ՀՀ-ում Ուկրաինայի դեսպան. Ուկրաինան հնարավոր է որոշի դուրս գալ ԱՊՀ կազմից
«Մարտի 16-ին անցկացվելիք այսպես կոչված Ղրիմի հանրաքվեն ապօրինի է, հակասահմանադրական, հակասում է միջազգային նորմերին: Այն ապակայունացնում է իրավիճակը»,- ասուլիսում նման դիտարկումներ արեց Հայաստանում Ուկրաինայի արտակարգ և լիազոր դեսպան Իվան Կուխտան:
Նա նաև նշեց, որ ԵԱՀԿ-ն էլ է հայտարարել, որ Ղրիմի սպասվող հանրաքվեն հակասում է Ուկրաինայի սահմանադրությանը, անօրինական է:
Ինչ վերաբերում է Հայաստանի իշխանությունների դիրքորոշմանը Ուկրաինայում տեղի ունեցող իրադարձությունների վերաբերյալ, արտակարգ և լիազոր դեսպանն ասաց, որ Հայաստանի նախագահը Դուբլինում համապատասխան հայտարարություն է արել, որ Հայաստանը հարցի խաղաղ կարգավորմանն է կողմնակից:
Հիշեցնենք, որ նախագահ Ս. Սարգսյանը Եվրոպական ժողովրդական կուսակցության լիագումար նստաշրջանի ժամանակ ունեցած ելույթում մասնավորապես ասել էր. «Ստեղծված իրավիճակում անհրաժեշտ է անել առավելագույնը լարվածության թուլացման և երկխոսության միջոցով ողջամիտ լուծումներ գտնելու ուղղությամբ»:
Ի.Կուխտան չբացառեց, որ Ուկրաինան որոշի դուրս գալ ԱՊՀ կազմից, թեև դեռևս հստակ որոշում չկա: Ըստ նրա, Կիևում հարցը քննարկման փուլում է: Դիվանագետը նշեց, որ Ուկրաինայի իրավիճակի քննարկման հետ կապված ԱՊՀ արտաքին գործերի նախարարների հանդիպումը երկու անգամ (մարտի 7 և մարտի 12) չի կայացել այն պատճառաբանությամբ, թե իբր արտգործնախարարները ժամանակ չունեն, զբաղված են:
«Եթե ԱՊՀ անդամ պետության խնդիրը քննարկելու համար կառույցի անդամ երկրների արտգործնախարարները չեն կարողանում ժամանակ գտնել, ապա անիմաստ է շարունակել անդամակցությունն այդ կառույցում»,- ասաց նա՝ հավելելով, որ ԱՄՆ-ի, Եվրամիության կամ միջազգային այլ կազմակերպությունների ներկայացուցիչներ կարողանում են ժամանակ գտնել Ուկրաինայի հարցը քննարկելու համար, իսկ ԱՊՀ երկրների արտգործնախարարները` ոչ:
Խոսելով ուկրաինական հայ համայնքի մասին, Ի. Կուխտան ասաց, որ եթե 2001 թվականի հանրաքվեի արդյունքներով Ուկրաինայում գրանցված էր մոտ 120 հազար հայ, այսօր երկու կամ երեք անգամ ավելի է, ու պետությունն ամեն ինչ անում է ազգային փոքրամասնությունների, այդ թվում՝ հայ համայնքի զարգացման համար: Նա հիշեցրեց, որ Մայդանում զոհված քաղաքացիներից 2-ը ազգությամբ հայ Ուկրաինայի ակտիվ քաղաքացիներ էին:
Լրահոս
Տեսանյութեր
Արդյո՞ք սա սահմանազատում է, թե՞ ճնշման տակ ինչ-որ բան տալ. Սերժ Սարգսյան
