Իրանի ԱԳ նախարար. Միացյալ Նահանգները համաձայնության և պատժամիջոցների միջև պետք է ընտրություն կատարեն
«Միացյալ Նահանգները համաձայնության և պատժամիջոցների միջև պետք է ընտրություն կատարեն»,-այդ մասին իրանական «Թաբնաք.իր» կայքի հաղորդմամբ՝ հայտարարել է Իրանի ԱԳ նախարար Մոհամմադ Ջավադ Զարիֆը:
Իրանի ԱԳ նախարարը «Al-Monitor» պարբերականին տված հարցազրույցում լրագրողի այն հարցին, թե ԻԻՀ հոգևոր առաջնորդի՝ միջուկային ծրագրի վերաբերյալ հայտարարած կարմիր գիծն արդյո՞ք անհնար չի դարձնի համաձայնության կնքումը, արտգործնախարար Զարիֆն նշել է. «Հոգևոր առաջնորդի հայտարարությունն ընդգծում է Իրանի դիրքորոշումը, բանակցությունների առաջին իսկ օրվանից մենք առաջնորդվել ենք այդ դիրքորոշմամբ»:
Իրանական «ԻՍՆԱ» լրատվական գործակալության հաղորդմամբ՝ ԻԻՀ ԱԳ նախարարը Վիեննայում լրագրողների հետ հանդիպման ժամանակ, ամփոփելով վերջին օրերին միջուկային խնդրի շուրջ Իրանի և «5+1 խմբի» միջև տեղի ունեցած բանակցությունների արդյունքները, մասնավորապես նշել է. «Բանակցությունների ընթացքում մենք զգալի առաջընթաց ենք ունեցել, սակայն մի շարք տեխնիկական հարցեր և տարբեր ձևակերպումներ կան, որոնց վերաբերյալ կողմերը պետք է քաղաքական որոշումներ կայացնեն»:
Նշենք, որ հունիսի 30-ին Վիեննայում Իրանի և «5+1 խմբի» միջև տեղի ունեցած բանակցությունների արդյունքում որոշում կայացվեց բանակցությունների ժամկետը երկարացնել ևս յոթ օրով: