Չեխիա-Լեհաստան խաղին ընդառաջ

19:10 16/06/2012 » Սպորտ

Չեխիա-Լեհաստան խաղին ընդառաջ

Եվրոպայի առաջնության 3-րդ տուրի հանդիպումները վճռորոշ են թիմերից յուրաքանչյուրի համար: Մրցաշարն իր բնույթով այնպիսին է, որ անգամ վերջին հորիզոնականում հանգրվանած հավաքականը հաղթանակի դեպքում կարող է դուրս գալ քառորդ եզրափակիչ:

«Եվրո-2012»-ի «A» խմբում Ռուսաստանի, Չեխիայի, Լեհաստանի և Հունաստանի հավաքականներն ունեն համապատասխանաբար 4, 3, 2 և 1 միավոր: Այսուհետ հանդիպումները կկայանան նույն ժամին` ավելորդ խնդիրներից խուսափելու համար:

Վրոցլավի «Քաղաքային» մարզադաշտում ասպարեզ դուրս կգան Չեխիայի և Լեհաստանի հավաքականները: Հանդիպման մրցավարն է շոտլանդացի Քրեյգ Թոմսոնը:

Այս դիմակայությունում հավաքականներից յուրաքանչյուրին պետք է միմիայն հաղթանակ: Ճիշտ է` չեխերին ոչ-ոքին էլ կարող է բավարարել, եթե, իհարկե, զուգահեռաբար ընթացող խաղում Ռուսաստանի ընտրանին չպարտվի Հունաստանի հավաքականին կամ պարտվի ավելի քան 6 գնդակի տարբերությամբ:

Հունաստանի հավաքականի հետ հանդիպումից հետո Չեխիայի հավաքականի գլխավոր մարզիչ Միխալ Բիլեկն ստացավ ամենավատ նորություններից մեկը. հիվանդանոցում էին հայտնվել թիմի աստղեր Ռոսիցկին ու Չեխը: Եթե դարպասապահը երեկ մարզվում էր խաղընկերների հետ, ապա ավագի հետ կապված հարցը դեռևս լուծված չէ: Ռոսիցկին պատմել է, որ ինքնազգացողությունը փոքր-ինչ լավ է, և այսօր պարզ կդառնա` կկարողանա՞ մասնակցել Լեհաստանի ընտրանու հետ հանդիպմանը, թե՞ ոչ:

Թիմի ավագին համարժեք փոխարինում պարզապես չկա: Հունաստանի ընտրանու հետ խաղում Կոլարժը փոխարինել էր Թոմաշին, սակայն ոչնչով աչքի չէր ընկել, և դժվար թե այսօր նա հիմնական կազմում դուրս գա խաղադաշտ: Հնարավոր է` այդ դիրքում հանդես գա Պլաշիլը, կենտրոնում կգործեն Յիրաչեկն ու Հյուբշմանը, իսկ ահա եզրային գոտիներից մեկում կարող են տեղ գրավել նախորդ խաղերի անհաջողակներից որևէ մեկը կամ երիտասարդ Դարիդան:

Լեհաստանի ազգային հավաքականի գլխավոր մարզիչ Ֆրանցիշեկ Սմուդան դեմ չէ խաղադաշտ դուրս բերել նախորդ խաղերին մասնակցած հիմնական կազմին, եթե, իհարկե, չխանգարեն վնասվածքները: Չեխերի հետ խաղում հարցականի տակ է միանգամից 3 ֆուտբոլիստների` Պոլանսկու, Դուդկայի և Պերկիի մասնակցությունը: Պերկին ընդհանրապես վերջին օրերին չի մարզվել թիմի հետ, և շատ հնարավոր է, որ նրա փոխարեն խաղադաշտ դուրս գա Վոյտկովյակը: Ինչ վերաբերում է կենտրոնական կիսապաշտպաններին, ապա նրանց կարող են փոխարինել Մատուշչիկն ու Մյերժևսկին:

Լեհաստանի հավաքականի լավ նորություններից է հիմնական դարպասապահի վերադարձը: Շչեսնիի որակազրկման ժամկետն ավարտվել է, սակայն Տիտոնը լավ էր գործում Ռուսաստանի հավաքականի հետ խաղում և թիմին փրկեց նաև Հունաստանի հետ մրցավեճում, և հիմա շատերը ցանկանում են այս խաղում հիմնական կազմում տեսնել հենց նրան:

Օպտիմալ կազմեր

Չեխիա- Չեխ, Սելասսիե, Սիվոկ, Կադլեց, Լիմբերսկի, Հյուբշման, Յիրաչեկ, Պիլարժ, Պլաշիլ, Դարիդա, Բարոշ:
Լեհաստան- Տիտոն, Պիշչեկ, Վասիլևսկի, Վոյտկովյակ, Բենիշ, Պոլանսկի, Դուդկա, Մուրավսկի, Բլաշչիկովսկի, Օբրանյակ, Լևանդովսկի:

Ով ինչ է ասել

Ֆրանցիշեկ Սմուդա (Լեհաստանի հավաքականի գլխավոր մարզիչ).- Առաջին հերթին` պետք է ցուցադրենք գեղեցիկ ֆուտբոլ: Պետք է պայքարենք մեկնարկային րոպեներից մինչև վերջին վայրկյանները:

Միխել Բիլեկ (Չեխիայի հավաքականի գլխավոր մարզիչ).- Իհարկե, մենք ցանկանում ենք հաջողության հասնել այս խաղում: Պատրաստվում ենք գոլ խփել, ինչը դժվար կացության մեջ կդնի Լեհաստանի հավաքականին: Հիմա պատճառ չկա մտածելու, որ հաղթելու մեր հնարավորությունները սահմանափակ են: Լավ հանդիպում անցկացրեցինք հույների հետ` հատկապես առաջին խաղակեսում, ուստի շանսեր ունենք` հաջողության հասնելու նաև այս խաղում:

Թոմաշ Ռոսիցկի (Չեխիայի հավաքականի ավագ).- Պետք չէ հանդիպումն սկսել այն մտքով, որ բավարար է նաև ոչ-ոքի արդյունքը: Պետք է տրամադրվել հաղթանակի, որը կօգնի խուսափել մեծ խնդիրներից: Հանդիպման առաջին իսկ րոպեներից պետք է անցնել ակտիվ գործողությունների և հանդես գալ այնպես, ինչպես դա արեցինք հույների հետ մրցավեճի առաջին խաղակեսում: Չպիտի մտածենք միավորների մասին, այլապես անհաջողության կմատնվենք:

Օյգեն Պոլանսկի (Լեհաստանի հավաքականի կիսապաշտպան).- Մենք գիտենք, որ պետք է հաղթենք, սակայն այդ մասին մտքերը մեզ չեն օգնի: Չպետք է մոռանանք այդ մասին, սակայն միայն այդ մասին մտածելն էլ սխալ է: Եթե հանդես գանք այնպես, ինչպես Ռուսաստանի հավաքականի հետ խաղում, ապա ոչ մի խնդիր չենք ունենա:

Աղբյուր` Panorama.am

Share |

Տպագրական տարբերակ

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter:

↓ Վերջին նորություններ
Շարունակել

Օրացույց