Ձեր վստահելի աղբյուրը

ԵԽԽՎ-ն այսօր հրատապ կարգով քննարկել է «Մարդկության դեմ սպառնալիքը` առաջացած «Իսլամական պետություն» ահաբեկչական կազմակերպության կողմից. բռնությունը քրիստոնեաների, ինչպես նաև կրոնական ու էթնիկ այլ համայնքների հանդեպ» թեմայով զեկույցը:

ԵԽԽՎ-ում հայկական պատվիրակության անդամ, ԲՀԿ խմբակցության պատգամավոր Նաիրա Զոհրաբյանն իր ելույթում անդրադարձել է Հյուսիսային Իրաքում` «Իսլամական պետություն» ահաբեկչական կազմակերպության կողմց եզդիների հանդեպ իրականացվող ցեղասպանության մասին` կոչ անելով միջազգային հանրությանը կանգնեցնել 21-րդ դարի նորագույն ցեղասպանությունը. «Պիտի անել հնարավորը այս անմարդկային ցեղասպանությունը կանգենցնելու, սովի մատնված փախստականներին օգնելու համար: 100 տարի առաջ տեղի ունեցավ հայ ժողովրդի ցեղասպանությունը և ես շատ լավ գիտեմ, թե ի՞նչ է նշանակում միջազգային հանրության լռությունն ու անգործությունը»,- մասնավորապես հայտարարել է նա:

Ներկայացնում ենք տիկին Զոհրաբյանի ելույթը ստորև.

«Այն, ինչ կատարվում է այսօր Հյուսիսային Իրաքում, այլ կերպ, քան ցեղասպանություն բնորոշել հնարավոր չէ: Անգամ ամենազարհուրելի երազում հնարավոր չէր պատկերացնել, որ 21-րդ դարում հնարավոր են նման վայրագություններ: «Իսլամական պետություն» ծայրահեղական ահաբեկչական խմբավորումը Իրաքի հյուսիսում իրական ցեղասպանություն է իրականացնում. հողին են հավասարեցվում եզդիների և քրդերի տները, գնդակահարվում, մորթվում են բոլոր այն եզդիները, ովքեր չեն համաձայնում կրոնափոխ լինել:

Ծայրահեղականների կարգախոսն է` «Իսլամ, կամ մահ»: Հայտնի են հարյուրավոր դեպքեր, երբ երեխաներին ողջ-ողջ թաղել են մոր աչքի առաջ, իսկ մայրերին բռնաբարել ու սպանել երեխաների աչքի առաջ: Հազարավոր եզդիների, հատկապես կանանց ու երեխաների, անարգելուց հետո, վաճառում են որպես ստրուկ: Բազմաթիվ դեպքեր են եղել, երբ «Իսլամական պետություն» ահաբեկչական խմբավորման կողմից անարգանքի ենթարկված կանայք, վերադառնալով Սինջար լեռան վրա գտնվող փախստականների ճամբարը, իրենց հայրենակիցներին խնդրել են սպանել իրենց: Ու երբ վերջիններս հրաժարվել են, աղջիկներն ինքնասպանություն են գործել` նետվելով ժայռից:

Հազարավոր եզդի փախստականներ մահանում են սովից և ջրի պակասից: Այս ամենը զարհուրելի է և այս ամենը տեղի է ունենում այսօր, ողջ քաղաքակիրթ մարդկության աչքի առաջ: Ինչպիսի՞ հրեշ պետք է լինել` մանկահասակ երեխաների ողջ-ողջ թաղելու համար: Ինչպիսի՞ հրեշ պետք է լինել` իր մասնագիտական պարտականությունը կատարող ամերիկացի լրագրողին հրապարակային գլխատելու համար:

Սեպտեմբերի 21-ին` Հայաստանի անկախության օրը, «Իսլամական պետության» ծայրահեղականները ականապատել ու պայթեցրել են Հայոց Ցեղասպանության զոհերի հիշատակի` Սիրիայի Դեր Զորի Սուրբ Նահատակաց հայկական եկեղեցին: Ինձ համար, որպես հայի, այսօր այս ամենի մասին խոսելը կրկնակի ցավ է, որովհետև հարյուր տարի առաջ Օսմանյան Թուրքիայում իմ 1.5 միլիոն հայրենակիցներ տեղահանվեցին ու ենթարկվեցին ցեղասպանության: 100 տարի առաջ նույն կերպ օսմանական հրեշները ողջ-ողջ թաղում էին երեխաների ու հղի կանանց, սպանում, ավիրում և թալանում:

Մենք պիտի թույլ չտանք, որպեսզի պատմությունը կրկնվի: Իսկ դրա համար անհրաժեշտ է, որ բացի դատապարտող հայտարարություններից, հստակ քայլեր ձեռնարկվեն պատժելու ահաբեկիչ իսլամիստներին ու նրանց հովանավոր երկրներին, որոնք հետևողականորեն շարունակում են զենք ու գումար մատակարարել ահաբեկիչներին: Պիտի անել հնարավորը` այս անմարդկային ցեղասպանությունը կանգենցնելու, սովի մատնված փախստականներին օգնելու համար: 100 տարի առաջ տեղի ունեցավ հայ ժողովրդի ցեղասպանությունը և ես շատ լավ գիտեմ, թե ի՞նչ է նշանակում միջազգային հանրության լռությունն ու անգործությունը»: