Այս իրավիճակը հնարավոր է փրկել միայն իշխանափոխության միջոցով. Վ.Օսկանյան
«Մենք բոլորս այսօր այստեղ ինքնանպատակ չենք եկել, եկել ենք նույնիսկ պարտադրված ու ստիպված: Եկել ենք, որովհետև այլևս այլընտրանք չունենք և դա գալիս է այսօրվա հրամայականից. երկիրը ծանր վիճակի մեջ է և եթե այսպես թողնենք շարունակվի, ապա եկեք արձանագրենք, որ մենք անդառնալիորեն վտանգելու ենք երկրի ֆիզիկական, տնտեսական անվտանգությունն ու ինքնիշխանությունը» ,- Ազատության հրապարակում ընթացող եռյակի հանրահավաքի ժամանակ հայտարարեց ԲՀԿ-ական Վարդան Օսկանյանը:
Նրա մատնանշմամբ` իշխանությունները տեսնում, բայց արհամարհում են այս ծանր վիճակը և նրանք բացարձակ պատրաստ չեն որևէ բան փոխել իրենց գործունեության մեջ: Ավելին, «սահմանադրական բարեփոխումների ավանտյուրայի միջոցով» էլ փորձում են երկարացնել իրենց իշխանությունը:
Այս իրավիճակը, ըստ Վ.Օսկանյանի, հնարավոր է փրկել միայն իշխանափոխության միջոցով և միայն ազատ ու արդար ընտրությունների արդյունքում ձևավորված իշխանությունը կարող է դիմագրավել բոլոր մարտահրավերներին: Նրա համոզմամբ` այդ հասարակական պահանջը կա իշխանափոխությունն իրականացնելու համար:
«Մի կողմից կա իշխանություն իր ձախողումներով, իր վերարտադրվելու հետին նպատակներով, իր նեղ շահերով, իսկ մյուս կողմից կա ընդդիմություն, որը հետապնդում է ժողովրդի շահերը: Հայաստանում երբեք այսպիսի քաղաքական իրավիճակ չի ստեղծվել. կա իշխանափոխության հասարակական պահանջ և դրա ապացույցը նաև այս բազմամարդ հանրահավաքն է»,- ընդգծեց նա:
Ըստ Վ.Օսկանյանի` եռյակի առաջնորդները կարողացել են իրենց շահերը մի կողմ դնել և կանգնել ժողովրդի շահերի կողքին, իսկ բացի այս` այս ընդդիմությունը պաշտոններ չի հետապնդում, իսկ իշխանափոխություն էլ ահսկանում է միայն ու միայն արդար ընտրությունների միջոցով:
«Ես գիտեմ, որ պարոն Ծառուկյանը ներկայացնելու է ճանապարհային քարտեզ ու ասելու է, թե մենք ինչ ենք պահանջելու: Կարող եմ ասել, որ այդ պահանջների չիրականացման դեպքում այդ պահանջները կրկնապատկվելու են: Մեր զինանոցում շատ բան կա, բայց այդ ամենը անելու ենք խաղաղ ճանապարհով, օրենքով»,- նշեց նա ու հավելեց, որ հավաքվածների աչքերում տեսնում է, որ հաղթանակն իրենցն է լինելու:
Լրահոս
Տեսանյութեր
Նկարիչների միության շենքը պետականացնելուց հետո կարող է պայման դնեն՝ Արարատը չնկարեք . Փաստաբան