Շահգելդյանը՝ «Ժառանգության» որոշման մասին. Յուրաքանչյուր կուսակցություն ունի իր ռազմավարությունը
Օրինաց Երկիրը Սահմանադրական բարեփոխումների վերաբերյալ դիրքորոշում կհայտնի ՀՀ նախագահի ներկայացուցչի հետ հանդիպումից հետո, քանի դեռ չեն լսել իրենց ներկայացրած առաջարկությունների վերաբերյալ դիրքորոշումը, մնում են իրենց կարծիքին: Այս մասին Panorama.am-ի հետ զրույցում ասաց Օրինաց երկիր խմբակցության քարտուղար Մհեր Շահգելդյանը:
«Լարված և հագեցած շաբաթ է: Սահմանադրական բարեփոխումների շուրջ քննարկումներ Վենետիկի հանձնաժողովի հետ, այնուհետև կոնսուլտացիաներ ՀՀ նախագահի մոտ: Հաջորդը ԱԺ-ում խմբակցությունը կհյուրընկալի նախագահի ներկայացուցչին և ԱԺ նիստը: Մենք չենք կարող մեզ թույլ տալ ունենալ սահմանադրություն, որը կարող է հետընթաց լինել»,-գրել էր ՕԵԿ ներկայացուցիչը ֆեյսբուքյան էջում:
Panorama.am-ի հետ զրույցում Շահգելդյանը մանրամասնեց, եթե ներկայացվել են առաջարկություններ, ապա դրանք պետք է հնարավորություն տան հետագայում զարգացնել քաղաքական համակարգը:
Հիշեցնենք, որ ՕԵԿ-ը Սահմանադրական բարեփոխումների վերաբերյալ հինգ առաջարկություն է ներկայացրել:
«Դրանք ոչ թե կոնկրետ կետեր են, այլ կոնցեպտուալ ուղղություններ, որտեղ հստակ նշված են առաջարկություններն ու ուղղությունները: Դրական եմ գնահատում, որ մի քանի փոփոխություններ արդեն կատարվել են: Մի շարք առաջարկություններ նախնականորեն ընդունելի դիտարկվեցին երկրի նախագահի հետ երեկվա հանդիպմանը, բայց դրանց քննարկումը կլինի նախագահի ներկայացուցչի ու Օրինաց երկիր խմբակցության անդամների հետ հանդիպման ժամանակ»,-ասաց ՕԵԿ ներկայացուցիչը:
Քիչ առաջ հայտնի դարձավ, որ «Ժառանգությունը» չի գնա նախագահի հետ հանդիպման: ՕԵԿ-ական պատգամավորից հետաքրքրվեցինք, թե ինչպես է գնահատում «Ժառանգության» այս որոշումը:
«Ես չեմ ցանկանում մեկնաբանել: Յուրաքանչյուր կուսակցություն ունի իր ռազմավարությունը: Այդ տեսանկյունից յուրաքանչյուր կուսակցություն ելնում է իր մոտեցումներից: Մենք մշտապես քննարկումներին մասնակցել ենք ու մասնակցում ենք, հատկապես, երբ խոսքը վերաբերում է երկրի համար ռազմավարական նշանակություն ունեցող փաստաթղթերի մասին: Հարգանքով եմ վերաբերում բոլոր դիրքորոշումներին, գտնելով, որ յուրաքանչյուր կուսակցություն ինքն է որոշում իր մոտեցումներն ու քայլերը՝ ելնելով իր տեսլականից»,-ասաց նա:
Շահգելդյանը երկրի ղեկավարի հետ նախօրին կայացած հանդիպման մասին նշել էր. «Անցավ փոխըմբռնման ու կառուցողական մթնոլորտում»:
Հիշեցնենք, որ Նախագահ Սերժ Սարգսյանը շարունակում է սահմանադրական բարեփոխումների շուրջ հանդիպումներ և քննարկումներ ունենալ քաղաքական ուժերի ներկայացուցիչների հետ: Այս պահի դրությամբ երկրի ղեկավարը հանդիպում է ունեցել ԲՀԿ, ՕԵԿ, ՀՀՇ, ՀՅԴ ներկայացուցիչների հետ:
Նախորդող հրապարակումներ՝
Արարատ Զուրաբյան. Կարծում եմ, մեր ներկայացրած առաջարկություններն ընդունելի են իշխանությունների կողմիցՍերժ Սարգսյանը հանդիպել է Հայոց համազգային շարժում կուսակցության ներկայացուցիչների հետ
Նախագահը հանդիպել է ՕԵԿ ներկայացուցիչներին
«Մեր տեսակետները հիմնական բոլոր ուղղություններով համընկնում են». ՀՅԴ-ն՝ նախագահի հետ հանդիպման մասին
Սերժ Սարգսյանը հանդիպել է ՀՅԴ կուսակցության ներկայացուցիչների հետ
ԲՀԿ-ականները գոհ են երկրի ղեկավարի հետ հանդիպումից
Նախագահ Սերժ Սարգսյանը հանդիպել է ԲՀԿ ներկայացուցիչների հետ