«Սա չի՞ նշանակում, որ Արևելյան Գործընկերության ժամանակներն արդեն անցել են». լրագրողի հարցը Տուսկին
Այսօր ավարտվեց Լատվիայի մայրաքաղաք Ռիգայում ընթացող գագաթաժողովը, որը նվիրված էր Արևելյան Գործընկերության ծրագրի անդամ երկրների և Եվրամիության միջև հետագա համագործակցության ձևաչափերի հաստատմանը: Գագաթաժողովի արդյունքում ընդունվել է հռչակագիր, որը բազմաթիվ քննարկումներից հետո ստորագրել են գագաթաժողովին մասնակցող բոլոր կողմերը:
Հիշեցնենք, որ «Риа.ru»-ի հաղորդմամբ` այսօր`ավելի վաղ, Եվրոպական խորհրդարանի ղեկավար Մարտին Շուլցը հայտարարել էր, որ Ադրբեջանը հրաժարվում է ստորագրել գագաթաժողովի ամփոփիչ հռչակագիրը:
«Ես վերջնական տեղեկություններ չունեմ, սակայն ամբողջ առավոտ և նաև ներկա պահին դեռևս խորհրդակցություններ են ընթանում: Հենց Ադրբեջանն է հրաժարվում ստորագրել փաստաթուղթը»,-հայտարարել էր Շուլցը` լրագրողների հետ զրույցի ժամանակ:
Ամեն դեպքում օրվա երկրորդ կեսին գագաթաժողովի մասնակիցները համաձայնության են եկել հռչակագրի ձևակերպումների շուրջ, և այն ստացել է բոլոր կողմերի ստորագրությունը:
Գագաթաժողովի փակման արարողության ժամանակ`մամլո ասուլիսի ընթացքում, ամփոփիչ խոսքով են հանդես եկել հյուրընկալած երկրի`Լատվիայի վարչապետ Լայմդոտա Ստրաույումանը, Եվրախորհրդի նախագահ Դոնալդ Տուսկը և Եվրահանձնաժողովի նախագահ Ժան Կլոդ Յունկերը:
Լրագրողների հետ հարցուպատասխանի ժամանակ «The Wall Street Journal» պարբերականի լրագրողը անդրադարձել է Ադրբեջանի դիրքորոշմանը, նշելով, որ վերջինս հրաժարվել է ստորագրել հռչակագիրը, և ԵՄ-ի ներկայացուցիչները ստիպված են եղել հեռախոսազրույց ունենալ Իլհամ Ալիևի հետ, որից հետո միայն Բաքվի իշխանությունները համաձայնել են միանալ հռչակագրին:
Լրագրողի հարցին, թե արդյոք սա չի նշանակում, որ Արևելյան Գործընկերության ժամանակներն արդեն անցել են, Դոնալդ Տուսկը պատասխանել է. «Ադրբեջանի և Բելառուսի հետ մենք ունենք համագործակցության տարբերակված ձևեր: Բանակցություններում Ադրբեջանի հետ խնդիր առաջացավ, որովհետև անհատական մոտեցումը հիմնական քննարկման առարկան էր: Մեզ անհրաժեշտ են փոխհամագործակցության նոր գործիքներ: Ալիևի հետ մեր խոսակցության հիմնական թեման առնչվում էր հենց այդ նոր մոտեցումներին, մենք քննարկել ենք ոչ թե հռչակագիրը, այլ նոր գործիքակազմի որդեգրման անհրաժեշտությունը: Ադրբեջանը տրամադրված է շարունակել համագործակցությունը Արևելյան գործընկերության հետ: Նրանից միայն պահանջվում է լավ հարաբերություններ պահպանել Եվրոպայի հետ: Ինչ վերաբերում է հռչակագրի շուրջ էմոցիաներին, ապա դա պայմանավորված է իրադրության պարզ չլինելով: Վիլնյուսի գագաթնաժողովից հետո շատ բան է փոխվել, բայց մեր մոտեցումները նույնն են մնացել: Ամենագլխավորը վերջնարդյունքն է, այլ ոչ թե ընթացքը»:
Տուսկը անդրադարձել է նաև Հայաստանի հետ համագործակցության ձևաչափին` նշելով, որ ԵՄ-ն շարունակում է ծայրաստիճան կարևորել Հայաստանի հանրապետության հետ երկկողմ հարաբերությունների զարգացումը:
«Մենք հերթական անգամ մեր աջակցությունն ենք հայտնում այն երկրներին, որոնք ձգտում են անհատական հարաբերությունների ԵՄ-ի հետ: Դա վերաբերվում է նաև ՀՀ-ին, որը նույնպես ԵՄ-ի հետ հարաբերությունների յուրահատուկ ձևաչափ ունի: Մենք, իհարկե, շարունակում ենք աշխատել Հայաստանի հետ: Ներկա իրավիճակը չի բացառում, այլ հակառակը՝ զարգացնում է մեր երկկողմ հարաբերությունները: Մենք շարունակում ենք վերաբերվել մեր գործընկերության պահպանմանը որպես ծայրահեղ կարևոր նպատակի»,- հավելել է Տուսկը:
Ռիգայի գագաթաժողովի հռչակագրում ԵՄ Հայաստան հարաբերությունների մասով նշվում է, որ գագաթաժողովի մասնակիցները ողջունում են 2013 թվականի Վիլնյուսի գագաթնաժողովի արդյունքներով հաստատված այն մոտեցումը, որ պետք է գործընկեր երկրների հետ զարգացնել տարբերակված մոտեցումներ:
«Գագաթաժողովի մասնակիցները ողջունում են Հայաստանի և ԵՄ-ի միջև ձեռք բերված ընդհանուր ըմբռնումը` ուղղված Հայաստանի և ԵՄ-ի միջև ապագա համաձայնագրին, որը կոչված է նպաստելու շահագրգիռ ոլորտներում երկուստեք համակողմանի համագործակցության զարգացմանը և ամրապնդմանը»,- նշված է հռչակագրում:
Գագաթնաժողովի մասնակիցները նաև ողջունել են ԵՄ-ի հետ վիզային ռեժիմի դյուրացման և հետընդունման (ռեադմիսիա) համաձայնագրով Հայաստանի մինչ օրս իրականացրած բարեփոխումները` հույս հայտնելով, որ արդեն առաջիկայում կմեկնարկեն առանց վիզային ռեժիմի հաստատման շուրջ բանակցությունները:
Հայաստան-ԵՄ ոլորտային համագործակցության մասով հռչակագրում նշվում է, որ գագաթնաժողովի մասնակիցները նաև հույս են հայտնում, որ ի թիվս այլ կրթական ծրագրերի, Հայաստանը ավարտին կհասցնի «Հորիզոն 2020» հետազոտական և նորարարական թեմաներին վերաբերվող ծրագրի միանալու գործընթացը: Հռչակագրում գագաթնաժողովի մասնակիցները նաև հույս են հայտնել, որ Հայաստանը ապագայում կմասնակցի նաև փոքր և միջին ձեռնարկությունների կարողությունների զարգացմանն ուղղված ԵՄ ծրագրին: Հռչակագրով նախատեսվում է նաև առաջին իսկ հնարավորոթյան դեպքում մեկնարկել ՀՀ-ԵՄ Ավիացիոն համաձայնագրի կնքման շուրջ աշխատանքները:
Նախորդող հրապարակումներ՝
Ռիգայի գագաթաժողովի հռչակագրով գագաթաժողովի մասնակիցները իրենց աջակցությունն են հայտնել ԵԱՀԿ Մինսկի խմբին
Ռիգայի հռչակագիր. «Ողջունում ենք ԵՄ և Հայաստանի միջև ձեռք բերված լիարժեք փոխըմբռնումը»
Լրահոս
Տեսանյութեր
Փաշինյանի կնոջը «Նիկոլ ցեղասպան» վանկարկումով դիմավորեցին Ծիծեռնակաբերդի հուշահամալիրում
