Սիրիայում ակնկալվող նախագահական ընտրությունները ներքին հակամարտության համատեքստում են. արաբագետ
«Նախագահական ընտրությունների անցկացումով սիրիական իշխանությունները փորձում են առնվազն պահպանել սեփական դիրքերը ներքին հակամարտության քաղաքական տիրույթում»,-այս մասին Panorama.am-ի հետ զրույցում նշեց արաբագետ Արմեն Պետրոսյանը՝ մեկնաբանելով նախօրեին Սիրիայի Ժողովրդական ժողովի կայացրած որոշումը՝ հունիսի 3-ին նախագահական ընտրություններ անցկացնելու վերաբերյալ:
Պետրոսյանի կարծիքով՝ «Սիրիական հիմնախնդրի խաղաղ կարգավորմանը նվիրված ժնևյան գործընթացի փաստացի տապալումը՝ պայմանավորված դրա գլխավոր կազմակերպիչների՝ Մոսկվայի և Վաշինգտոնի միջև ուկրաինական հիմնախնդրի պատճառով ծագած լուրջ դիմակայությամբ, որը մղում է սիրիական վարչակարգին՝ քայլեր ձեռնարկելու՝ միտված հակամարտության թե′ ռազմական և թե′ քաղաքական հարթություններում առնվազն ուժերի ներկա հարաբերակցությունը պահպանելուն. հենց այս համատեքստում պետք է դիտարկել ինչպես վերջին շրջանում Սիրիայի ողջ տարածքում ռազմական գործողությունների բավականաչափ ակտիվացումն, այնպես էլ՝ նախագահական ընտրությունների անցկացումը:
Պետք է նշել նաև, որ ընտրական գործընթացի անկացմամբ սիրիական իշխանությունները փորձում են շարունակել իրենց կողմից ճգնաժամի սկզբից տարվող այն տեղեկատվա-քարոզչական ուղեգիծը, որ սիրիացի ժողովուրդն ինքնուրույն պետք է վճռի սեփական ապագան, ինչը նշանակում է փաստացի հաղթանակ այդ երկրի դեմ դավադրություն կազմակերպած արտաքին ուժերի ծրագրերի դեմ:
Մինչդեռ կանխատեսելի է նաև «հակառակորդ ճամբարի» հակաքայլը: Պարզ է, որ սիրիական վարչակարգի արտաքին հակառակորդներից որևէ մեկը չի ճանաչի Արաբական Հանրապետությունում կայանալիք ընտրություններն, ավելին, գործող վարչակարգի դեմ էլ ավելի կաճեն համակողմանի ճնշումները, նաև մեղադրանքներն առ այն, որ Դամասկոսը տապալում է ժնևյան գործընթացի արդյունքները. ի դեպ, այս վերջինի մասին արդեն իսկ հայտարարել են արևմտյան մի շարք պետությունների և ՄԱԿ-ի ներկայացուցիչները»:
«Ըստ էության, երկրում «մոլեգնող» զինված առճակատման պայմաններում, երբ Սիրիայի տարածքը հիմնականում բաժանված է առանձին ուժերի վերահսկողության տակ գտնվող շրջանների, երբ առկա են ավելի քան 2.5 մլն փախստականներ, նրանցից առավել քան երկու անգամ ավելի թվով ներքին տեղահանվածներ, այսօրինակ քաղաքական միջոցառումների անցկացումն առավելապես ձևական և քարոզչական բնույթ է կրում: Կասկածից վեր է, որ ընտրություններում հաղթելու է իշխանության թեկնածուն, իսկ ընտրապայքարը լեգիտիմության շղարշով պարուրելու համար հնարավոր է «գրպանային ընդդիմության» որոշ թեկնածուների մասնակցությունը: Ինչ վերաբերում է հիմնական գաղափարական ընդդիմության ներկայացուցիչներին, որոնք հիմնականում գտնվում են արտերկրում, ապա նրանք բնականաբար կբոյկոտեն ընտրությունները, քանի որ անգամ ցանկության դեպքում երկրի նոր ընտրական օրենքի առանձին դրույթներ հնարավորություն չեն ընձեռում նրանց՝ մասնակցելու ընտրական գործընթացին»,- պարզաբանեց արաբագետը:
«Ինչ վերաբերում է նախընտրական շրջանին, ապա կասկածից վեր է, որ առաջիկա ամսվա ընթացքում՝ մինչև հունիսի 3-ը, երկրում աննախադեպ կերպով կթեժանան ռազմական գործողությունները, արտաքին ուժերի կողմից գործող իշխանությունների դեմ կաճեն համակողմանի ճնշումները, չի բացառվում նաև առավել վճռական քայլերը, որոնք ուղղված կլինեն Սիրիայի ներսում իրավիճակի որակական փոփոխությանը»,- կանխատեսեց Ա.Պետրոսյանը: