Ձեր վստահելի աղբյուրը

Հոկտեմբերի 17-18-ը Բուխարեստում տեղի կունենա Եվրոպական ժողովրդական կուսակցության (ԵԺԿ, European People Party, EPP) 12-րդ համագումարը: Ինչպես տեղեկացվում է ԵԺԿ համագումարի պաշտոնական կայքում Ռումինիայի մայրաքաղաք կժամանեն 40 երկրի մոտ 1200 ներկայացուցիչներ: Աղբյուրի համաձայն` ԵԺԿ համագումարին մասնակցություն կունենա նաև ՀՀ նախագահ, ՀՀԿ նախագահ Սերժ Սարգսյանը:

Համագումարին մասնակցելու նպատակով ԵԺԿ նախագահ Վիլֆրեդ Մարթինսից ու նրա տեղակալներից բացի, Բուխարեստ կժամանեն մասնավորապես ԵԺԿ անդամ կուսակցությունների ղեկավարներ, որոնց զգալի մասն այսօր իրենց երկրներում գտնվում են իշխանության մեջ և հանդիսանում են պետության կամ կառավարության ղեկավարը: Մասնակիցների թվում կլինեն մասնավորապես ԵՄ անդամ երկրններից Ռումինիայի նախագահ Տրայան Բասեսկուն, Գերմանիայի վարչապետ Անգելա Մերկելը, Իսպանիայի վարչապետ Մարիանո Ռախոյը, Լյուքսեմբուրգի վարչապետ Ժան-Կլոդ Յունկերը, Լեհաստանի վարչապետ Դոնալդ Տուսկը, Շվեդիայի վարչապետ Ֆրեդրիկ Ռայնֆելդտը, Ֆինլանդիայի վարչապետ Յիրկի Կատայնենը, Հունգարիայի վարչապետ Վիկտոր Օրբանը, Իռլանդիայի վարչապետ Էնդա Քենին, Լատվիայի վարչապետ Վալդիս Դոմբրովսկիսը, Բուլղարիայի վարչապետ Բոյկո Բորիսովը, Մալթայի վարչապետ Լոուրենս Գոնցին, Լիտվայի վարչապետ Աուդրիուս Կուբիլիուսը, Պորտուգալիայի վարչապետ Պեդրո Պասուշ Կոելյոն, Սլովենիայի վարչապետ Յանեզ Յանշան և Հունաստանի վարչապետ Անտոնիս Սամարասը, Բելգիայի փոխվարչապետ Սթիվեն Վանակերեն, Ավստրիայի փոխվարչապետ Միխաել Շփինդելեգերը:
Բուխարեստում կլինեն նաև Եվրոպական Միության խորհրդի նախագահ Հերման վան Ռոմպոյն ու Եվրահանձնաժողովի նախագահ Ժոզե Մանուել Բարոզուն, ԵԽԽՎ նախագահ Ժան-Կլոդ Մինյոնը:

ԵՄ-ին չանդամակցող երկրներից համագումարի աշխատանքներին, ՀՀ նախագահ Սերժ Սարգսյանից բացի, կմասնակցեն նաև Վրաստանի նախագահ Միխեիլ Սաակաշվիլին, Մոլդովայի վարչապետ Վլադ Ֆիլատը, Ալբանիայի վարչապետ Սալի Բերիշան, Մակեդոնիայի վարչապետ Նիկոլա Գրուևսկին:

Կլինեն նաև տարբեր երկրներում ներկայումս ընդդիմության առաջնորդներ. Անջելինո Ալֆանոն (Իտալիա), Նիկոս Անաստասիադես (Կիպրոս), Լարս Բարֆյոդ (Դանիա), Սիբրանդ վան Հաերզմա Բումա (Նիդերլանդեր), Էռնա Սոլբերգ (Նորվեգիա), Տոմիսլավ Կարամարկո (Խորվաթիա), Ժան-Ֆրանսուա Կուպե (Ֆրանսիա) և այլոք:

Տեղեկատվության համաձայն` Բուխարեստյան գագաթաժողովում ԵԺԿ-ն կթարմացնի համաեվրոպական կուսակցության ծրագիրը (պլատֆորմ), ինչպես նաև կընտրի նոր ղեկավարություն:
ԵԺԿ համագումարին զուգահեռ Բուխարեստում տեղի կունենա նաև պետությունների, կառավարությունների և կուսակցությունների ղեկավարների գագաթաժողովը:

Նշենք, որ ԵԺԿ-ն համաեվրոպական կուսակցություններից ամենախոշորն ու ազդեցիկն է, որին անդամակցում են 40 երկրների 73 կուսակցություններ: ԵՄ անդամ երկրներից 17-ում, ինչպես նաև եվրոպական ևս 7 այլ երկրներում ԵԺԿ-ին անդամակցող կուսակցությունները կառավարող են: ԵՄ ղեկավարությունը նույնպես մեծմասամբ բաղկացած է ԵԺԿ ներկայացուցիչներից. ԵՄ Խորհրդի ու Եվրահանձնբաժողովի նախագահներից բացի, ԵԺԿ-ին են անդամակցում եվրոպական 27 հանձնակատարնմերից 13-ը:
Հայաստանյան կուսակցություններից ԵԺԿ-ին անդամակցում են Հայաստանի Հանրապետական, «Օրինաց երկիր» և «Ժառանգություն» կուսակցությունները: