Դոնալդ Թրամփն հայտարարել է ԱՄՆ նախագահական ընտրություններին մասնակցելու մտադրության մասին
Ամերիկացի մեծահարուստ Դոնալդ Թրամփն հայտարարել է, թե մտադիր է իր թեկնածությունն առաջադրել 2016 թ-ի նախագահական ընտրություններին։ Այս մասին հաղորդում է «Գազետա.ռու» կայքը, վկայակոչելով «The Independent» պարբերականի զրույցը Թրամփի հետ։
«Ես միակ մարդն եմ, ով կկարողանա այդ երկրին վերադարձնել իր երբեմնի հզորությունը։ Սա է այն ամենն, ինչ ես գիտեմ։ Որևէ մեկն ի զորու չէ դա անել», - հայտարարել է Թրամփը։
Կայքը նշում է, թե 2016 թ-ին ԱՄՆ նախագահական ընտրությունների հավանական թեկնածուների ցանկում նշում են Հիլարի Քլինթոնի, Ջեբ Բուշի և Միթ Ռոմնիի անունները։
«Միթ Ռոմնիին չեն ընտրի, քանի որ նրան արդեն տրվել է մեկ հնարավորություն, որը նա բաց թողեց։ Բուշին ևս չեն ընտրի։ Եվս մեկ Բուշի կարիքը չունենք», - ասել է միլիարդատերը։
Թրամփը խոստացել է նախագահ դառնալու դեպքում նոր աշխատատեղեր ստեղծել, հաղթանակ տանել «Իսլամական պետություն» ահաբեկչական կազմակերպության նկատմամբ, կրճատել բյուջեի սղաճը, ինչպես նաև կանգնեցնել իրանական միջուկային զենքի մշակումը։
Նշենք, 2008 և 2012 թթ-ի նախագահական ընտրություններից առաջ Դոնալդ Թրամփը ևս հանդես էր եկել դրանց մասնակցելու հայտարարություններով, սակայն երկու դեպքում էլ չէր առաջադրել իր թեկնածությունը։
Լրահոս
Տեսանյութեր
Սա քաղաքական գործընթաց է, անթույլատրելի քաղաքական որոշումներ. Թաթոյանը՝ սահմանազատման մասին