հետո դրանք ուղղել աֆղանական մայրաքաղաքի մի շարք օբյեկտների վրա:

Հարձակման ենթակա հավանական թիրախներից նշված են նախագահ Համիդ Կարզայի նստավայրը, Մեծ Բրիտանիայի ու ԱՄՆ-ի դեսպանատները և ՆԱՏՕ-ի տեղի կենտրոնակայանը:

91 հազար գաղտնի փաստաթղթերի արխիվն հայտնվել է Wikileaks կայքում հուլիսի 26-ին: Աղբյուրի ղեկավարությունը մոտ ապագայում պատրաստվում է հրապարակել ևս 15 հազար փաստաթուղթ, որոնք հավաքագրվել ու փոխանցվել են տարբեր գերատեսչություններում անանուն միջնորդների կողմից:

Արխիվային փաստաթղթերի հրապարակումից հետո ամերիկյան ռազմական գերատեսչությունը սկսել է հետաքննություն տեղեկատվական արտահոսքի մեղավորներին գտնելու նպատակով: Հուլիսի 29-ին հայտնի է դարձել, որ հետաքննությանն է միացել նաև Հետախուզության Դաշնային Բուրոն: ԶԼՄ-ների հաղորդմամբ, արտահոսքի հիմնական կասկածյալներից է ռազմական հետախուզության վերլուծաբան Բրեդլի Մենինգը(Bradley Manning), ով նախկինում արդեն Wikileaks կայքի միջոցով տարածել էր գաղտնի փաստաթղթային նյութեր: