Ուկրաինան Դոնբասը վերածում է «պաշարված ամրոցի»
Ուկրաինայի էներգետիկայի և ածխային արդյունաբերության նախարարությունը այսօր հայտարարել է, որ դադարեցնում է Դոնբասում գործող 252 ձեռնարկությունների աշխատանքը: Նախարարության հայտարարության մեջ նշվում է, որ հակաահաբեկչական գործողությունների իրականացման վայրից դեպի Ուկրաինայի կողմից վերահսկվող տարածքներ են դուրս բերվելու ձեռնարկությունների գույքը, փաստաթղթերը և աշխատակիցները:
Կիևը իրականացնում է Դոնբասի շրջափակումը
Ուկրաինայի նախագահ Պյոտր Պորոշենկոն հայտարարել է Դոնբասի նկատմամբ տնտեսական շրջափակում իրականացնելու մասին, իսկ վարչապետ Արսենի Յացենյուկը խոստացել է դադարեցնել կենսաթոշակների վճարումները Դոնբասի՝ Դոնեցկի և Լուգանսկի մարզերում գտնվող թոշակառուներին:
Դեկտեմբերից Ուկրաինայի պետական բյուջեից գումարներ չեն հատկացվելու անջատողականների վերահսկողության տակ գտնվող շրջաններ: Ուկրաինայի կառավարությունը հայտարարել է, որ ֆինանսական աջակցություն է ցուցաբերելու այն թոշակառուներին, ովքեր կլքեն հակաահաբեկչական գործողությունների իրականացման տարածաշրջանը՝ Դոնբասը և կտեղափոխվեն այն շրջաններ, որոնք վերահսկվում են Կիևի կենտրոնական իշխանությունների կողմից:
Կարմիր Խաչի միջազգային կազմակերպության ներկայացուցիչները այսօր հայտարարել են, որ Դոնբասի տնտեսական շրջափակումը կարող է հանգեցնել հումանիտար լրջագույն աղետի: Կարմիր խաչը իր մտահոգությունն է հայտնել Դոնբասի բժշկական կենտրոնների, դպրոցների, բանտերի ապահովության խնդիրներով, քանի որ շրջափակումը միայն վատթարացնելու է իրավիճակը Դոնեցկի և Լուգանսկի մարզերում:
Դոնեցկում և Լուգանսկում այս պահին չի գործում ոչ մի բանկոմատ, իսկ բնակչությունը մնացել է առանց դեղորայքի և այլ անհրաժեշտ իրերի: Ուկրաինայի փոստային ծառայությունը՝ «Укрпочта» նախօրեին հրաժարվել է փոստային ծառայություններ մատուցել Դոնբասի բնակիչներին:
Ընդհանուր առմամբ ծանր է իրավիճակը ողջ Ուկրաինայում, որը տնտեսագետների գնահատականներով կանգնած է սննկացման եզրին: Մայդանից մեկ տարի անց Ուկրաինան գտնվում է նախադեֆոլտային իրավիճակում և շատ տնտեսագետների կարծիքով ուկրաինական տնտեսությունը գտնվում է ճգնաժամի մեջ: Ազգային արժույթը՝ գրիվնան տարվա սկզբից արժեզրկվել է 100%-ով, երկրի ոսկու պաշարները կրճատվել են 12.5 միլիարդ դոլարով, նախատեսվում է ՀՆԱ-ի 7%-ոց անկում: Դոնբասում տեղի ունեցած պատերազմը միայն խորացրել է ուկրաինական տնտեսության ճգնաժամը: Դոնեցկի և Լուգանսկի մարզերում արտադրվում էր տնտեսության ՀՆԱ-ի 16%-ը և արդյունահանվում ածխի 95%-ը:
Սեպտեմբերին Լուգանսկում արտադրությունը նվազել է 85%-ով, Դոնեցկում՝ 60%-ով:
Գյուղատնտեսական ոլորտը չի աճում և հետընթաց է ապրում: Արժույթի միջազգային հիմնադրամը Կիևին ֆինանսական աջակցություն է տրամադրում՝ պահանջելով իրականացնել բարեփոխումներ և կրճատել սոցիալական ծախսերը, ինչն էլ հանգեցնում է հասարակության դժգոհությանը:
Դոնբասը ավելի ծայրահեղ կեցվածք է ընդունելու
Լուգանսկի ժողովրդական հանրապետության ղեկավար Իգոր Պլոտնիցկին հայտարարել է, որ Պյոտր Պորոշենկոյի Դոնբասի տնտեսական շրջափակման մասին օրենքը ցեղասպանություն է Դոնեցկի և Լուգանսկի ժողովուրդների նկատմամբ: Իր հերթին, Դոնեցկի ժողովրդական հանրապետության խորհրդարանի փոխխոսնակ Դենիս Պուշիլինը նշել է, որ տնտեսական շրջափակման մասին օրենքը Մինսկի կրակի դադարեցման համաձայնագրի կոպիտ խախտում է:
Չդադարող հրետակոծության և տնտեսական շրջափակման պայմաններում Դոնբասի բնակչության միակ հույսը մնում է Ռուսաստանը և նրա հումանիտար, ֆինանսական և ինչու ոչ նաև ռազմական օգնությունը: Ռուսական կողմը նոյեմբերի 30-ին թվով 8-րդ մարդասիրական օգնությունը տեղափոխող ավտոշարասյունն է ուղարկելու Դոնբաս:
Իր այդ քայլերով Մոսկվան շարունակում է շահել տեղի բնակչության համակրանքը և ռուսամետ դիրքորոշումը: Ուկրաինական իշխանությունները կարծես կամովին դուրս են թողնում Դոնբասը Ուկրաինայի սոցիալ-տնտեսական, քաղաքական տարածքից՝ դրդելով տեղի բնակչությանը զենքի ուժով մինչև վերջ պայքարել իրենց ինքնորոշման իրավունքի համար:
Կիևը ցանկանում է օղակի մեջ առնելով Դոնբասը «խեղդել» այդ տարածաշրջանը և արհեստականորեն հումանիտար աղետ հրահրելով դատարկել այդ շրջանները՝ ստիպելով տեղացիներին արտագաղթել Ռուսաստան:
ՄԱԿ-ի տվյալներով, Դոնբասում ռազմական գործողությունների գոտում գտնվում է 2 միլիոն մարդ, իսկ քարորդ միլիոնը դարձել է փախստական: Ուկրաինական տվյալներով, պատերազմի հետևանքով ներքին տեղահանված անձանց թիվը հասել է կես միլիոնի:
Այսպիսով, ուկրաինական իշխանությունների Դոնբասը տնտեսապես շրջափակելու որոշումը հանգեցնելու է Դոնեցկի և Լուգանսկի դիրքորոշումների կոշտացմանը՝ այդ թվում հասարակության դժգոհության ֆոնի ներքո, ինչը կարող է արտահայտվել Ռուսաստանի կազմի մեջ մտնելու դիրքորոշմանն հանգելու մեջ:
Արտյոմ Բալասանով, վերլուծաբան