Արմեն Մինասյան. Վերջին ընտրություններով ապամոնտաժվեց 1991 թվականից հիմք դրված քաղաքական համակարգը

12:42 02/06/2012 » Քաղաքական

Արմեն Մինասյան. Վերջին ընտրություններով ապամոնտաժվեց 1991 թվականից հիմք դրված քաղաքական համակարգը

Վերջին ընտրություններով սկզբունքորեն սկսվում է այն քաղաքական համակարգի ապամոնտաժումը, որ հիմք էր դրվել 1991 թվականից, այսինքն` քաղաքական ուժերը այլևս անձնակենտրոն չեն, դառնում են ավելի ինստիտուցիոնալ: Ասուլիսում նման տեսակետ հայտնեց քաղաքագետ Արմեն Մինասյանը: Նա այս ընտրություններն առանձնահատուկ որակեց նաև այն տեսանկյունից, որ ռեսուրսների տիրապետման առումով Հայաստանում երբևէ չէր եղել, որ մրցակցեն այնպիսի ուժեր, որոնք ունեն հավասար ռեսուրսներ:

«Նորընտիր Ազգային ժողովը կաշխատի այս տրամաբանության ներքո, կլինեն ոչ թե մանդատների քանակով հավասար, այլ ռեսուրսներով համադրելի ուժեր, ովքեր կփորձեն մրցակցել, մարտավարական հնարքներ կիրառել ու ամրապնդել իրենց դիրքերը»,- ասաց քաղաքագետը` միաժամանակ նշելով, որ թեև ՀՀԿ-ն մեծամասնություն է կազմում, բայց դա բացարձակ հնարավորություն է տալիս կառավարություն ձևավորելու համար, իսկ խորհրդարանական աշխատանքի համար մեծամասնություն լինելը բավարար չէ:

«Շատ դեպքերում նախորդ խորհրդարանում քվորում ապահովվում էր կոալիցիան` ՀՀԿ, ԲՀԿ, ՕԵԿ, իսկ այսօր ունենք իրավիճակ, որ ՀՀԿ-ն թեև մեծամասնություն է, բայց հնարավոր է քվորման հետ կապված խնդիրներ ունենա»,- ասաց Արմեն Մինասյանը:

Նրա կարծիքով,  նորընտիր խորհրդարանում միագիծ մոտեցում չի լինի, այլ կլինեն բազմազան, քանի որ խմբակցությունները շատ են, առանձին խնդիրների վերաբերյալ հնարավոր են փոքրիկ կոալիցիաներ, չբացառեց նաև երկկողմ համագործակցություններ, քանի որ ամեն քաղաքական ուժ ունի իր շահը ու կհամագործակցի` ելնելով իր շահերից:

Ինչ վերաբերում է ձևավորվելիք կառավարությանը, բանախոսն ասաց, որ կառավարության կազմում կադրային, կառուցվածքային առումով լուրջ փոփոխություններ կարելի է ակնկալել նախագահական ընտրություներից հետո, իսկ այս ընթացքում ստատուս- քվոն որոշակի երանգավորումներով կպահպանվի:

Ա. Մինասյանը նաև նշեց, որ խորհրդարանական ընտրությունները կարելի է համարել «սոցհարցում», այսինքն ամեն ուժ չափում է իր հնարավորությունները, ինչքան էլեկտորատ ունի ու, հիմք ընդունելով դա, որոշում կայացնում` արժե մասնակցել նախագահական ընտրություններին, թե ոչ:

Աղբյուր` Panorama.am

Share |

Տպագրական տարբերակ

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter:

↓ Վերջին նորություններ
Շարունակել

Օրացույց