Ձեր վստահելի աղբյուրը

Միջազգային եվրոպական շարժումը ապրիլի 24-25-ին Ռիգայում ընթացքող իր Գլխավոր ասամբլեայի նիստում միաձայն Հայոց ցեղասպանության վերաբերյալ բանաձև է ընդունել, որով «դատապարտում է ցեղասպանության և մարդկության դեմ հանցագործությունների բոլոր ձևերը և խոստորեն դատապարտում դրանց ժխտողականությունը»:

Բանաձևի ընդունման, դրա բովանդակության և նշանակության մասին Panorama.am-ը զրուցեց «Հայաստանի եվրոպացի բարեկամներ» կազմակերպության ղեկավար Էդուարդո Լորենցո Օչոայի հետ:

-Պարոն Լորենցո Օչոա, ի՞նչ հանգամանքներում Դուք որոշեցիք մշակել և ընդունել Հայոց Ցեղասպանությանը վերաբերող նման բանաձև:
-Բավականին երկար ժամանակ լինելով Եվրոպական շարժման անդամ և հաշվի առնելով հանգամանքը, որ մենք ունենք եվրոպական արժեքները տարածելու երկարաժամկետ խնդիր` համարեցինք, որ այս բանաձևն առաջարկելը կարող է լավ գաղափար լինել: Ի վերջո ի՞նչը կարող է ավելի համահունչ լինել եվրոպական արժեհամակարգին, քան թույլ չտալը, որ նման չարագործություններ կրկնվեն: Ի հավելումն` նշեմ, որ երբ մենք կապնվեցինք Եվրոպական շարժման անդամ կազմակերպությունների հետ, նրանք նույնպես ընդունեցին, որ Հայոց Ցեղասպանության թեման պետք է դառնա աշխատանքի և քննարկումների առարկա Եվրոպական շարժման գործունեության շրջանակներում, նամանավանդ, Ցեղասպանության 100-ամյա տարելիցի շեմին:

-Կարո՞ղ եք փոքր-ինչ մասնավորեցնել, թե կոնկրետ ինչպիսի ձևակերպումներ են տեղ գտել բանաձևում, արդյո՞ք այն կոչ է անում Թուրքիային ճանաչել Ցեղասպանությունը, թե՞ միայն դատապարտում է Ցեղասպանության իրողությունը:
-Բանաձևը ոչ միայն դիտարկում է Ցեղասպանության ողբերգական իրադարձությունները ՄԱԿ-ի «Ցեղասպանության հանցագործությունը պատժելու և կանխարգելելու մասին» կոնվենցիայի համատեքստում, այլև հույս ունի, որ Թուրքիայի կողմից Հայոց Ցեղասպանության ճանաչումը կկապվի հայ և թուրք ժողովուրդների պատմական հաշտեցման հետ: Այսպիսով, բանաձևը ընդգծում է Թուրքիայի կողմից ցեղասպանության ճանաչման կարևորությունը` որպես հայ-թուրքական հարաբերությունների կարգավորման կարևոր էլեմենտ: Բացի այդ, Եվրոպական շարժումը դատապարտում է մարդկության դեմ ուղղված հանցագործություններն ու ցեղասպանությունը և խորապես արտահայտում է իր ցավակցությունները նման հանցագործությունները ժխտելու կապակցությամբ` ընդգծելով հանգամանքը, որ մարդկության դեմ ուղղված հանցագործությունների, այդ թվում` ցեղասպանությունների, կանխարգելումը պետք է լինի միջազգային հանրության առաջնահերթություններից մեկը: 

-Ովքե՞ր են Եվրոպական շարժման անդամները, և ի՞նչ մթնոլորտում է տեղի ունեցել քվեարկությունը, արդյո՞ք եղել են դեմ կամ ձեռնպահ ձայներ:
-Եվրոպական շարժումը ներառում է 55 կազմակերպություններ, միջազգային միավորումներ և եվրոպական քաղաքական կուսակցություններ: Քվեարկության մթնոլորտը խիստ դրական էր: Այն անցավ միաձայն, չեղան դեմ կամ ձեռնպահ կողմեր: Եվրոպական շարժման նախագահ, Եվրոպայի խորհրդարանի անդամ պարոն Ջո Լայնեն քվեարկությունից հետո բոլորին շնորհավորեց: 

-Ինչպե՞ս կգնահատեք այս տիպի բանաձևերի կարևորությունը, արդյո՞ք դրանք կարող են էական ազդեցություն ունենալ Հայոց Ցեղասպանության միջազգային ճանաճման գործընթացի վրա:
-Եվրոպական շարժման անդամները բավականին ազդեցիկ կազմակերպություններ են: Հենց նրանց նախաձեռնությամբ են ստեղծվել Եվրոպայի Խորհուրդը և Եվրոպայի քոլեջը: Հետևաբար ես հույս ունեմ, որ նրանք կշարունակեն նպաստել Հայոց Ցեղասպանության ճանաչման գործընթացին ԵՄ-ի այն սակավ երկրներում, ինչպես նաև միջազգային այն կազմակերպություններում, որոնք դեռ չեն ճանաչել Ցեղասպանության փաստը: Բանաձևի ընդունումը խրախուսում է նաև այն թուրք կազմակերպություններին, քաղաքական գործիչներին և գիտնականներին, ովքեր ընդունում են Ցեղասպանությունը, և դա կօգնի ավելացնել Թուրքիայում նման մարդկանց և կազմակերպությունների թիվը: Ամեն ինչից զատ, ցեղսպանության կամ մարդկության դեմ ուղղված բոլոր հանցագործությունների զոհերն ունեն արժանապատվության, պատմական արդարադատության և մոռացված չլինելու իրավունք: Այս առումով մենք հպարտ ենք, որ կարողացանք մեր համեստ լուման ներդնել այս խնդրում: