Ձեր վստահելի աղբյուրը

ԵՄ առաջնորդները Ռիգայում որոշել են կենդանի պահել Արևելյան գործընկերության ծրագիրը հետխորհրդային վեց պետությունների համար՝ սահմանափակելով այդ գործընկերների հույսերը ԵՄ անդամակցության հետ կապված: Այս մասին գրում է եվրոպական հայտնի EUobserver էլեկտրոնային պարբերականը եւ շարունակում, որ այսուհետ Արեւելյան գործընկերությունը կկենտրոնանա Մոլդովայի, Ուկրաինայի եւ Վրաստանի “Եվրոպական ձգտումների” վրա:

Նախաձեռնության գործընկեր երկրներից Ուկրաինան եւ Վրաստանը խնդրում են ԵՄ-ից մուտքի արտոնագրերի ռեժիմի վերացում գալիք տարվա ընթացքում, բայց այս եւ հետագա ընդլայնման հետ կապված այլ հարցերում ԵՄ հստակեցրել է, որ չի շտապելու՝ Ռուսաստանի հետ նոր հակադրություններ չստեղծելու համար:

«Արեւելյան գործընկերությունը ոչ թե ընդլայնման գործիք է ԵՄ համար, ԵՄ հետ մերձենալու»,-ասել է Գերմանիայի կանցլեր Անգելա Մերկելը Ռիգա ժամանելուց հետո:

Անանուն մի պաշտոնյա ասել է EUobserver-ին, որ «ԵՄ առաջնորդները, հատկապես մեծ երկրներից, հստակեցրել են, որ հետագա ընդլայնումը այժմ լուծելու հարց չէ, բայց ապագայում որեւէ բան բացառել հնարավոր չէ: Մենք դեմ չենք դրան, պարզապես հիմա ճիշտ ժամանակը չէ դրա համար»:

Մայիսի 21-ին Ռիգայում մեկնարկած Արեւելյան գործընկերության համաժողովը սկսվել է առաջնորդների ոչ պաշտոնական ընթրիքով, որն ընթացել է Վրաստանի վարչապետ Իրակլի Ղարիբաշվիլու բավական “էմոցիոնալ” ելույթով այն մասին, որ իր երկիրը “մեծ ձեռքբերումներ ունի ԵՄ արժեքների ներմուծման առումով եւ ցանկանում է ինչ որ բան ստանալ դրա դիմաց”:
Գագաթաժողովին ընդունելու համար նախատեսված հռչակագրում ընդգծվելու է, որ մասնակից երկրները “գնահատում են համապատասխան գործընկերների եվրոպական ձգտումները եւ եվրոպական ընտրությունը”, առանց հետագայում անդամակցության հարցի վերաբերյալ ակնարկի:

Հռչակագրի նախնական տարբերակը նաեւ “ջերմորեն ողջունում է Վրաստանի եւ Ուկրաինայի առաջընթացը” ԵՄ կողմից պահանջվող միջոցառումների իրականացման հարցում, մասնավորապես կոռուպցիայի դեմ պայքարի ոլորտում:

«Ռուսաստանի մասին շատ խոսվեց ընթրիքի ընթացքում»,-մի պաշտոնյա ասել է EUobserver-ին, իսկ ԵՄ պաշտոնյաները նշել են գագաթաժողովի սկզբում, որ Արեւելյան գործընկերությունը ուղղված չէ Ռուսաստանի դեմ:

«Արեւելյան գործընկերությունը գեղեցկության մրցույթ չէ Ռուսաստանի եւ ԵՄ միջեւ, բայց եթե անկեղծ լինենք՝ գեղեկցությունը կարեւոր է»,-ասել է ԵՄ Խորհրդի նախագահ Դոնալդ Տուսկը, հավելելով, որ եթե Ռուսաստանը ավելի փափուկ լիներ, ավելի գայթակղիչ եւ գրավիչ, միգուցե այն ստիպված չլիներ իր մյուս թերությունները ծածկել ապակառուցողական եւ ագրեսիվ գործելաոճով: