Իշխանափոխության վերաբերյալ բոլոր տվայտանքներն ընդամենը փոթորիկ են մեկ բաժակ ջրում. Շարմազանով
Հոկտեմբեր ամիսը հագեցած էր թե արտաքին քաղաքական, թե ներքաղաքական իրադարձություններով: Հոկտեմբերի 10-ին Մինսկում ստորագրվեց Եվրասիական տնտեսական միության մասին պայմանագրին Հայաստանի միանալու մասին պայմանագիրը: Այս մասին ԱԺ-ում հայտարարությունների ժամին հիշեցրեց ԱԺ փոխնախագահ Էդուարդ Շարմազանովը` հայտարարելով, որ նման որոշումը պայմանավորված էր տնտեսական զարգացման նոր հնարավորություններով, որոնք լայնորեն բացվում են Հայաստանի առջև:
«Ավելին՝ այն նոր հեռանկարներ է բացում նաև օտարերկրյա ներդրողների համար, որոնք Հայաստանի տնտեսական տարածքով կարող են ավելի դյուրացված կարգով դուրս գալ ԵՏՄ միասնական շուկա: Հարկ է նշել, որ Հայաստանը նաև պատրաստ է շարունակելու երկխոսությունը Եվրամիության անդամ երկրների հետ բոլոր հնարավոր ուղղություններով»,- ընդգծեց Է.Շարմազանովը:
Շարունակելով հոկտեմբերյան կարևոր իրադարձությունների հիշատակումը` նա անդրադարձավ նաև հրապարակված սահմանադրական բարեփոխումների հայեցակարգին, որի վերաբերյալ Վենետիկի հանձնաժողովն իր եզրակացության մեջ նշել էր` «բարեփոխումների նպատակներն արժանի են լիակատար աջակցության, քանի որ դրանք ամբողջովին ուղղված են Եվրոպայի խորհրդի արժեքների իրացմանը»:z
«Ակնհայտ է, որ նման կարևորագույն բարեփոխումը պետք է իրականացվի մասնագիտական և քաղաքական լայն շրջանակների հետ քննարկումների արդյունքում: Տարակուսելի է, որ երկրում համակարգային փոփոխություններ պահանջող որոշ ընդդիմադիր կամ պսևդոընդդիմադիր ուժեր, կտրուկ փոխելով իրենց դիրքորոշումը, հանկարծ հիշեցին, որ երկրում նման բարեփոխումների անցկացման անհրաժեշտություն չկա՝ մտահոգվելով, թե այսկերպ իշխանությունները ցանկանում են վերարտադրվել:
Նման պնդումը քաղաքագիտական անգրագիտություն է, քանի որ աշխարհի ցանկացած ժողովրդավարական երկրում ցանկացած իշխանություն ցանկանում է վերարտադրվել և վերարտադրվել ընտրությունների միջոցով»,- շեշտադրեց ՀՀԿ-ական գործիչը:
Իսկ անդրադառնալով ընդդիմության դաշտից հնչող որոշ հայտարարություններին` հավելեց. «Հոկտեմբերի 19-ին 13 համայնքում տեղի ունեցան համայնքապետերի ընտրություններ, որտեղ ժողովրդի ճնշող մեծամասնությունն իր վստահության քվեն տվեց ՀՀԿ թեկնածուներին: Ուստի, իշխանափոխության վերաբերյալ բոլոր տվայտանքներն ընդամենը փոթորիկ են մեկ բաժակ ջրում»: