Ձեր վստահելի աղբյուրը

Ռուսաստանում հրաժարվում են հացահատիկ արտահանել արդեն նաև Հայաստան: Հիշեցնենք, որ օրեր առաջ հացահատիկի արտահանումը խիստ սահմափակվել էր, իրավասու մարմինը թույլտվություն էր տալիս միայն Հայաստան, Թուրքիա, Եգպիտոս, Հնդկաստան արտահանելու համար:

«Ինտերֆաքս»-ի  փոխանցմամբ, Գյուղատնտեսական ապրանքների արտահանողների ազգային ասոցիացիան հանդես է եկել հայտարարությամբ, ըստ որի ընկերությունները դադարեցրել են արտահանման նպատակով կատարվող գնումները մինչև ռուսական շուկայում կայունություն լինի: Հայտարարությունում նշվում է, որ ասոցիացիայի անդամները կառավարության նման մտահոգ են հացահատիկի ներքին շուկայում տիրող իրավիճակի վերաբերյալ: Ասոցիացիայի հայտարարության մեջ նշվում է, որ արտահանման նպատակով հացահատիկի գնումներ չեն իրականացվի, քանի դեռ ներքին շուկայում իրավիճակն ու գները չեն կայունացել: Հայտարարության ներքո ստորագրել են ասոցիացիայի բոլոր անդամները:

Ավելի վաղ հայտարարվել էր, որ Ռուսաստանում հացահատիկը թանկացել է 50%-ով, չնայած այն բանին, որ այս տարի առատ բերք էր եղել:
Նշվում է, որ այս տարվա հունիսի մեկից Ռուսաստանից արտահանվել է 19 մլն տոննա հացահատիկ: Ռուսաստանից հացահատիկ գնում է աշխարհի ավելի քան 50 պետություն:

Հիշեցնենք, որ ամփոփելով բուսաբուծության ոլորտում գյուղատնտեսական տարվա արդյունքները` գյուղատնտեսության նախարարի տեղակալ Սամվել Գալստյանը հայտնել էր, որ գյուղատնտեսական մշակաբույսերի արտադրության ծավալները գերազանցել են նախորդ տարվա մակարդակը՝ բացառությամբ պտղի, որը պայմանավորված է գարնանային ցրտահարությամբ։ Մասնավորապես 2014 թվականի օպերատիվ տվյալներով` հանրապետությունում արտադրվել է 591 հազար տոննա հացահատիկ և հատիկաընդեղեն` 2013 թվականի 548,7 հազար տոննայի դիմաց, 340 հազար տոննա ցորեն` նախորդ տարվա 311,5 հազար տոննայի դիմաց:

Գյուղատնտեսության նախարարի տեղակալի ներկայացրած տվյալների համաձայն` 2011-2014թթ․շուրջ 49,1 հազ․ հեկտարով ավելացել են մշակվող ցանքատարածությունները, 2010 թվականին դրանք կազմել են 283,6 հազ․ հեկտար, 2014 թվականին` 332,7 հազ․ հեկտար, որը 2013 թվականից ավել է 14,6 հազ․ հեկտարով։