Օլանդն ու Մերկելը ելույթ ունեցան ԵԽ-ում
Այսօր Եվրոպական խորհրդարանում համատեղ պատմական ելույթով հանդես եկան Ֆրանսիայի նախագահ Ֆրանսուա Օլանդն ու Գերմանիայի կանցլեր Անգելա Մերկելը։ 2 երկրների առաջնորդներն անդրադարձան Եվրոպայի արդի խնդիրներին, որոնք են միգրացիոն ճգնաժամը, Սիրիայում պատերազմը, ուկրաինական ճգնաժամը, Եվրոպայի միասնականության խնդիրը, Հունաստանի պարտքի խնդիրը։Այս մասին հայտնում է Ստրասբուրգում Panorama.am-ի թղթակիցը։
Ֆրանսիայի նախագահ Ֆրանսուա Օլանդն իր խոսքում ընդգծեց, որ ազատ Եվրոպան ուշ հասկացավ, որ Մերձավոր Արևելքի և Աֆրիկայի ճգնաժամը հետևանքներ կունենա Եվրոպայի համար, որի հետևանքով առաջացավ միգրացիոն խնդիրը։ Օլանդը նշեց, որ անհրաժեշտ է աջակցություն ցուցաբերել Թուրքիային, որտեղ գտնվում են մեծ թվով փախստականներ, և փախստականներին ապահովել աշխատանքով, որ կարողանան կերակրել իրենց երեխաներին։
Միգրացիոն ճգնաժամի պատճառով Եվրոպայի բաց սահմանների փակման հետ կապված Ֆրանսիայի նախագահն ասաց, որ պետք է ամրապնդել Շենգենյան գոտին․«Ազատ շարժումն հարցականի տակ դնելը ողբերգական սխալ կլինի»։
Օլանդը նշեց, որ կլինի ընտրություն․ «Մենք գնում ենք կամ առաջ, կամ հետ։ Միակ լուծումը ուժեղ Եվրոպան է, ոը կամրապնդի մեր ինքնիշխանությունը»։
Անգելա Մերկելը ևս անդրադարձավ միգրոցիոն ճգնաժամին, որը առավելագույնս անդրադարձ է ունենում հենց Գերմանիայի վրա՝ նշելով, որ միգրանտների այսպիսի հոսք դեպի Եվրոպա չէր եղել 2-րդ համաշխարհային պատերազմից հետո։ Սակայն Կանցլերը նաև ընդգծեց, որ պետք է փորձել և կանգնեցնել միգրանտների հոսքը դեպի Եվրոպա․ «Մենք պետք է այս մարդկանց ասենք, որ իրենք չեն կարող մնալ այստեղ»։
Ֆրանսիայի և Գերմանիայի առաջնորդների ելույթների հետո խորհրդարանականները ևս ելույթ ունեցան։
Եվրոպական խորհրդարանի պատգամավոր, Ֆրանսիայի Ազգային ճակատ կուսակցության ղեկավար Մարին Լը Պենը ևս ելույթ ունեցավ՝ Ֆրանսիայի նախագահին անվանելով Ֆրանսիայի մարզի փոխկանցլեր։
Մարին Լը Պենը ողջունեց կանցլեր Մերկելին՝ պատիվ անելու և Ֆրանսիայի մարզի փոխկանցլերի հետ խորհրդարան գալու համար։
«Ես չեմ կարող Ձեզ անվանել նախագահ, քանի որ դուք այլևս չեք կատարում Ձեր դերը, ինչպես Ձեր նախորդը»,-ասաց Մարին Լը Պենը և շարունակեց․«Հանրապետության նախագահը Ֆրանսիայի Սահմանադրության երաշխավորն է։ Նա չպետք է ներկայացնի Բեռլինում, Բրյուսելում կամ Վաշինգտոնում որոշված քաղաքականությունը, այլ պաշտպանի մեր ինքնիշխանությունը։ Ո՛չ, սա այն չէ, ինչ դուք անում եք։ Ընդհակառակը, երբ կանցլեր Մերկելն ասում է, որ մենք պետք է ընդունենք հազարավոր միգրանտների, դուք ծափահարում եք 2 ձեռքով։ Երբ մի փոքր ուշ նա փակում է իր սահմանները, դուք դեռ ծափահարում եք»։
Նշենք, որ Ֆրանսիայի և Գերմանիայի առաջնորդների այս ելույթն անվանվում էր պատմական, քանի որ սա առաջին համատեղ ուղերձն էր 1989թ-ի նոյեմբերից ի վեր, երբ նախագահ Ֆրանսուա Միտերանն ու կանցլեր Հելմուտ Կոլը ելույթ ունեցան Եվրոպական խորհրդարանում, ովքեր քննարկում էին Սառը պատերազմի ավարտը խորհրդարանականների հետ։
Լրահոս
Տեսանյութեր
Սա քաղաքական գործընթաց է, անթույլատրելի քաղաքական որոշումներ. Թաթոյանը՝ սահմանազատման մասին