Հ.Սահակյանը` ՕԵԿ-ի ընդդիմություն լինելու և իր նախարար նշանակվելու մասին
«Այս ժամանակահատվածում մենք ապացուցեցինք մի բան, որ ունենալով քաղաքական մեծամասնություն երբևէ չենք տառապել այն մոլուցքով, որ պետք է միայնակ կառավարենք և ամեն գնով վերցնենք իշխանության բոլոր օղակները: Եթե կա կառուցողական միտք, կառուցողական աշխատելու ցանկություն ցանկացած ուժի մոտ, ապա դրա մասին կարող են հայտնել և դա կարող է դառնալ քննարկման առարկա»,- Panorama.am-ի հետ զրույցում ասաց ՀՀԿ խմբակցության քարտուղար Հովհաննես Սահակյանը` մեկնաբանելով հնարավոր կոալիցիայի ձևավորման մասին շրջանառվող լուրերը:
Հիշեցնենք, որ ԱԺ ՀՀԿ-ական փոխնախագահ Հերմինե Նաղդալյանը` մեկնաբանելով ԱԺ չորս ոչ իշխանական ուժերի կայացրած համաձայնությունը` ապրիլի 28-ի ԱԺ նիստում արտահերթ կարգով կառավարությանն անվստահություն հայտնելու հարցը օրակարգ մտցնելու վերաբերյալ, ասել էր. «Մեկ բան պարզ է՝ խորհրդարանում ուժերի դասավորությունը այնպիսին է, որ նման նախաձեռնությամբ հանդես գալը քաղաքական իմաստով որևէ արդյունք ունենալ չի կարող»:
Ըստ պատգամավորի` քաղաքական թիմերը ազատ են իրենց ընտրության մեջ, առավել ևս, որ սպասվում են կուսակցական ժողովներ այս ընթացքում և երբ ուժերը կներկայացնեն իրենց պատկերացումները և տեսակետները, այն ժամանակ երկրի ղեկավարի գլխավորությամբ այդ առաջարկները կքննարկվեն:
Այլ կերպ ասած` Հ.Սահակյանը չի բացառում, որ կլինեն ուժեր, որոնք ցանկություն կհայտնեն լինել նոր ձևավորվելիք կոալիցիայում. «Մենք գտնվում ենք մի իրավիճակում, երբ երկիրը դրանից դուրս հանելու համար բավականին պատրաստակամություն, ջանք, կառուցողական աշխատանք է հարկավոր»:
Շրջանառվող լուրերին ի պատասխան, թե արդյոք հավանական է համարում, որ ՕԵԿ-ը իսկապես լքի կոալիցիան և նույնիսկ բռնի ընդդիմության ուղին Հ.Սահակյանը նշեց, թե չի ուզում կանխատեսումներով զբաղվել, բայց շատ շուտով այդ պատասխանը կստանանք, քանի որ այսօր ՕԵԿ-ը նիստ ունի:
Ինչ վերաբերում է այն լուրերին, թե Հանրապետական կուսակցությունը կարծես ուզում է կոալիցիայի ընդլայնում, որպեսզի այս բարդ իրավիճակում պատասխանատվությունը կիսի այլ թիմի հետ, Հ.Սահակյանն ասաց, որ հակառակն ապացուցելու համար մեկ-երկու դիտարկում կարող է անել. «Տարբեր ժամանակահատվածներում ձևավորվել են տարբեր կոալիցիաներ: Մենք տեսել ենք, որ ՀՀԿ-ն երբեմն նաև ամբողջական պատասխանատվությունն է ստանձնել նաև այն հատվածում, որտեղ այլ քաղաքական ուժերի պատասխանատվության ոլորտն է եղել, այնպես որ պատասխանատվությունից խուսափելու խնդիր չունենք: Եթե մենք վերցրել ենք կառավարության ղեկը, ապա պատկերացնում ենք, թե ինչ ենք անում և ուր ենք գնում»:
Այլ խնդիր է, շարունակեց նա, որ կոալիցիան լինի ավելի մասնակցային, լինեն քաղաքական ուժեր, որոնք կմասնակցեն այդ բեռն ու ծանրությունը տանելուն. «Այսօր մարտահրավերները շատ ավելի լուրջ են, թշնամին այդքան էլ տեսանելի չէ և այլն: Դրա համար մենք պետք է ունենանք վստահության բարձր մակարդակ և նոր ձևավորվելիք կառավարությանն էլ առնվազն վեց ամիս պետք է հանգիստ թողնեն այն ուժերը, որոնց միակ գերխնդիրը «ամեն ինչ խառը շատ ավելի լավ է» սկզբունքով առաջնորդվելն է»:
Անդրադարձավ նաև այն լուրին, որ ինքը հնարավոր է լինի գործադիրում. Մամուլը, մասնավորապես, գրել էր, որ Հ.Սահակյանը հնարավոր է զբաղեցնի բնապահպանության նախարարի պաշտոնը: Պատգամավորը, սակայն, միայն ասաց, որ լուրերին ծանոթ է մամուլից, բայց կոնկրետ քննարկում իր հետ այդ հարցի վերաբերյալ չի եղել:
Լրահոս
Տեսանյութեր
Սա քաղաքական գործընթաց է, անթույլատրելի քաղաքական որոշումներ. Թաթոյանը՝ սահմանազատման մասին