Նոր շրջադարձ Ֆաթուլաևի գործում. մտադիր են ներգրավել Ալի Հասանովին
«Գոլոս Արմենիի»-ից` թարգմանաբար.
«Հոկտեմբերի 11-ի գիշերը` ժամը 03:38-ին, ադրբեջանական կայքերից մեկում հայտնվեց մի սենսացիոն վերնագիր` «Իլհամ Ալիևը վերադարձնում է Ղարաբաղը: Առանց մեկ կրակոցի»: Պետք է համաձայնել, որ նման վերնագրով հոդվածը չէր կարող ուշադրություն չգրավել: Կարելի է պատկերացնել, թե սրտի ինչ տրոփյունով են ադրբեջանցի օգտատերերը կլանել տեքստի յուրաքանչյուր տառը` դժվարությամբ հավատալով սեփական աչքերին` ինչպե՞ս, մի՞թե իրականացավ և նախագահը իրագործեց իր բազմամյա խոստումը:
Առավել փորձառու ընթերցողները և, ամենակարևորը, «Հաքքին.ազ» կայքի (որտեղ և հրապարակվել էր նշված աշխատությունը) սեփականատեր ու գլխավոր խմբագիր Էյնուլա Ֆաթուլաևի հակումներին ծանոթ այցելունները չէին կարող ուշադրություն չդարձնել փակագծերում քողարկված նախազգուշացմանը` (մեր վերլուծությունը), ինչը զգուշացնում էր այն մասին, որ պետք չէ լուրջ վերաբերվել սույն հրապարակմանը:
Հենց այդկերպ կայքը հեռատեսորեն տեղեկացնում է ընթերցողներին Ֆաթուլաևի հերթական բարբաջանքի մասին և դրանով իսկ նախապես հայցում է ընթերցողի ներողամտությունը «Հաքքին.ազ»-ի հեղինակի վերլուծական մտքի փայլատակումների համար: Սակայն այս անգամ Ֆաթյան (ինչպես որ քնքշորեն անվանում էին Էյնուլային Բաքվի բանտում) գերազանցեց ինքն իրեն: Վերոհիշյալ վերնագրով հոդվածը չի կարելի նույնիսկ վերլուծություն անվանել. այն, որքան որ հնարավոր է քաղաքավարի արտահայտվել` տիրոջ բարեգթության և բարեհաճության հուսահատ ակնկալիքով հեշտասեր պնակալիզության անհագուրդ պահանջմունքով լի ձոն է:
Այլկերպ ինչպե՞ս կարելի է գնահատել, օրինակ` այս տողերը. «Խոսքն այն մասին է, թե ինչպես 40-ամյա երիտասարդ մարդը, որին բաժին է հասել ծանր ժառանգություն` ավերված տնտեսությունով, քաղաքական քաոսով բռնկված աղքատ երկիր, որը չուներ բռնությամբ խլված բնիկ հողերի վերադարձման հստակ հեռանկար, ոչ միայն դուրս եկավ խճճված աշխարհաքաղաքական լաբիրինթոսից, ոչ միայն վերածնեց տնտեսությունը և ստեղծեց զմրուխտե քաղաք, այլ նաև վերադարձնում է քառորդ դար առաջ օկուպացված Ղարաբաղը: Այսօր խոսքը Ադրբեջանի քաղաքական և դիվանագիտական խոշորագույն հաջողության մասին է: Ահա այժմ էլ Ղարաբաղն առանձնացնում են Հայաստանից: Մաքսային պատով: Այդպիսով Ի. Ալիևը փայլուն քաղաքական կոմբինացիա խաղարկեց: Նա չմտավ եվրասիական տարածք, պահպանեց իր ինքնուրույնությունն ու ինքնիշխանությունը, սակայն հասավ գլխավոր խնդրի լուծմանը` Ղարաբաղը Հայաստանի տնտեսական տարածքից դուրս է բերված»: Եվ այսպես շարունակ` նույն ոգով…
Ահա այսպիսի «վերլուծական» եզրակացություններ է կատարում Ֆաթուլաևը ԵԱՏՄ-ին Հայաստանի անդամակցումից: Եվ նույնիսկ չի ամաչում ասվածին հավելել ակնհայտ սուտը, իբրև թե` «Նուրսուլթան Նազարբաևը ելույթ է ունեցել սենսացիոն հայտարարությամբ: Հայաստանին պուտինյան Եվրասիական միություն ընդունել են առանց Ղարաբաղի»: Ավելորդ է ասել, որ դժվար թե ինչ-որ մեկը նույնիսկ Ադրբեջանում լսել է Նազարբաևի այդ հայտարարությունը: Հավանաբար այն վիրտուալ կայծակի նման փայլատակել է տիրոջը հաճոյանալու չափազանց բուռն ձգտումից բորբոքված Ֆաթիի ուղեղում, ով գիշերվա կեսին նստել էր քծնանքի ու անզուսպ շողոքորթության ներբող գրելու համար:
Ադրբեջանական քարոզչամեքենայի կողմից ապուշացված միջին վիճակագրական ադրբեջանցուն թողնենք Ղարաբաղի վերադարձման հավերժ սպասման մեջ: Փորձենք հասկանալ` ինչու՞ Ֆաթուլաևին պետք եղավ այդքան ստորաքարշ կերպով Ալիևին հիշեցնել, որ ինքը փողով համեմված միապետական բարեգութ հայացքի համար ամեն ինչի պատրաստ է: Ամեն ինչ շատ պարզ է. հայկական մամուլում Ադրբեջանի նախագահի վարչախմբի հասարակական-քաղաքական բաժնի ղեկավար Ալի Հասանովի անմիջական ուղղորդմամբ ձեռնարկվող` Ֆաթուլաևի եվրոպական մեքենայությունների մասին հրապարակումից հետո լրագրողի հանդեպ վերաբերմունքն անմիջապես փոխվել է: Հիշեցնենք, որ հրապարակումներում խոսքն այն մասին էր, որ Ադրբեջանի նախագահի աշխատակազմին առընթեր ՀԿ աջակցության Խորհրդի տրամադրած գրանտների հաշվին Ֆաթուլաևը այնպիսի գործունեություն է ծավալել, որն ուղղված է եղել Եվրամիության երկրներում իրավիճակի ապակայունացմանը, հակասեմիթական և արմատական իսլամիստական շարժումներին աջակցությանը, ինչպես նաև եվրոպացի ակնառու գործիչների նկատմամբ կոմպրոմատների որոնմանը:
Ընդ որում նախկին իրավապաշտպանն ակտիվորեն զբաղվել է ֆինանսական մեքենայություններով, ինչի արդյունքում նրա դեմ գերմանացի իրավապաշտպան Հարի Մուրեյը դատական հայց է ներկայացրել: Գերմանացի իրավապաշտպանին Ֆաթուլաևն առաջարկել է գլխավորել Ստրասբուրգում գրանտային փողերով հիմնադրված Եվրոպական տեղեկատվական-իրավապաշտպանական կենտրոնը, իսկ հետո պարզապես խաբել և դուրս է հանել նրան:
«ՀՁ»-ի աղբյուրների համաձայն` մամուլում հայտնված հրապարակումներից հետո, որտեղ բացահայտված էին ոչ միայն կեղտոտ մեքենայությունները, այլ նաև ակտիվ կերպով շրջանառվում էր Հասանովի անունը` դրանով իսկ ապացուցելով աշխատակազմի և անձամբ Իլհամ Ալիևի մասնակցությունը Ֆաթուլաևի գործունեությանը, Բաքվում խիստ անհանգստացել են: Հենց այդ պատճառով էլ սեփական ագահության հետևանքով այդքան թեթևամտորեն բացահայտված Էյնուլայի գլխի վերևում ամպեր են կուտակվում: Եվ նախկին իրավապաշտպան` այժմ գլխավոր պալատական պնակալեզ Ֆաթին, ստիպված է ամբողջ ուժով ապացուցել, որ նա դեռևս պետք է իր տերերին: Ինչպես կարելի է հեշտությամբ համոզվել «Հաքքին.ազ»-ի վերոնշյալ հոդվածը կարդալով` ամեն ինչ գործի է դրված: Այդ թվում նաև ռուս-ադրբեջանական բարեկամության և Կրեմլի իմաստնության փառաբանումը, ինչի շնորհիվ, ինչպես ոգևորված ստում է Ֆաթուլաևը`«Ալիևն առանց մեկ կրակոցի Ղարաբաղը հետ է ստացել»:
Մնում է ենթադրել, որ Արցախը Բաքվին «վերադարձնելու» այլ տարբերակ չեն պատկերացնում` քաջ գիտակցելով, որ ռազմական գործողություններ սկսելը Ադրբեջանին կբերի միայն հերթական պարտություն: Կարծես` Ֆաթուլաևը «մոռացել» է իր կայքում հրապարակված հակառուսական ու հակապուտինյան հոդվածների շարքը, որոնցից հորդում էր արմատացած ռուսաֆոբիան: «Հանուն մարդու իրավունքների պայքարող այդ մարտիկը» «մոռացել» է նաև այն մասին, թե ինչպես էր Եվրոպայի Խորհրդի շենքի առաջ ծածանել Ռուսաստանի նախագահին վիրավորող հսկայական ցուցապաստառը:
Ինչպես նշվում էր «ՀՁ»-ի հրապարակումներում` Ստրասբուրգի դատարանում ներկայումս երկու հայց են ուսումնասիրում: Դրանցից մեկը ներկայացվել է կենտրոնի կողմից և վիճարկում է Աշխատանքային դատարանի որոշման օրինականությունը, որը ավելի վաղ վճռել էր բավարարել Հարի Մուրեյի պահանջները` ընթացիկ տարվա առաջին 3 ամիսների աշխատավարձի վճարման հետ կապված: Այս գործով դատական նիստը պետք է տեղի ունենար հոկտեմբերի 10-ին, սակայն կենտրոնի ներկայացուցիչ Մուստաֆա Ալինչաի խնդրանքով այն հետաձգվել է մինչև հոկտեմբերի 19-ը: Երկրորդ գործը վերաբերում է Հարի Մուրեյի հայցին, որով նա պահանջում է իրեն վճարել հաջորդ ամիսների աշխատավարձը, ինչպես նաև հաստատել աշխատանքային պայմանագրի պաշտոնական խզումը: Այս հայցի շուրջ լսումները պետք է կայանային հոկտեմբերի 16-ին, սակայն կրկին պատասխանողի խնդրանքով այն հետաձգվել է մինչև նոյեմբերի 7-ը: Կարելի է վստահորեն ենթադրել, որ Ֆաթուլաևը և նրա հանցակիցները դա արել են պաշտոնական Բաքվի պահանջով:
Ահա այստեղ սկսվում է ամենահետաքրքիրը: Բանն այն է, որ Հարի Մուրեյի փաստաբանը կենտրոնի կողմից պատասխանողին հայցային հայտարարություն է ուղարկել: Եզրակացության տեքստում բացի հայցվորին վերաբերող կետերից կա նաև շատ հետաքրքիր կետ, որն ունի քաղաքական բնույթ: Փաստաբանը պնդում է, որ գործում խառնված է նաև Ադրբեջանի նախագահի վարչախմբի աշխատակից Ալի Հասանովը, որի ցուցումով հրապարակվել են հակասեմիթական բովանդակությամբ հոդվածներ: Դեռ ավելին` ներկայումս դիտարկվում է Ալի Հասանովին որպես վկա դատարան կանչելու հնարավորությունը:
Հենց այս փաստաթղթի ստանալուց հետո էլ Ալինչան հրատապ խնդրանքով դիմել է` գործի քննությունը հետաձգելու համար: Բաքվում ակնհայտ տագնապի մեջ են. կատակ չէ` Ալիևի վարչախմբի առանցքային դեմքերից մեկը Եվրոպայում հայտնվում է սկանդալի մեջ, այն էլ` հակասեմիթական երանգներով: Պաշտոնական Բաքվի այդքան կարևոր անձի հիշատակումը ֆրանսիական դատարանում ենթադրում է Եվրոպայում լուրջ ուշադրության կենտրոնացում Ֆաթուլաևի կեղտոտ գործերի և ի դեմս Ալի Հասանովի` նրա մասին հստակ հոգ տանող նախագահական վարչախմբի վրա: Սա արդեն ոչ թե առաջին ատյանի դատարանում հասարակ վիճարկում է, այլ Եվրամիության մայրաքաղաքում քաղաքական աղմկոտ սկանդալ:
Կասկած չկա, որ Բաքվում կանեն ամեն ինչ, որպեսզի քողարկեն սկանդալը և թույլ չտան Հասանովին դատարան կանչել: Ֆաթուլաևի ճակատագիրն այստեղ այնքան էլ կարևոր չէ, և հնարավոր է` հենց նրան կզոհեն վարչախմբում, որպեսզի ջրից չոր դուրս գան: Սակայն ներկայումս իրավիճակն այնպիսին է, որ Ադրբեջանի նախագահի վարչախմբի ամենաազդեցիկ մարդկանցից մեկին, ամենայն հավանականությամբ, սպասվում է այցելություն դեպի դատարան` որպես վկա: ԴԵՌԵՎՍ որպես վկա…»
Լրահոս
Տեսանյութեր
Անահիտ աստվածուհու արձանը կցուցադրվի Հայաստանի պատմության թանգարանում պահվող բացառիկ նմուշների հետ
