Ռիչարդ Գիրագոսյան. Բրյուսելը ՀՀ-ի ազգային պլատֆորմին ավելի մեծ ուշադրություն կդարձնի
«Վիկտորիա Նուլանդի հայտարարության մեջ Հայաստանը, Մոլդովան, Ադրբեջանը և Վրաստանը դիտարկվել են որպես ՌԴ-ի կողմից ճնշված երկրներ»,-այսօր Արևելյան գործընկերության Քաղաքացիական հասարակության ֆորումի Հայաստանի ազգային պլատֆորմի համաժողովի ընթացքում ասաց Տարածաշրջանային հետազոտությունների կենտրոնի հիմնադիր տնօրեն Ռիչարդ Գիրագոսյանը:
Նա նշեց, որ ԱՄՆ-ի Սենատի արտաքին հարաբերությունների հանձնաժողովում ԱՄՆ-ի պետքարտուղարի տեղակալ Վիկտորիա Նուլանդի՝ԱլԳ երկրները ՌԴ-ի ազդեցությունից պաշտպանելու վերաբերյալ հայտարարությունը խոսում է այն մասին, որ ԱՄՆ-ն չի ցանկանում վերջնականապես ձեռք քաշել ՀՀ-ից և հայ ժողովրդից:
«Բրյուսելը Հայաստանի ազգային պլատֆորմին այժմ ավելի մեծ ուշադրություն է դարձնելու, քան մինչև սեպտեմբերի 3-ն էր»,-նշեց Ռ.Գիրագոսյանը:
Նրա խոսքերով, այժմ ՀՀ-ԵՄ հարաբերությունները ոչ թե երկկողմ հարթությունում են զարգանում, այլ եռակողմ՝ՀՀ-ԵՄ-քաղաքացիական հասարակության:
Համաժողովի մեկ այլ մասնակից «Ազատ քաղաքացի» քաղաքացիական նախաձեռնությունների աջակցման կենտրոնի ներկայացուցիչ Հովսեփ Խուրշուդյանը անդրադառնալով «Россия-1» և «Первый канал» հեռուստաալիքների հեռարձակման մասին ՔՖՀ Հայաստանի ազգային պլատֆորմի ապրիլի 7-ի հայտարարությանը նշեց, որ այսօր ՀՀ-ի հասարակությունը ուկրաինական իրադարձությունների մասին տեղեկությունները ստանում է բացառապես ռուսական լրատվամիջոցներով:
«Կայսրությունների, այդ թվում Ռուսաստանի ախորժակը ուտելուց է բացվում և եթե մինչև սեպտեմբերի 3-ը ՀՀ-ն կարողանում էր հավասարակշռություն պահպանել ՌԴ-ի հետ հարաբերություններում՝ԵՄ-ի հետ համագործակցության միջոցով, այժմ գնում է ՌԴ-ին տրվելու գործընթաց»,-նշեց Հ.Խուրշուդյանը:
Նրա խոսքերով, ՌԴ-ն ցանկանում է ՀՀ-ն ամբողջությամբ վերցնել իր վերահսկողության տակ և իր գործողություններով ժողովրդավարական ինստիտուտների հետնահանջ ապահովել ՀՀ-ում:
Արևելյան գործընկերության Քաղաքացիական հասարակության ֆորումի Հայաստանի ազգային պլատֆորմի համաժողովի մեկ այլ մասնակից «Էկոլուր» տեղեկատվական կենտրոնի ղեկավար Ինգա Զառաֆյանը, անդրադարձավ Սևանա լճի հիմնախնդրին:
Նա նշեց, որ այսօր Գեղարքունիքի մարզի բնակիչները պատրաստ են ճանապարհներ փակել, բողոքի ակցիաներ կազմակերպել, քանի որ Սևանի խնդիրը շատ է սրվել:
«Սևանա լիճը մեր ազգային անվտանգության գրավականն է և մենք պետք է փրկենք մեր հարստությունը: Կառավարության մի որոշմամբ Սևանը վերածվում է ձկնաբուծարանի, իսկ մեկ այլ որոշմամբ՝Սևանի մակարդակը պետք է իջեցվի»,-նշեց Ի.Զառաֆյանը:
Նրա խոսքերով, քաղաքացիական հասարակությունը պետք է ակտիվորեն ներգրավվի Սևանա լիճը փրկելու և Գեղարքունիքի մարզի բնակիչներին աջակցելու գործընթացներին: