Մ. Գրիգորյանը տեղյակ չի` ժողովուրդը փակել է Գյումրի-Երևան ճանապարհը, թե ոչ
ԲՀԿ-ական պատգամավոր Մարտուն Գրիգորյանը այս պահին տեղյակ չէ` գյումրեցիները պահել են իրենց խոստումը և փակել Գյումրի-Երևան ճանապարհը, թե ոչ: Panorama.am-ի հետ զրույցում պատգամավորն ասաց, որ թերևս իրեն այդ մասին տեղյակ կպահեին, բայց տեղյակ է, որ Գյումրիի շուկայում առավոտվանից շարունակվում է առևտրականների բողոքը. մարդիկ հավաքված են իրար գլուխ:
«Երեկ, երբ հանդիպեցի ժողովրդի հետ իրենք պնդում էին, որ եթե վերջնական պատասխան չստանան երեկվա դրությամբ, ապա ճանապարհը կփակեն: Եթե նման բան լիներ կարծում եմ ինձ տեղյակ պահած կլինեին»,- նշեց նա:
Անդրադառնալով կառավարության հետ երեկվա հարցուպատասխանին, Մ. Գրիգորյանը նշեց, որ իրեն Ֆինանսների նախարարի պատասխանը, բնականաբար, չի բավարարել, քանի որ այդ պատասխանը չի կարող բավարարել ժողովրդին: Բայց հարցին` արդյո՞ք ճանապարհ փակելը ցանկալի արդյունքի կբերի, առավել ևս, որ կառավարությունը հասկացրեց` չի պատրաստվում զիջումների գնալ «Շրջանառության հարկի մասին» օրենքի հետ կապված նշեց. «Դե երեկ Գյումրիում հենց այդ վիճակն էր` ժողովուրդը բողոքում է, դժգոհում է, բայց մեծ հաշվով չի էլ հասկանում, թե ուր է գնում ու ինչ է ուզում: Երեկ ես ժողովրդին տեղեկացրեցի, որ մենք պատրաստ ենք ու իրենց հետ ենք, բայց սպասեն գուցե արտահերթ լինի և հարցը քննարկվի: Իսկ եթե ոչ` ապա ազատ են ու թող անեն, ինչ ուզում են ու ինչ գտնում են, որ ճիշտ է: Ամեն դեպքում, երեկ հասանք նրան, որ ավելորդ լարվածությունից խուսափեցինք, բայց հիմա ժողովուրդը պետք է ինքը որոշի իր անելիքը»:
Հիշեցնենք, ԱԺ-ում հարցուպատասխանի ժամանակ ի պատասխան ԲՀԿ-ական պատգամավորի հարցադրման` կա՞ հստակ պատասխան գյումրեցիների հարցին` կառավարությունը պատրաստ է զիջումների գնալ, թե ոչ, այլապես նրանք պատրաստվում են փակել Գյումրի-Երևան ճանապարհը նախարար Գագիկ Խաչատրյանը արձագանքեց. «Կառավարությունը պատրաստ չի նման զիջումների` թողնենք առանց փաստաթղթի որ ի՞նչ լինի»:
Հարակից հրապարակում`
Կառավարությունը պատրաստ չէ նման զիջումների` թողնենք առանց փաստաթղթի որ ի՞նչ լինի. Գ.Խաչատրյան