ԱՄՆ-ի Սենատում Հայոց ցեղասպանության ճանաչման նոր բանաձև է ներկայացվել
Հետևելով Հռոմի Ֆրանցիսկոս պապի՝ Հայոց ցեղասպանությունը վերահաստատող պատմական հայտարարությանը և Եվրախորհրդարանի կողմից այդ ոճրի դատապարտմանը, ամերիկացի սենատորներ Ռոբերտ Մենենդեսը, Մարկ Քըրքը, Բարբարա Բոքսերը և Քորի Գարդները երեկ բանաձևի նախագիծ են ներկայացրել, որը կոչ է անում հայ-թուրքական կայուն և երկարատև հարաբերությունների՝ հիմնված Հայոց ցեղասպանության «լիակատար ճանաչման» վրա: Այս մասին հաղորդում է Ամերիկայի Հայ դատի հանձնախմբի մամուլի ծառայությունը:
Նախագահ Բարաք Օբամայի ապրիլի 24-ի ամենամյա հայտարարության նախաշեմին Դեմոկրատական և Հանրապետական կուսակցությունները ներկայացնող սենատորների մշակած նախագծում բարձր է գնահատված Պապի կողմից Հայոց ցեղասպանության որակումը որպես 20-րդ դարի առաջին ցեղասպանություն, և շատերը բեկումնային են համարում Հայոց ցեղասպանության հարցում ԱՄՆ քաղաքականության առումով։
Նախագծի համահեղինակները ընդգծել են Հայոց ցեղասպանության փաստի հաստատման հարցում ԱՄՆ քաղաքականության կարևորությունը։
«100 տարի առաջ 1.5 մլն հայ տղամարդիկ, կանայք և երեխաներ Հայոց ցեղասպանության ժամանակ սպանվել են թուրք օսմանների կողմից։ Ժամանակն է, որպեսզի այդ չարիքը կոչվի այնպես, ինչպես այն իրականում եղել է, այն է՝ հայ ժողովրդի նպատակաուղղված բնաջնջում։ Բանաձևը պարզ ասում է, որ անհնար է ժխտել ցեղասպանության փաստն ու Հայոց ցեղասպանության պատմությունը։
Այն ժամանակ, երբ աշխարհը պատրաստվում է ապրիլի 24-ը նշել իբրեւ Հայոց ցեղասպանության օր, ԱՄՆ-ը պետք է պարտավորություն ստանձնի ճանաչել այդ ցեղասպանության ամբողջական նշանակությունը, մասշտաբներն ու պատմությունը, որպեսզի հարգի անմեղ զոհերի հիշատակն ու ապագայում կանխի նման ողբերգությունները»,- նշել է սենատոր Ռոբերտ Մենենդեսը։
Սենատոր Մարկ Քըրքն ընդգծել է, որ 100 տարին չափազանց երկար ժամանակահատված է 1.5 մլն հայերի կոտորածն իր անունով՝ ցեղասպանություն, չկոչելու համար:
«Դա ողբերգություն է, որը սև հետք թողեց աշխարհի խղճի վրա։ Ավելի քան 20 երկրներ, ԱՄՆ 43 նահանգ և Հռոմի Պապը միանշանակ հաստատել են Հայոց ցեղասպանության փաստը։ Հիմա ժամանակն է, որ ԱՄՆ-ը նույնպես միանա նրանց»,- ընդգծել է Բարբարա Բոքսերը։
«Հռոմի Պապի կոչը բոլորի հայացքներն ուղղում է դեպի այն ընտրությունը, որի առջև կանգնած է նախագահ Օբաման ապրիլի 24-ից առաջ։ Այն ժամանակ, երբ աշխարհը հետևում է 100-ամյակին, նախագահ Օբաման պետք է որոշում կայացնի։ Նա կարող է ասել ճշմարտությունը և հաստատել Ցեղասպանության դեմ պայքարի գործում ԱՄՆ սկզբունքային ղեկավարության ժառանգությունը կամ կարող է տեղի տալ Անկարայի սպառնալիքներին՝ թույլ տալով թուրքական կառավարությանը խստացնել –խտողականության քաղաքականությունը, որը նա փաթաթում է ԱՄՆ-ի կառավարությանը»,- բանաձևի հետ կապված մեկնաբանել է Հայ դատի հանձնախմբի գործադիր տնօրեն Արամ Համբարյանը։
Լրահոս
Տեսանյութեր
Սա քաղաքական գործընթաց է, անթույլատրելի քաղաքական որոշումներ. Թաթոյանը՝ սահմանազատման մասին
