Ալեքսանդր Իսկանդարյան. «Ուկրաինան նման է առանց բռնակի ճամպրուկի»
«Ուկրաինական ճգնաժամը իր բնույթով կրկնում է հետխորհրդային տարածքում տեղի ունեցած ռազմական հակամարտությունները, որոնք առկա էին 1990-ական թթ.-ի սկզբին և 2008թ.-ին՝Վրաստանում հնգօրյա պատերազմի օրերին: Ճգնաժամի մեկ այլ առանձնահատկություն կայանում է նրանում, որ այն հետխորհրդային տարածքի առաջին այսպես կոչված «հիբրիդային պատերազմն» էր»,-այսօր Կովկասի ինստիտուտի կողմից կազմակերպած «Ուկրաինական ճգնաժամը և դրա ազդեցությունը Հարավային Կովկասի վրա» կլոր սեղանի ընթացքում ասաց Կովկասի ինստիտուտի փոխտնօրեն, քաղաքագետ Սերգեյ Մինասյանը:
Նա նշեց, որ «հիբրիդային պատերազմը» ընթանում էր երկու պետությունների՝Ռւկրաինայի և Ռուսաստանի միջև, որպես ակտորներ, որոնք կիրառում էին տեղեկատվական պատերազմներին հատուկ գործողություններ:
«Ուկրաինական ճգնաժամը շատ արագ էսկալացիայի ենթարկվեց՝սկսվելով ռուսական հատուկ ջոկատայինների կողմից լոկալ գործողությունից Ղրիմում՝ վերածվելով Եվրոպայի կենտրոնում ռազմաօդային ուժերի, զրահատեխնիկայի կիրառմամբ լայնածավալ պատերազմի»,-նշեց Ս.Մինասյանը:
Նրա խոսքով, Ուկրաինայում «հիբրիդային պատերազմի» ընթացքում շատ կարևորվեց տեղեկատվական-քարոզչական բաղադրիչը և անգամ իրենով այն փոխարինում էր ռազմա-քաղաքական բաղադրիչը:
Զուգահեռներ անցկացնելով ուկրաինական ճգնաժամի և ղարաբաղյան հակամարտության միջև Մինասյանը նշեց, որ եթե ղարաբաղյան հակամարտության գոտում սկսվեն ռազմական գործողություններ, ապա դրանք հնարավոր կլինի վարել այն ուժերով, որոնք առկա են Հայաստանում, ԼՂՀ-ում և Ադրբեջանում, իսկ առաջին հայացքից առկա ռազմական գերակշռությունը կարող է էական դեր չխաղալ պատերազմի ելքի վրա:
Նրա խոսքով, ուկրաինական ճգնաժամը ցույց տվեց, որ փոքրաթիվ և լավ վարժված զինված խմբավորումները կարող են մեծ հաջողությամբ դիմակայել հարյուրավոր զինտեխնիկայով զինված մեծ բանակներին:
«Ուկրաինական ճգնաժամը նոր «սառը պատերազմի» սկիզբ ազդարարեց աշխարհում, իսկ ՆԱՏՕ-ն սկսել է ուժեղացնել իր ռազմական պոտենցիալը Եվրոպայում»,-նշեց Ս.Մինասյանը:
Քաղաքագետի խոսքով, Ուկրաինան այլևս չի կարողանա այնքան մեծ քանակությամբ զենքեր մատակարարել Ադրբեջանին և Վրաստանին ու Կիևը դուրս է մնում Հարավային Կովկասում միլիտարիզացիայի ու սպառազինությունների մրցավացքից:
Իր հերթին, կլոր սեղանի մեկ այլ մասնակից, Կովկասի ինստիտուտի տնօրեն, քաղաքագետ Ալեքսանդր Իսկանդարյանը, անդրադառնալով Ուկրաինայում տեղի ունեցած խորհրդարանական ընտրություններին, նշեց, որ այն ինչ տեղի է ունենում Ուկրաինայում շատ կարևոր է և այն կարող է ազդել ողջ հետխորհրդային տարածաշրջանի վրա:
«Ընտրությունների արդյունքները շատ հետաքրքիր են: «Տարածաշրջանների կուսակցությունը» բավականին լավ արդյունք է գրանցել՝հաշվի առնելով այն հանգամանքը, որ իրենք չունեին Ղրիմի, Դոնեցկի և Լուգանսկի ձայները, քանի որ նրանց չէին մասնակցում ընտրություններին:Հենց այդ տարածաշրջաններում է կենտրոնացած այդ կուսակցության հիմնական էլեկտորատը»,-նշեց Ա.Իսկանդարյանը:
Նա նշեց, որ ուկրաինական ազգայնականությունը այսօր կենտրոնացել է Կիևի և Դնեպրոպետրոսվկի միջև, իսկ երկրի արևելքում առկա է լուռ անհամաձայնություն, դժգոհություն այն ամենի հետ կապված, ինչ կատարվում է երկրում:
Իսկանդարյանի խոսքով, Ուկրաինան գտնվում է լուրջ տնտեսական ճգնաժամի մեջ և Արևմուտքը դժվար թե գտնի այնքան ֆինանսներ, որ փրկի Կիևը:
«Ուկրաինան այս տեսքով նման է առանց բռնակի ճամպրուկի և հասկանալի չէ, թե ինչ անել նաև Լուգանսկի ու Դոնեցկի հետ: Այսօրվա Ուկրաինան չի կարող լինել ԵՄ-ի ասոցացման համաձայնագրի անդամ»,-հավելեց Ա.Իսկանդարյանը:
Լրահոս
Տեսանյութեր
Անահիտ աստվածուհու արձանը կցուցադրվի Հայաստանի պատմության թանգարանում պահվող բացառիկ նմուշների հետ
