Վարչապետը նախատեց երիտասարդ ԲՀԿ-ականին. Խոսելու ոճը ես չգիտեմ` փողոցի՞ց եք բերել դահլիճ
«Ես ուզում եմ այսօր կառավարությունը վերջնական իր դիրքորոշումը հայտնի, քանի որ այսօր հոկտեմբերի մեկն է և օրենքը մտել է ուժի մեջ` հետաձգո՞ւմ եք օրենքի կիրառում, թե՞ ոչ»,- ԱԺ-ում իր ցանկության մասին հայտարարեց ԲՀԿ խմբակցության անդամ Վահան Բաբայանը: Հստակեցնենք, որ խոսքը «Շրջանառության հարկի մասին» օրենքին է վերաբերում, որը պատգամավորի մատնանշմամբ, լարվածություն է առաջացրել երկրում:
Հարցին պատասխանեց ՀՀ վարչապետ Հովիկ Աբրահամյանը` իր դժգոհությունն արտահայտելով երիտասարդ պատգամավորի կեցվածքից:
«Պարոն Բաբայան, ընդհանրապես Ձեր կեցվածքը ինձ համար անհասկանալի է` Ձեր, Մարտուն Գրիգորյանի… ուլտիմատումով` կոնկրետ ասեք օրենքը հետաձգում եք, թե ոչ: Նախ օրենքը հետաձգողը դուք եք, մենք չենք: Երկրորդը` այդ խոսելու ոճը ես չգիտեմ, փողոցի՞ց եք բերել դահլիճ: Այն ժամանակ, երբ ես աշխատում էի, նման ոճ չկար»,- հայտարարեց վարչապետը:
Այնուհետ նշեց, որ օրենքը քննարկվել է տարբեր մակարդակներում և այնպես չի եղել, որ օրենքը կառավարությունը վերցրել բերել է Ազգային Ժողով ու վերջինս էլ ընդունել է:
«Հիմա այդ ոճը` պահանջատիրական, այդ փողոցով մեզ ահաբեկելը… այդ բաները, կարծում եմ, այս դահլիճում քննարկելու տեղ չի, կարող եք տանել որտեղ ձեզ հարմար է, այնտեղ քննարկել»,- շեշտեց նա:
Վարչապետ Աբրահամյանն ընդգծեց` կառավարությունը քայլ է կատարել, իջեցրել է բեռը` շրջանառության հարկ:
«Եթե դուք ամենը ճիշտ ներկայացնեք հանրությանը ապա ուղղակի ողջամիտ չի, որ հրաժարվեն 1 տոկոս վճարելուց ու ասեն, թե 3.5 տոկոս են ուզում վճարել»,- նշեց նա:
Վարչապետը նաև հետաքրքրվեց` չի ուզո՞ւմ նույն խորհրդարանն էլ հասկանա, թե ինչումն է խնդիրը:
«Մեզ քննադատում են, թե` կառավարությունը ինչ է, չգիտի՞, թե ովքեր են ստվերում, չեն վճարում: Այո, մենք գիտենք, և սա մեկ քայլ է, որպեսզի փակենք այդ ճանապարհը: Եվ մենք չենք գնալու ստուգենք ՓՄՁ-ին, թեև դա օրենքի պահանջն է, բայց մենք սկսելու ենք խոշորներից, այնտեղ ենք ստուգելու` փաստաթղթավորում կա, թե չկա: Չգիտեմ, թե դա ում հնարածն է, որ գնալու ենք ու թուրը քաշելու ենք` ճնշելու փոքր-միջինին: Ոչ, մեր խնդիրը այն խոշորներն են, որոնք ստվերում են աշխատում»,- հայտարարեց նա:
Վահան Բաբայանն իր խոսքում արձագանքեց, թե չի կարծում, որ պատգամավոր գործընկերների մոտ թողել է չպատգամավորին վայել պահվածք ունեցողի տպավորություն և ընդամենը հարցերը ուղղում է, որովհետև դրսում հավաքված մարդիկ կան:
«Եվ այդ հարցի հետ կապված, օգտվելով մեր պատգամավորական իրավունքից, այո, պահանջում ենք, որպեսզի ստանանք պատասխան: Ընդամենը: Իսկ մնացած առումներով, ես ինչպես հասկացա, դուք թողնում եք ուժի մեջ գործող օրենքը»,- հավելեց նա:
Հովիկ Աբրահամյանը կրկնեց` կառավարությունը չէ ուժի մեջ թողնողը. «Երկրորդ անգամ եմ կրկնում, պարոն Բաբայան»:
Քանի որ ԲՀԿ-ականի խոսափողը դեռ չէին անջատել, Բաբայանը ռեպլիկ թողեց. «Մենք որ լինեինք` կփոխեինք»:
Վարչապետն էլ արձագանքեց. «Դուք դժվար լինեք, ասեմ իմանաք, եթե նման ոճով շարունակեք… և այդ ոճը... ես ձեզ երկու անգամ նաև ասել եմ իմ կարծիքը ձեր facebook-յան էջում գրված անհիմն, սուտ գրառումների մասին… Երիտասարդ եք, և ես ձեզ ուզում եմ հորդորել` լինել անաչառ բոլոր հարցերում: Հիմա դուք մի ճամբար եք ընտրել, թե այնքան եք ժողովրդի մասին մտածում, բայց կառավարությունը մտածող չի. սխալվում եք»:
«Մենք բազմաթիվ փաթեթներ ենք բերում Ազգային ժողով, որը որ սատարում է, բեռը թեթևացնում է, օժանդում է բիզնեսի, տնտեսության զարգացումը, որից պետք է ածանցվի մեր ժողովրդի բարեկեցիկ կյանքը: Զանգ եմ տալիս Ազգային ժողովի նախագահին, խնդրում եմ, առաջարկում եմ, որ խմբակցությունները հավաքվեն, մեր փաթեթը ներկայացնենք մինչև Ազգային ժողով բերելը: Ազգային ժողովի նախագահն ասում է, որ իրենք ցանկություն չունեն: Բա ձեր ցանկությունը ի՞նչ է, ի՞նչ եք դուք ուզում, որ այս երկրում հեղափոխությո՞ւն լինի: Չի լինելու դա: Երկրորդ «Մարտի 1» եք ուզում այս երկրում ունենա՞լ: Ձեր ցանկությունը ի՞նչ է: Մենք ձեզանից չենք խուսափում, առաջարկում ենք համատեղ աշխատանք: Մեր նպատակը դա է, բայց ձեր նպատակն անհասկանալի է գոնե ինձ համար: Ի՞նչ եք ուզում, որն է ձեր ցանկությունը»,- հավելեց վարչապետ Աբրահամյանը:
Վերջում վարչապետը հորդորեց ու նաև խնդրեց բոլոր ուժերին` քաղաքականապես աջակցել կառավարությանը` միասնական տալու այս խնդրին լուծում:
Լրահոս
Տեսանյութեր
Սա քաղաքական գործընթաց է, անթույլատրելի քաղաքական որոշումներ. Թաթոյանը՝ սահմանազատման մասին