Ինչու՞ Թուրքիան թույլատրեց Իրաքի քրդերին՝ աջակցելու սիրիացի իրենց ցեղակիցներին. մեկնաբանում է փորձագետը
«Թուրքական իշխանությունների կողմից իրաքյան քրդերի «փեշմարգային» թուրք-սիրիական սահմանը հատելու հնարավորություն տալու հանգամանքն առավելապես իրավիճակային քայլ էր՝ պայմանավորված Սիրիայի հյուսիսում՝ Այն ալ-Արաբում (քրդական անվանումը Քոբանի), քրդական ինքնապաշտպանական ուժերի և «Իսլամական պետության» զինյալների միջև ընթացող ռազմական գործողությունների տրամաբանությամբ մասնավորապես և իսլամականների դեմ ձևավորված միջազգային կոալիցիայի գործունեությանը Թուրքիայի որոշակի մասնակցության հարցով ընդհանրապես»,- այս մասին Panorama.am-ի թղթակցի հետ զրույցում նշեց արևելագետ Արմեն Պետրոսյանը՝ մեկնաբանելով տեղեկատվությունն առ այն, թե Թուրքիան համաձայնել է թույլատրել Իրաքի քրդերին՝ աջակցելու Քոբանիում մարտնչող իրենց սիրիացի ցեղակիցներին:
Ըստ փորձագետի՝ «Վերջին մի քանի օրերին Քոբանիում իրավիճակի շրջադարձային փոփոխությունը հօգուտ քրդերի, միջազգային կոալիցիայի և հատկապես ԱՄՆ-ի սկզբունքային դիրքորոշումը՝ քաղաքի ճակատագրի հետ կապված, հարկադրեցին Անկարային՝ վերանայել քրդերին որևէ աջակցություն ցուցաբերելուց հրաժարվելու նախկին քաղաքականությունը: Նման կերպ թուրքական իշխանություններն, ըստ էության, փորձում են հնարավորինս մեղմել սիրիական ճգնաժամի շրջանակներում իրականացրած հերթական սխալ հաշվարկը, մինչդեռ իրականում պարզից էլ պարզ է, որ թուրքական իշխանությունները հերթական տապալումն են արձանագրում»:
«Մյուս կողմից, Քոբանիում մարտերը փաստացիորեն ղեկավարող քրդական «Ժողովրդավարական միություն կուսակցությանը» հռչակելով որպես թուրքական «Քրդստանի բանվորական կուսակցության» սիրիական ճյուղավորում՝ այսինքն՝ ահաբեկչական կառույց, այն բանից հետո երբ սիրիական կուսակցության համանախագահ Սալիհ Մուսլիմը հրաժարվել էր ընդունել թուրքական իշխանությունների պահանջները՝ սիրիական հակակառավարական կառույցների հետ միասին պայքարի սլաքն ուղղել սիրիական գործող վարչակարգի դեմ, թուրքական իշխանությունները, փաստորեն, կորցրին սիրիացի քրդերի հետ ինքնուրույն հարաբերվելու հնարավորությունները:
Իսկ նման կերպ, օգտագործելով Իրաքյան Քրդստանի տարածաշրջանային կառավարության ղեկավար Մասուդ Բարզանիի տարբերակը, կփորձեն հետագայում, անհրաժեշտության դեպքում դարձյալ հարաբերվել, ավելին՝ իրենց ազդեցության ուղեծրում առնել ԺՄԿ-ին, ինչի հավանականությունն, ըստ իս, ևս նվազագույն հավանականություն ունի»,- նշեց Պետրոսյանը՝ հավելելով, որ նման կերպ, իհարկե, Թուրքիան փորձում է շարունակել նաև քրդերի միջև հակասություններ սրելու սեփական քաղաքականությունը:
Լրահոս
Տեսանյութեր
«Ազատություն քաղբանտարկյալներին». ակցիա՝ Հայաստանում ԵՄ պատվիրակության գրասենյակի դիմաց
