Դ.Հարությունյան. ԱԱԾ-ի տրամադրվելիք տվյալները միտված են ընտրությունների թափանցիկությունն ու վերահսկելիությունն ապահովելուն

17:02 28/04/2012 » Քաղաքական

Դ.Հարությունյան. ԱԱԾ-ի տրամադրվելիք տվյալները միտված են ընտրությունների թափանցիկությունն ու վերահսկելիությունն ապահովելուն

Այսօր կեսօրին խորհրդարանական ընտրություններին մասնակցության հայտ ներկայացրած հինգ կուսակցություններ` ՀՀԿ-ն, ՀՅԴ-ն, Դեմկուսը, Կոմկուսը և ՕԵԿ-ը ուսումնասիրել են Ազգային անվտանգության ծառայության սահմանապահ զորքերի կողմից օգտագործվող Սահմանային Էլեկտրոնային Կառավարման Տեղեկատվական (ՍԷԿՏ) համակարգի տեխնիկական հնարավորությունները:

Այնուհետ դիմել ՀՀ ԿԱ ԱԱԾ-ին առաջարկությամբ` մայիսի 6-ից մինչև ընտրությունների արդյունքերը անվավեր ճանաչելու մասին ընտրական հանձնաժողով դիմում ներկայացնելու համար սահմանված ժամկետի ավարտը ընձեռել նշված կուսակցությունների մեկական ներկայացուցչի ՍԵԿՏ համակարգից օգտվելու հնարավորություն` ստուգելով իրենց տեղեկություններով քվեարկության մասնակցած այս կամ այն քաղաքացու վերաբերյալ համակարգում առկա տվյալները, եթե այդ քաղաքացին քվեարկությանը մասնակցել է այն տեղամասում, որի արդյունքերը անվավեր ճանաչելու մասին օրենքով սահմանված կարգով դիմում է ներկայացվել կամ ներկայացվելու:

Ստորագրելուց երկու ժամ անց լրագրողների հետ հանդիպմանը ՀՀԿ Խորհրդի անդամ Դավիթ Հարությունյանը նշեց, որ կուսակցությունները դիմել են ԱԱԾ-ին նախևառաջ ընտրությունների թափանցիկությունն ապահովելու համար.

«Ուսումնասիրելով համակարգը` ընտրությունների թափանցիկությունն ու վերահսկելիությունը բարձրացնելու նպատակով մենք դիմել ենք ԱԱԾ-ին, որպեսզի յուրաքանչյուր կուսակցությանը, որը դիմում է ԱԱԾ-ին, տրամադրվի մեկ աշխատանքային տեղ, որպեսզի մայիսի 6-ի առավոտից սկսած մինչև այն ժամկետը, երբ հնարավորն է վիճարկել ընտրությունների արդյունքները այդ կուսակցությունները հնարավորություն ունենան այս կամ այն անձի վերաբերյալ ստանալ տեղեկատվություն` ե՞րբ են նրանք հատել Հայաստանի սահմանը և ո՞ր ուղղությամբ»,- պարզաբանեց Դ.Հարությունյանը:

Ըստ նրա, եթե ԱԱԾ-ն տրամադրի այդ տեղեկատվությունը, ապա դա ավելի կբարձրացնի վստահությունը ընտրական գործընթացի նկատմամբ: Նա տեղեկացրեց նաև, որ նախնական քննարկումը ԱԱԾ-ում արդեն տեղի է ունեցել և առաջին արձագանքը դրական է եղել.

«Իհարկե դեռ պետք է շարունակենք մեր աշխատանքը, որպեսզի գտնենք միասնական աշխատանքի մոդելը, քանի որ ստանձնում ենք պատասխանատվություն, որ այդ տվյալները օգտագործվելու են միմիայն ընտրական գործընթացների հետ: Եվ որևէ մեկը չի փորձի այլ հարց լուծել այդ տվյալներն օգտագործելով»,- ավելացրեց ՀՀԿ ներկայացուցիչը:

Դ.Հարությունյանն ասուլիսի ժամանակ նշեց նաև, որ ստորագրման պահին ընդամենը հինգ քաղաքական ուժ էր միացել այդ նախաձեռնությանը, սակայն դա չի նշանակում, թե որևէ սահմանափակում կա և ցանկացած քաղաքական ուժ, որ մասնակցելու է գալիք ընտրություններին, կարող է միանալ նրանց:

Ի դեպ նշենք, ասուլիսի ավարտին պարզ դարձավ, որ «Բարգավաճ Հայաստան» կուսակցությունը ևս միացել է նախաձեռնությանը, ինչը, թերևս, ըստ Դ.Հարությունյանի սպասելի էր, քանի որ լրագրողների հարցին պատասխանելով, թե ինչպե՞ս է մեկնաբանում այն հանգամանքը, որ ԲՀԿ-ն այդ հնգյակում չկա, նա հայտարարեց.
«Ինչ վերաբերում է «Բարգավաճ Հայաստան» կուսակցությանը, ապա նրանց բացակայությունը նախաձեռնության քննարկման ժամանակ պայմանավորված էր զուտ նրանց ներկայացուցչի բացակայությամբ: Բայց ես վստահ եմ, որ նրանք ևս կմիանան դրան, որովհետև համակարգի նախնական ուսումնասիրություններին ԲՀԿ-ն մասնակցել է»:

Նախորդիվ`

ՀՀԿ-ն, ՀՅԴ-ն, Դեմկուսը, Կոմկուսը, ՕԵԿ-ը դիմում են ԱԱԾ-ին` ընձեռնել ՍԷԿՏ համակարգից օգտվելու հնարավորություն

ԲՀԿ-ն միացել է հինգ կուսակցությունների հայտարարությանը
 

Աղբյուր` Panorama.am

Share |

Տպագրական տարբերակ

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter:

↓ Վերջին նորություններ
Շարունակել

Օրացույց